هێزا ئەقلی یان ئەقلێ هێزێ؟
سەبری سلێڤانەیی
دیارە مرۆڤ بوونەوەرەكێ هزرمەند، جڤاكی و شارستانی یە، خودان هزرە دا كو دەربرینێ ژ دەم و پرسێن زیندی یێن ژیانا جڤاكی بكت، بێ كو ئازادییا تەڤاهی ببەزینت،ئەم وەكو مرۆڤ، راستە مە چەنگ نینن دا كو بفڕن، بەلێ مە هزر هەنە دا د جیێ خۆ دا نەمینن و بشێن بەرهەمدانەكا مەعریفی بەرهەم بهینن و د ئەنجام دا مفایەكێ هەڤبەش بگەهت وی جڤاكێ كو ئەم هەمی تێدا ئۆرگانن،هیگل نەحەق نینە دەمێ بەحسێ ئازادیێ دكت، كو وەك هێڤێنەكێ د ناڤ روحا مرۆڤی دا هەیە، بەلێ دیارە ژی ئەو هێڤێنە ل هەر جهـ و دەمی قابلی مەیاندنێ نینە و هەتا بێتە مەیاندن پێتڤی ب خۆشكرنا كاودان و زەمینەسازیێ هەیە،مللەت ب رەخنێ پاش ناكەڤت و مللەت ب كینداری و كولتۆرێ چەوساندنا نێرینا ئازاد پێش ناكەڤت،دیارە هەر پێكهاتەیەكێ بوها و پیرۆزیێن خۆ هەنە و رێزگرتن ل وان بوها و پیرۆزییان رەوشتەكێ ئینسانی یە، بەلێ زانینا رەها و باشییا رەها و مانا رەها سێ خاسلەتێن خودایێ دلۆڤانن و هەركەسێ وان هەرسێ خاسلەتان بۆ خۆببت، ئەو پلەیا ئینسانان دبەزینت،مادەم ئەم ئینسانن، نەخۆ مە ماف هەیە وەكو ئینسان ئەم ب هزر و دەربرینێن خۆ مایێ خۆ د ئینسانیەتێ دا بكن،مادەم ئەم كوردستانی نە، نەخۆ مە ماف هەیە ئەم مافێ خۆ د كوردستانیبوونا خۆ دا بكن،هەركەس ئازادە د خووندن و تێگەهشتنا خۆ دا و كەس ژ ئاستێ خووندن و تێگەهشتنا كەسێ دی بەرپرسیار نینە و ئەگەر هات و جیاوازییا هزری پەیدا بوو، هینگێ باشترین ئالاڤ دانوستاندنەكا بوها و بلندە، هەگەرنا هینگێ ل هەمبەر یاسایێ هەركەس ژ زمان و دەربرینا خۆ بەرپرسیارە،ب راستی ژی، دەمێ ئەم پراكتیزا مافێ دەربرینێ و تێگەهشتنێ دكن، نائێتە وێ واتایێ كو ئەم وی مافی ژ كەسێن دی دستینن نەخێر، بەلكو روحا ئازادیێ ئەوە هەركەس د سەقا و ئاسایشەكا هزری دا ب ئازادییانە خۆ ببێژت، بەلێ تێكەلیێ دناڤبەرا ئازادی و فەوزایێ دا پەیدا نەكت،لگۆر لۆژیكێ رەخنێ، وەختێ ئەم رەخنەیا هندەك دیاردەیان دكن (گەندەلی، نەزانین و توندرەوی) قەت نائێتە وێ واتایێ كو ئەم رەخنا كوردستانێ یان رەخنا مللەتێ خۆ دكن،هەروەسا وەختێ ئەم رەخنا فكرا ئاینی ژی دكن نائێتە وێ واتایێ كو ئەم رەخنا ئاینی ب خۆ دكن چنكو ئاین وەحی یە، بەلێ فكرا ئاینیپێكهاتییە ژ خووندن و تێگەهشتنا كەسان بۆ تێكستا ئاینی،مە رێز بۆ هەموو ئینسان، سیاسەتمەدار و ئاینزانان هەیە، بەلێ مە رێز بۆ هزرا رەخنەیی و ئەقل و زانینێ ژی هەیە و ئەرك و بەرپرسیارییا مە ئەوە، ئەم وێ رێزگرتن و ئەقل و زانینێ بۆ مفا و ئارمانجێن ژیان و مللەتێ خۆ تەرخان بكن،ئەگەر بوویەر روحا دیرۆكێ بن، نەخۆ واتا روحا بوویەرانن و هەر كارەكێ ئەم پێ راببن، گەرەكە واتایەكا باش ل پشت هەبت، ژخۆ هەبوونا مە ل ڤێ ژیانێ بۆ هندێ یە كو واتایێن باش و جوان لدووڤ هەبن،رەخنە گرتن ل دیاردێن كرێت و نیگەتیڤ د ناڤ ژیانا مە یا تەڤاهی دا، ئێكە ژ بەرپرسیارییا رەوشەنبیریێ و شیوازێ ژیانا هەر مللەتەكێ لسەر ئاوایێ هزر و زمانێ وی مللەتی بۆ سەرەدەریكرنا پرسان دمینت و مللەتێ مە پێتڤی ب ژیانەكا سەرفەراز هەیە ،چنكو پرانییا پرسگرێكێن مە گرێدایی هزرا مەنە و هزرا مە بەرپرسیارە ژ رەفتار، بوویەر و دەربرینێن مە رە.
تُتاح هذه الصورة أيضا في: کوردی