سەرۆک بارزانی: کوردستان دەستبەرداری ئازادی و مافێن خۆ نابیت
گاڤ نیوز
سەرۆکم مەسعوود بارزانی ئەڤرۆ رۆژا ئەینی د یادا دەربازبوونا 52 سالیا رێککەفتنا 11ی ئادارێ پەیامەک بەلاڤ کر و تێدا دیار کریە کو خوراگریا گەلێ کوردستانێ و شورشێ ب رابەراتیا بارزانیێ نەمر رژێما ئیراقێ نەچار کر بۆ جارا ئێکێ و ب رەنگەکێ فەرمی دانپێدانێ ب هندەک ژ مافێن گەلێ کوردستانێ بکەن.
سەرۆک بارزانی د پەیاما خۆ دا نڤیسیە،” 11ی ئادارا 1970 بەلگەیەکێ روهنە دەربارەی سەرکەفتنا شورش و ئیرادەیا گەلێ کوردستانێ ب سەر نەحەزێن گەلێ کوردستانێ و بزاڤێن وان بۆ ژناڤبرنا گەلێ مە. رێککەفتنا 11ی ئادارێ بەرهەمێ خەبات و قوربانیدانا پێشمەرگە و هەمی چین و تەخ و پێکهاتەیێن ئاینی و نەتەوەیی یێن کوردستانێ بوو. ئەو خەباتا ژبۆ بەرقەراربوونا پێکڤەژیانێ و شەراکەت و دادپەروەری و ئاشتیێ دا یا بەردەوام بۆ ئەڤرۆ گەهشتیە ئەنجامی”.
سەرۆک بارزانی نڤیسیە ژی،”راستە پشتی رێککەفتنێ رژێما ئیراقێ رێکا پەیمانشکەستنێ گرتەبەر، لێ ئیرادەیا گەلێ مە بۆ بەردەوامیا خەباتێ و خۆرادەستنەکرنێ هەر بەردەوام بوو و بوویە ئەگەرێ دەستڤەئینانا دەستکەفتێن مەزنتر”.
سەرۆک مەسعوود بارزانی دوپات ژی کریە کو د هەر رەوشەکێ دا ئیرادەیا گەلێ کوردستانێ ناشکێت و کوردستان دەستبەرداری ئازادی و مافێن خۆ نابیت.
تُتاح هذه الصورة أيضا في: کوردی