بنگەهێ لالش شەمالكا 28ێ ڤێخست
ئلیاس نعمۆ خەتاری
هەر جیەكێ خزمەتێ بكت د دەمەكێ درێژدا هەلبەت دێ خزینەكا مەزن ل باوی جی پەیدابت ژ وان ژی چالاكی و كارێن رەوشەنبیری و كۆمەلایەتی ، هەلبەت هەر دەمەكی و وەختەكی كاودانێن خۆ یێن هەین، بنگەهێ لالش ئێكە ژوان دەزگەهێن هەری مەزن و كاری یە ب درێژیاهیا (28) سالێن بۆری دا خزمەتەكا مەزن پێشكێشی ئێزدیان بكت،بنگەهێ لالش هەر دێ مینت ئەو كانیا زەلال یا دهورتە د رووبارێ رەوشەنبیریا كوردی دا.
(28)سال دەربازدبن بسەر دامەزراندنا بنگەهێ لالش یێ رەوشەنبیری و جڤاكی كو پرە ژ خزمەت و خەباتا بەردەوام و چالاكێن هەمەجۆر ،خزمەتا ئالیێ ئێزدیاتیێ و رەوشەنبیری و كۆمەلایەتی وسیاسی و دگەل هەموو ئالیێن دن، وەكو هەموو جاران دئێتە خویاكرن بنگەهێ لالش هاتە ئاڤاكرن لسەر دەستێ ژمارەیەكا كەسێن رەوشەنبیرێن ئێزدیان ب پشتەڤانیا حكوومەتا هەرێما كوردستانێ و هزرەكا مەزن بوو و ئێكگرتنەكا هەرە باشبوو ژبۆ ئێزدیان و ئێزدیاتیێ د چارچۆڤێ كوردایەتی و كوردستانێ دا ، ل دەمێ هاتیە دامەزراندن ل(12/5/1993)ێ ل دهۆكا داسنیا،دامەزراندنا بنگەهێ لالش پێنگاڤەكا مەزن بوو بۆ مللەتێ ئێزدی دچارچۆڤێ رەوشەنبیریا كوردی دا، هەر دیسان وەكو دئێتە خویاكرن ل دەمێ دامەزراندنا بنگەهێ لالش ژمارەكا گەلەك كێم ژ ئێزدیان سەر ب حكوومەتا هەرێما كوردستانێ ڤە بوون، ل وی دەمی ژمارا هەرە مەزن ژ ئێزدیان لژیر دەستێ رژێما شۆڤێنیا بەعسی بوون ، پشتی حكوومەتا بەعس ژناڤچۆیی، داخواز وپێتڤیێن هەر یێن مەزن یێن ئێزدیان ژمارەكا زۆر باش یا تایی ونڤیسینگەهێن لالش ل دەڤەرێن ڤەقەتیایی ژ كوردستانێ هاتنە ڤەكرن ب مەرەما پێشكێشكرنا خزمەتا رەوشەنبیری وكۆمەلایەتی وجڤاكی بۆ خەلكێ دەڤەرێن ئێزدینشین و ژبۆ ئەنجامدانا چالاكیێن هەمەجۆر كو خزمەتا ئێزدیان دابوون و بەردەوامن.
پشتی نەمانا زولم و زۆرداریێ لسەر خەلكێ مە ل دەڤەرێن ئێزدیان، دیسان نائێتە ژبیركرن پشتی جێنوسایدكرنا ئێزدیان ل(3/8/2014)ێ و كەفتنا زۆربەیا دەڤەرێن ئێزدیان ب تایبەت ل شنگالا بریندار ژێر دەستێ رێكخراوا تیرۆرستیا داعش، هەردیسان دەستەیا بلند یا بنگەهێ لالش ب هەموو تایی و نڤیسینگەهێن خۆڤە رابوون ب پێشكێشكرنا هەموو جۆرێن خزمەتان بۆ ئاواران ژ دابینكرنا جی و پەیداكرنا نان و ئاڤ وخوارنێ، ژئالیەكێ دن ڤە بنگەهێ لالش رابوویە ب نڤیسین و دكیۆمێنتكرنا هەر تشتەكێ گرێدایی ب جینۆسایدا ئێزدیان و ژبلی چیرۆك وگۆتار وهۆزان و شعر ب نڤیسینێن جۆرا وجۆر هەتا ئیرۆ لسەر جینۆسایدا ئێزدیان بەردەوامن ب كار و خەبات و جۆرێن چالاكیان ، و خالەكا دن ژی ئەوە كو بنگەهێ لالش بەردەوام خزمەتا قوتابێن ئێزدی كریە هەر ژڤەگوهاستنا وان ژ مووسل وباژێرێن دن بۆ زانكۆ و پەیمانگەهێن هەرێما كوردستانێ و هەتا ئیرۆ رۆژ ژی دبەردەوامن دگەل قوتابیان و رێڤەبرنا كاروبارێن خووندكارێن ئێزدیان.
هەروەسان جۆرەها ڤیستەڤالێن رەوشەنبیری وخۆلێن فێركرنێ وتێگەهشتنێ ل هەموو دەمان بنگەهێ لالش و تایی و نڤیسینگەهێن ب سەرڤە ڤەكرینە ، ل ڤێدەر دڤێت رۆلێ مەزن یێ بنگەهێ لالش چ جاران نەئێتە ژبیركرن و دڤێت خزمەت و خەباتا وان بەرچاڤ بێتە دیاركرن،ژبەركو بەردەوام د خزمەتا ئێزدیان دایە و كار لسەر ناسینا ئاینێ ئێزدیان دكت بۆ تەمامیا جیهانێ.
بنگەهێ لالش كەلەپۆرێ باب وكالا وفلكلۆرێ ئێزدیان هەردەم پاراستی یە و پێشڤەبریە، هەر دیسان دەرئێخستن و بەلاڤكرنا گۆڤارا لالش و رۆژناما دەنگێ لالش و تۆرا لالش یا ئەنتەرنێتی و چاپكرنا ژمارەیەكا پەرتۆكان و كار وخزمەتەكا بەرچاڤ بۆ ئێزدیان و بەرژەوەندیا گشتی كریە و مفایەكێ مەزن دێ ژ چاپ و رۆلێ بنگەهێ لالش ئێتە دیتن.
تُتاح هذه الصورة أيضا في: کوردی