تۆرا لالش
سه‌رۆك مه‌سعود بارزانی ئیرۆ ل رێكه‌فتی 31ێ كانوونا ئێكێ 2024ێ، په‌یامه‌كا پیرۆزباهیێ ب هه‌لكه‌فتا سه‌رێ سالا نووی یا زایینی یا 2025 به‌لاڤكر.
د په‌یاما خۆدا، سه‌رۆك بارزانی گه‌رمترین پیرۆزباهی ل هه‌ڤوه‌لاتیێن خۆشتڤی یێن كوردستانێ كر و پیرۆزباهی ل مالباتێن سه‌ربلند یێن شه‌هیدان و پێشمه‌رگه‌یێن قاره‌مان كر و هیڤیا خێر و خۆشیێ بۆ هه‌می لایه‌كی خواست.
سه‌رۆكی دیاركر كو جهێ خۆشحالیه‌كا مه‌زنه كو هه‌لبژارتنێن په‌رله‌مانێ كوردستانێ ل ئۆكتۆبه‌را بۆری ب سه‌ركه‌فتی هاتنه ئه‌نجامدان و گه‌لێ كوردستانێ په‌یام و ڤیانا خۆ ب زه‌لالی گه‌هاند، هه‌ر ل سه‌ر ڤی بنگه‌هی ژی دڤێت به‌رسڤا ده‌نگ و داخوازێن خه‌لكێ كوردستانێ بهێته دان، ئه‌وژی ب رێكا پێكئینانا هه‌رچی زووتر یا كابینا ده‌هێ یا حكومه‌تا هه‌رێما كوردستانێ.
د په‌یامێدا هاتیه كو پێدڤیه د چارچۆڤه‌یێ ده‌ستور و رێككه‌فتنان و ب رێكا دیالۆگ و هه‌ماهه‌نگیا ناڤبه‌را حكومه‌تا عیراقا فیدرال و حكومه‌تا هه‌رێما كوردستانێ، كێشه‌یێن ناڤبه‌را هه‌ردو لایان بهێنه چاره‌سه‌ركرن و چ ئاسته‌نگ بۆ مافێن خه‌لكێ كوردستانێ نه‌هێنه دروستكرن.
سه‌رۆك بارزانی ئاماژه ب ره‌وشا هه‌ستیار یا ده‌ڤه‌رێ كر و گۆت كو روودان و گوهۆرینێن سوریا كاریگه‌ری ل سه‌ر ره‌وشا ده‌ڤه‌رێ و هاوكێشه‌یان دكه‌ن، لێ د هه‌مان ده‌مدا ده‌رفه‌ته‌كا نوو یه بۆ گه‌لێن سوریا كو ب رێكا دیالۆگ و تێگه‌هشتنێ بنگه‌هه‌كێ قایم بۆ پێكڤه‌ژیان و ئاشتی و سه‌قامگیریێ ئاڤابكه‌ن.
د داویا په‌یامێدا، سه‌رۆك بارزانی ژ خودایێ مه‌زن خواست كو گه‌لێ مه ژ هه‌می جۆرێن نه‌خۆشی و نه‌هامه‌تی و كاره‌ساتان دوور بن.
تُتاح هذه الصورة أيضا في: کوردی
