بەختەوەری چی یە؟
عزەت برۆ
گەلەك رێك هەنە كو مرۆڤ بكارت مفای ژێ وەربگرت ژ بۆ سەركەفتن و بەختەوەریێ د ژیانێ دا لەوما پێتڤیە بەردەوام بزاڤێ بكن و نەراوەستن و پێنگاڤ پێنگاڤ بەرەف سەركەفتنێ بەردەوام بن، بەختەوەری ئەو دەمەیە كو هزر و ئاخفتن و كردارێن مرۆڤی وەكی ئێك بن، ئێك ژ وان رێیێن هەرە گرنگ و ب ساناهی كو مرۆڤ بكارت مفای ژێ ببینت رێیا خۆ هەلسەنگاندنێ یە بۆ نموونە دەمێ مرۆڤ سپێدەیان ژ خەو رادبت مرۆڤ بێژت ئەز دكارم سەر بكەڤم و دێ ئیرۆ دلخۆش بم و هەولدەم باشتر ببم، ئەز دێ بریارێ دەم كا چاوان بژیم، نابت مرۆڤ هەست ب دلتەنگیێ و نەئارامیێ بكت خۆ ئەگەر مرۆڤی ئاریشەك ژی هەبت چنكو دوهی مر، سبەهی هێشتا نەهاتیە بتنێ مرۆڤی ژیانەك هەیە دڤێت تێدا یێ دلخۆش بت، دووبارەكرنا ڤان چەند پەیڤێن سادە رۆژانە كارتێكرنەكا زۆر لسەر ژیانا مە هەیە و پێتڤیە مە باوەریەكا مەزن ب خۆ هەبت و بریارێن دروست بدەت.
بەختەوەری رامانا هندێ نادەت كو تە چ كێشە و ئاریشە نینن بەلكو شیانێن خۆ گونجاندنێ نە لگەل ئاریشان ، هندەك جاران پێتڤیە خەمبار بی ژبەر هندێ داكو ژبیر نەكن كا بەختەوەری چەندە خۆشە، مرۆڤێن بەختەوەر هێزا خۆ دزانت و هەموو كێماسیێن خۆ قەبوول دكت، بەختەوەربوون نەئەوە كو توو كەسەكی نموونەیی بەلێ رامانا هندێ ددەت كو توو هندەك بریارێن دروست ددەی و بەرێ خۆ ددەیە كێم و كاسیێن خۆ ژبەر هندێ گرنگە هەردەم ئەم بزاڤا بدەستڤەئینانا بەختەوەریێ بكەین،چنكو بەختەوەری كلیلا چارەسەركرنا هەموو نەخۆشیایە و ژیانێ ب هیڤی دكت، بەختەوەری نە پێتڤیەكا رۆژانەیە مرۆڤ بكارت ژ بازاری بكرت بەلكو هەستەكا دناخێ مرۆڤی دا، بەرهەمێ هزر و هەست و رەفتار و تێگەهشتنا مەیە ژ ژیانێ، ئەم دكارن بێژن مرۆڤێ بەختەوەر یێ سەركەفتی یە د ژیانێ دە چنكو مرۆڤی ئاگەه ژ شێوازێ ژیانا خۆ هەیە ل دەمێ ئاریشە هەبن رێیێن گونجای چارەسەر دكت و هەروەسا رێزێ ل كەسێن دەوروبەرێ خۆ دگرت نابتە جیێ دلگرانیا خەلكێ.
تُتاح هذه الصورة أيضا في: کوردی