شهمۆ قاسم: جهژنا بێلندێ دكهفته رۆژا 7/1/2022
تۆرا لالش:
بهرپرسێ لژنا رهوشهنبيرى ل بنگههێ لالش ل دهۆكێ راگههاند؛جهژن و ههلكهفتێن ئايينى يێن ئێزديان گرێدايى سروشتى نه،لهوا ژڤانێ وان دناڤبهرا رۆژهك بۆ شهش رۆژان دئێته گهۆرين،جهژنا بێلندێ ژى ئێكه ژكهڤنترين جهژنێن ئێزديان و ل سالا داهاتى دكهفته رۆژا 7/1/2022.
شهمۆ قاسم، بهرپرسێ لژنا رهوشهنبيرى ل بنگههێ لالش ل دهۆكێ بۆ(تۆرا لالش) راگههاند؛جهژنا بێلندێ( جه ژنا رۆژێ) ئێكه ژكهڤنترين جهژنێن ئێزديان و ڤهدگهرته دهمێ ميترايا وبوونا ميترايه،ئهڤ جهژن ب پيرۆزيا رۆژێ ڤه گرێدايه وچهندين مللهتێن دى ژى ڤان رێورهسمان دگێرن.
ههروهسا گۆت:”پهيڤا بێلنده پهيڤهكا ئاراميه رامانا بوون يان نووكرن دئێت ئانكو رۆژ بازنێ خۆ تهمام دكت وبهرهف بورجهكا نوو دچت وئهرد خۆلا خۆ يا بهرهف نشيڤ تهمام دكت لدۆر رۆژێ و دهست بڤهگهريانا خۆ بهرهف ههڤراز دكت ل ئينيا سێيێ ژ كانوونا ئێكێ يا ب هژمارا رۆژهلاتى،ل هێڤارا جهژنێ ههر مالهك ئاگرهكى هلدكهت ودبێژنێ گوركا گاى يان گوره پيتك ههموو ئهندامێن مالێ خۆ سێ جارا ب سهرا دهاڤێژن ودبێژن يا خودێ توو گونههێن مه ب سۆژى، ديسا خوارنهكا تايبهت دئێته چێكرن دبێژنێ ميرهه(كهشكين) وسهوك دئێنه پاتن ونانهكى تايبهت دئێته دروستكرن دبێژنێ (خهولێره) ومێويژهكێ دكهنه دناڤ دا وباش دسترين ههتا ئهو مێويژ دناڤ دا هندادبت وپاشى دقهلينن ول هێڤاريا رۆژا جهژنێ ب رێورهسمهكا تايبهت دئێته شكاندن وبهلاڤكرن لسهر ئهندامێن خێزانێ، بێ فهرق وجوداهى چ نێر يان مێ بت و كهسێ ئهو مێويژ دبههرا وى دا چۆ دێ ئێته خهلاتكرن ودبێژن رهوشا سالا نوو لسهر بهختێ وى يه”.
بهرپرسێ لژنا رهوشهنبيرى ل بنگههێ لالش دياركر:”هندهك رێورهسمێن دى ژى دئێنه گێران ل ئينيا بهرى بێلندێ ودبێژنێ بێلندا پيرا و ل هندهك جيا وتايبهت ل شنگالێ دبێژنێ ميلميلاڤ وئهڤه ئهو رێورهسمێن دئێنه گێران 1_جەژنا بێلندا پيرا وهندهك دبێژنێ (پێلندێن پیرافات) جەژنەكا كەڤنه بەرى ھاتنا شيخادى ئەڤ جەژن دهاته گێران وەك ئەركەكى ئۆلى ھەر سال ئەڤ جەژن دكهفته دئينيا ئێكێ دا ژ چلێ زڤستانێ و مجێورێن پیرافات ب چەند ڕێوڕەسما و ل ھەر گوند و جیەكی نيشانێن پيرافات ھەبن ڤان رێورەسما دگێرن، رێورەسم ژى بڤی رەنگی نە1_:ل ھێڤاریا جهژنێ چرایێ خاسێن گوندی دئێنە ھلكرن و ھەر مالەكا پیرێن پیرافات ھەبت چرايى ھلدكن وخەلكێ گوندی و ريهـ سپى و كەسانێن ئایينی قەستا مالا مجێورێ گوندی دكن و ل جيەكى خرڤه دبن وگوهـ ددهنه قەول وبهيت و قەسیدە ئهوێن دئێنه گۆتن ژلايێ ئۆلدارهكى ئايينى ڤە ول وێ شەڤێ ھەتا بەرێ سبهيكێ ئهو رێورهسم دئێنه گێران و ل سبهيكا ڤێ رۆژێ سمات دئێته چێكرن و دبێژنێ(كەشكا مالا پیرا) ول مالا مجێوری و لسەر گوندیا دئێتە بەلاڤكرن ،دیسا سبەیكێ خەلكێ گوندی قەستا مالا مجێورى دكن ژبۆ پیرۆزباھیا جەژنێ و پێكڤە سماتێ و شریناھیێ دخۆن،2_ميميلاڤا جوانا ئهڤ رێورهسمه بتنێ دناڤ هۆزا جوانا دا دئێنه گێران ئهوێن ل چيايێ شنگالێ د بهلاڤن،ئهڤ جهژنه دئێته گێران وهك رێزگرتنهك بۆ خاس و چاكێ ئێزدى پيرێ ئالى”.
شهمۆ قاسم ئاشكهراكر ژى جهژنا بێلندێ ژى ئێكه ژكهڤنترين جهژنێن ئێزديان و ل سالا داهاتى ئهڤه جهژن دكهفته رۆژا 7/1/”2022.
تُتاح هذه الصورة أيضا في: کوردی