UN هاریكاریێن ئاواران راگرتن
تۆرا لالش:
رێكخراوا جیهانی یا خوارنێ(UN) بریاردایە،ئەو دراڤێ پێش خوارنێ ڤە ددەتە ئاواران راگرت، ئەڤ یەك ژی بوویە جیێ دلگرانیا ئاوارەیێن شنگالێ ل كەمپان ل سنوورێ پارێزگەها دهۆكێ.
رێڤەبەرێ كۆچ و كۆچبەران و بەرسڤدانا قەیرانا ل پارێزگەها دهۆكێ پیر دەیان،بۆ رۆژناما دەنگێ لالش ئاشكەراكر،ل رۆژا 1/7/2022 گرێبەستا رێكخراوا(دەبلیو_ئێف_پی) یا جیهانی یا خوارنێ سەر ب یوئێن ڤە دێ ب داوی ئێت و ئێدی ئەو هاریكاریان ل سەر ئاواران بەلاڤ ناكەن،مە وەكو رێڤەبەری و دەزگەهێ خێرخوازیێ بارزانی كۆمبوون دگەل رێكخراوا ناڤهاتی كریە ژبۆی وێ یەكێ كو بەردەوامیێ بدەنە هاریكاریێن خۆ ل سەر ئاواران،لێ تا نۆكە ئەو نە گەهشتینە رێككەفتنێ،ئەم ل سەر خەتن دگەل جیێن پەیوەندیدار كو جارەكا دی یوئێن بینن سەر خەتی داكو هاریكاری ل سەر ئاواران نەئێنە برین.
حەجی دنائی،ئاوارەیەكێ خەلكێ شنگالێ یە ل كەمپا خانكێ،بۆ رۆژناما دەنگێ لالش خویاكر،هێشتا خەلكێ شنگالێ ژبەر خرابیا رەوشا ئێمناهیێ و ئیداری و خزمەتگۆزاریان ئاوارەنە دناڤا كەمپان دا ل سنوورێ پارێزگەها دهۆكێ و د رەوشەكا پەریشان دا دژین،ئەو دراڤێ ژلایێ رێكخراوا رێكخراوا(دەبلیو_ئێف_پی) یا جیهانی یا خوارنێ ڤە دهاتە بەلاڤكرن،ل سەر ئاواران هاریكاریەكا باش بوو ژبۆ ئاواران و دەبارا ژیانا وان یا رۆژانە و كرینا كەلوپەلێن خوارنێ،لێ پشتی ڤێ رێكخراوێ بریاردایی ڤی كوژمێ دراڤێ ل سەر ئاواران ببرت،دێ رەوشا مادی یا ئاواران خرابتر بت،لەوما داخوازێ ژ حكومەتا هەرێما كوردستانێ و دەزگەهێ خێرخوازیێ بارزانی دكەین چارەیەكێ بۆ ئاوارەیێن شنگالێ ببنن،داكو ئەڤ رێكخراو ل سەر گەهاندنا هاریكاریێن مادی یا بەردەوام بت.
تُتاح هذه الصورة أيضا في: کوردی