ئه‌نجومه‌نێ وه‌زيرێن هه‌رێما كوردستانێ ره‌زامه‌ندى دا ل سه‌ر ته‌مامكرنا پرۆژێ قوتابخانا شاريا يا 18‌ پۆلى.

ل رۆژا ئێك شه‌مبوويێ 10ى تشرينا دووێ 2024ێ، بنگه‌هێ لالش ل دهۆكێ رووشنتنه‌كا ڤه‌كرى بۆ ئالان حه‌مه‌ سه‌عيد، وه‌زيرێ په‌روه‌ردێ ل حكومه‌تا هه‌رێما كوردستانێ سازكر و تێدا ل گه‌ل ڕێڤەبەر و سه‌رپه‌رشتيار و مامۆستايێن پەروەردەیێن شنگال و شێخان و تلكێفێ كۆمبوو.

دكۆمبوونێ دا وه‌زيرێ په‌روه‌ردێ ژنێزيك ڤه‌ گوهداريا پێشنيار و داخوازيێن رێڤه‌به‌ر و مامۆستايان كر.

يه‌ك ژ داخوازيێن رێڤه‌به‌ر و مامۆستايێن شاريا، ته‌مامكرنا پرۆژێ قوتابخانا شاريا يا 18 پۆلى بوو ل گوندێ خه‌رشه‌نيا.

ئيرۆ 13ى تشرينا دووێ 2024ێ، ئه‌نجومه‌نێ وه‌زيرێن هه‌رێما كوردستانێ نڤيساره‌ك ئاراستەی پارێزگه‌ها دهۆكێ كر، ب مەبەستا ته‌مامكرنا پرۆژێ قوتابخانا كۆمه‌لگه‌ها شاريا يا 18‌ پۆلى.

حكومه‌تا هه‌رێمێ كوژمێ كوژمێ 710 مليۆن ديناران بۆ ته‌مامكرنا پرۆژه‌ى ته‌رخانكريه‌.

ب ته‌مامكرنا ڤێ قوتابخانێ فشارا زۆريا قوتبيان ل قوتابخانێن كۆمه‌لگه‌هێ دێ كێم بت و ل پشكه‌كا قوتابخانان دوو ده‌وامى نامينت.

ل سالا 2012 به‌رێ بنياتى بۆ ئاڤاكرنا قوتابخانا ناڤبرى هاته‌ دان و ده‌ست ب پرۆژه‌ى هاته‌ كرن،لێ ژئه‌گه‌رێ قه‌يرانا دارايى يا هه‌رێما كوردستانێ ڤه‌گرتى پرۆژه‌ نيڤه‌رۆ مايه‌.

پشتى هاتنا رێزه‌يه‌كا زۆرا ئاواره‌يێن شنگالێ بۆ كۆمه‌لگه‌ها شاريا ل سالا 2014 فشاره‌كا زۆر يا قوتابيان ل سه‌ر قوتابخانێن شاريا په‌يدابوويه‌.