مامۆستایەكێ زانكۆیێ:پێتڤیە رێبەرێن ئێزدیان نەبنە رێگر و ئاستەنگ ل پێشیا گهۆرین و رێكخستنا جڤاكی و ئۆلی
تۆرا لالش:
مامۆستایەكێ ئێزدی ل زانكۆیا پۆلیتەكنیكی ل دهۆكێ دیاركر،خووندن و زانین دەرگەهەكێ گەلەگ باش و گونجای یە بۆ چارەسەركرنا گەلەك ئاریشەیان،ب تایبەت ئەگەر خووندەڤان پشكدارەكێ دلسۆزێ گهۆرینا جڤاكێ خۆ بت،دووپاتكر ژی ئەگەر رێبەرێن ئێزدیان بڤێن مللەتەك هەبت و بمینت كو رێبەریێ لێ بكن،دڤێت ئێدی نەبنە رێگر و ئاستەنگ ل پێشیا گهۆرینێ و خۆ رێكخستنێ ژ ئالیێن جڤاكی و ئۆلی ڤە.
عیدۆ خاموكا، مامۆستایا ل زانكۆیا پۆلیتەكنیكی ل دهۆكێ بۆ رۆژناما دەنگێ لالش راگەهاند، گەلەك یا فەرە گەنجێن وەلاتێ مە ب تەڤایی و یێن ئێزدیان ب تایبەتی رێیا خووندنێ و زانینێ ل شوونا هەر تشتەكی دن ب هەلبژێرن،ژبەركو هەتا رادەیەكی دەرفەتێن فێركرنێ و خۆ پێگەهاندنێ بەردەست ترن ژ سەردەمێ نفشێن بەری نۆكە، وگەلەك جاران ئەگەر گەنجێ مە ل شوونا دەم بۆراندنا بێ مفا و خراب بكارئینانا تۆرێن كۆمەلایەتی دەمێ خۆ بدەتە خووندنا خۆ دێ گەلەك یی سەركەفتی بت وكارت خزمەتا جڤاك و وەلاتێ خۆ ژی بكت.
ئەو چەندە ژی دیاركر،نائێتە ڤەشارتن كو ئاستەنگ ل پێشیا پرۆسا فێركرن وخووندنا زارۆك وگەنجێن مە هەبووینە و یێن هەین ژی، نەخاسمە پشكەكا مەزن یا جڤاكا ئێزدی ئیرۆ ب دەردێ كۆچبەری و پەنابەریێ دنالت، بەلێ وەختێ ئەم ئەزموونێن ملەتێن وێرانكاری ب سەردا هاتی دكەینە میناك، بۆمە باش خۆیا دبت كو موكمتر ل خۆ و پێگەهشتن و وەرارا خۆ یێت بووینە خودان، لەوما ئەگەر خووندن بۆ تاكێن جڤاكێن دن بتنێ ڤیان و دەستكەفتەكا كەسی بت دڤێت بۆ جڤاك و مللەتێ مە خواستەكا بنگەهین بت.
دەرباری رەوشا ئێزدیان مامۆستایێ زانكۆیێ گۆت:ئێزدی هەم ل وارگەهێن خۆ یێن رەسەن وهەم ژی ل سەرانسەری جیهانێ درەوشەكا گەلەك نالەبار دا دژین،ئەگەر ئەم وەك جڤاكەك و ئۆلەك خودان ناسنامەكا تایبەت یا ب وار و وەلات ل رێزا جڤاك و ئۆل و مللەتان بەرێ خۆ بدەینە خۆ دێ بۆمە باش دیار بت كو ئەم یێ دقەیرانەكا دژوار دا،ئەگەر ئەم ل خۆ نەزڤرین و ل خۆ نەبینە خودان دێ ژناڤچین.
عیدۆ خاموكا گۆتژی ئەگەرێن ڤی دەردێ مە یێ بێ داوی بەری د سیاسی و جوگرافی و ئابووری بن دجڤاكی و ئۆلی نە،ب دیتنا من مە تێرا رێكخستنا ناڤمال و جڤاكا خۆ كەسێن لێهاتی و شارەزا یێن هەین، لەوران ئەگەر رێبەرێن ئێزدیان بڤێن مللەتەك هەبت و بمینت كو رێبەریێ لێ بكن دڤێت ئێدی نەبنە رێگر و ئاستەنگ ل پێشیا گهۆرینێ و خۆ رێكخستنێ ژ ئالیێن جڤاكی و ئۆلی ڤە، ئەگەر نا دێ وەكی گەلەك مللەتێن دیێن ژمە بهێزتر و خودان شارستانیەت بینە رابردوو وبەشەك ژدیرۆكێ.
مامۆستا عیدۆ خامۆكا ل گوندێ بۆزان بسەر ناوچەداریا ئەلقووش ڤە ژ دایكبوویە وقۆناغا سەرەتایی ل گوندێ خۆ وئامادەیی ژ ل سالا (2002-2003)ێ ل ئەلقووش ب پلا ئێكەم ل بەشێ وێژەیی ب داوی ئینایە،باوەرناما بەكالۆریۆس ل سالا(2006-2007)ێ ل كولیژا یاسا و زانستێن سیاسی ل زانكۆیا سەلاحەددین ل هەولێرێ وەرگرتیە، پاشان ل سالا (2011)ێ ل وەلاتێ مسرێ باوەرناما ماستەرێ دبیاڤێ زانستێن سیاسی/ پەیوەندیێن نێڤ دەولەتی دا بدەستڤەئینایە،دنۆكەدا ژی مامۆستایە ل زانكۆیا پۆلیتەكنیكی یا دهۆك و جێگرێ راگرێ پەیمانگەها تەكنیكی یا شنگالێ یە.
تُتاح هذه الصورة أيضا في: کوردی