كۆچۆ برینەكا نەسارێژكری و تراژیدی یە
صباح سمیر
وەكو یە دیار و پێش چاڤ كو ل سەردەمێ نووی دە و ب تایبەتی ل 3تەباخا 2014ێ دەڤەرا شنگالێ كەفتە بەر هێرشا تیرۆرستێن داعش بتر ژ هەر دەڤەرەكا عێراقێ شنگالێ قوربانیا ڤێ هێرشێ دایە،چنكو ئەو دەڤەر بتر دناڤ و نێزیكی دەڤەرێن عەرەبان دایە و ژبەركو ئێزدی ژی رەنگەكێ جیاوازێ ئۆلی و نەتەوەی نە لەوران ب پالپشتیا هۆز و عەرەبێن شۆفێنی زولمەكا ئێكجار مەزن ل جڤاكا ئێزدیان هاتیە كرن.
دڤێ هێرشێ دا هەولا قركرنا خەلكێ گوندی كۆچۆ هاتە كرن وەكو بەرێ كا چاوا حكومەتێن شۆفێنیێن عێراقێ قركرن و ئەنفالێن سالێن هەشتیان ئەنجام داین هەمان شۆفێنی ل هەمبەر خەلكێ كۆچۆ ژی هاتە ئەنجام دان.،زۆربەیا مە دەمێ بابەتەكی یان گۆتارەكێ دنڤیسین دڤێت ئەم بتر خۆ دووری عاتفیێ بكەین و نەكەڤینە بن كارتێكرنا وێ دا و ب شێوەكی ئەكادیمی بنڤیسن و شلۆڤەكرنێن زانستی ل سەر دۆزا خۆ یا رەوا دیار بكەین، ئیرۆ رەوشا مە گەلەك یە ئالۆزە چنكو هەتا نۆكە ژی جینۆساید یا بەردەوامە، پشتی هەشت سالێن دەربەدەریێ و مالوێرانیێ هێشتا چارەنڤیسێ سەدان كەسان نەدیارە و هندەك ژ وان د بێ سەمیانن، سەرەرای ڤێ مالوێرانیێ جڤاكا مە ب سەر دوو لایان دا دابەش بوویە و هەر لایەنەك ل پەی بەرژەوەندیێن خۆ كار دكت و چارەسەریێ وەك باگرەوەندێ خۆ نەوەك ئێزدیەك دیار دكت، فەرە ئەم ل چارەسەریا راست و دروست بگەرین ژ پێخەمەت پاراستنا نفشێ پاشەرۆژێ ژ مەترسیا جینۆسایدێ و ژبۆ سارێژكرنا برینێن دایك و خوشكێن خۆ پێتڤیە ل پەی چارەسەریا لۆژیكی و راست و دروست بگەرین.
دهاوكێشەیا چارەسەریێ دا عێراق رێگرە ل هەمبەر چارەسەریێ چنكو ب بیانوویێن جودا جودا هەتا نۆكە حكومەتا فیدرال دڤێت قەبارێ ڤێ دۆزا مەزن بچوك بكت داكو نەئێتە نێڤدەولەتیكرن داكو ب كێمترین زیان ژێ دەرباز بت، هەردیسان د بابەتێ هلدانا گۆڕێن بكۆم دا كار زۆر ب سستی ب رێڤە دچت و دروست نەكرنا دادگەهەكا تایبەت ژبۆ دادگەهكرنا تیرۆرست و كەسێن دەست و خەمساری د هەبوونا ڤێ كۆمكوژیێ دا هەین، هەردیسان زێدەباری نەئێكلاكرنا هێزێن جۆرا و جۆر یێن دەرڤەی سیستەما لەشكەری و هەبوونا گرۆپێن جودا جودا بتر ئەڤ رەوشە بەرەف ئالۆزیێ بریە و پرۆسەیا هلدانا گۆڕێن بكۆم یە سستە،لەوران فەرە عێراق دادگەهەكا تایبەت ل دۆر تاوانێن داعش دامەزرینت یان ژی دەرفەتێ بدەتە جڤاكا نێڤ دەولەتی ئەڤی بابەتی چارەسەر بكت و هەر تاوانبارەك بگەهتە سزایێ خۆ و ب تایبەت ژی كار ل سەر لێگەریانا ئێزدیێن رزگارنەبووی بێتەكرن ئەڤەژی ب هەڤپشكی دگەل دەولەتێن دەردۆرێن عێراقێ ب تایبەتی سووریا و تووركیا داكو چارەنڤیسێ گرتیان بێنە ڤەدیتن و رزگاركرن.
خالەكا دن یا هەرا بهێز ئەوە ژێرخانا ئابووریا شنگالێ بێتە ڤەژاندن و ئاڤاكرن و د هەموو سیكتەران دا خزمەت بێتەكرن، قوربانی و رزگاربوویێن ژێر دەستێ رێكخراوا تیرۆرستی یا داعشێ بێنە قەرەبووكرن، زێدەباری ئاڤاكرنا هێزەكا باوەرپێكری ژ خەلكێ شنگالێ ئەو ژی ب هەڤكاری دگەل هەرێما كوردستانێ و حكومەتا ناڤەندی و جڤاكا نێڤ دەولەتی و نافخۆیی داكو ئارامی ل دەڤەرێ بەلاڤ بت داكو شنگال ژ كۆمكووژیان یە پاراستی بت.
تُتاح هذه الصورة أيضا في: کوردی