ئاشكەراكرنا رێیێن قورتالبوونا گرتیێن ئێزدی دتۆرێن جڤاكی دا كارتێكرنێ ل ژیانا یێن مای دكت
دەنگێ لالش،خێرهات
بێدرڤان
بەلاڤكرنا دەنگوباسێن رزگاركرنا گرتیێن ئێزدی ژ دەستێ داعشێ دتۆرێن جڤاكی دا و ئاشكەراكرنا رێیێن پێ قورتال دبن كارتێكرن ل سەر ژیانا گرتیێن ماین دبت،داخواز دئێتە كرن حكوومەتا هەرێمێ و دەولەمەندێن هەموو ئۆل و نەتەوێن كوردستانێ ورێكخراو سندۆقەكا تایبەتا كۆمكرنا دراڤی ب دانێن و رێكە چارەیەكێ بۆ ئازادكرنا كچ و ژنێن ئێزدی ببینن.
(رەوشەن دەخیل) وەك كچەك خویاكر،هەموو دەما چاڤەرێی مزگینیێن سەركەفتنێن پێشمەرگەی وئازادكرنا جهێن ژێر كۆنترۆلا داعشێ داینە بێنە رزگاركرن،ژبۆ وێ یەكێ كو ئەو گرتیێن ئێزدی بێنە ئازادكرن،هیڤیدارم دەولەمەندێن مە ژهەموو ئۆل و نەتەوا دەستێ خۆ بكەنە تێكدا و هەر ئێك كوژمەكێ دراڤی بدەت ورێكخراو ژی ب ئەركێ خۆ رابن و سندۆقەكا تایبەت بێتە دانان وحكوومەت ژی دراڤی تەرخان بكت و كوردێن مە یێن ل ئەوروپا ئەو ژی دراڤی كۆم بكن،كو ب ڤێ پێنگاڤێ ئەو گرتیێن ماین دێ ئێنە ئازادكرن ژ دەستێ تیرۆرستان.
رۆژنامەڤان(سەباخ زهێر)دیاركر،مەترسیەكا مەزن ل سەر وان كچێن كوردێن ئێزدی ددەستێن داعشێ دا هەیە ،چنكو دبت ئازادكرنا مووسلێ یا نێزیك بت وئەڤ دەنگۆیە دێ كارتێكرنێ ل سەر وان كچان هەبت یێن ددەستێن داعشان دا،چنكو دبت وەك بەرسڤدانەك بۆ دوژمنێ تیرۆرێ ئەو هەر تشتەكێ دەربارەی وان كچێن كوردا بكن،لەوما دڤێت حكوومەتا هەرێمێ و حكوومەتا فیدرال كار ل سەر ڤێ چەندێ بكن رێكە چارەیەكێ ببینن ب تایبەت حكوومەتا فیدرال خۆ بەرپرس ببینت،ژبەركو شنگال سەرب ئیدارا وێ ڤەیە،هەروەسا جڤاكێ نێڤ دەولەتی هەولێن جدی بكت ژبۆ ئازادكرنا وان كچا،چنكو داعش مەترسیە ل سەر هەموو جیهانێ ودژی مرۆڤایەتیێ نە،لەورا هەر ژ زوو ئەڤ كچە بێنە ئازادكرن بەری تاوانێن مەستر ب سەرێ وان بێن.
هۆنەرمەند(جۆڤان حەسەن) دبێژت:ئەڤە دوو سال دەربازبوون و هێشتا گرتیێن ئێزدی نەهاتینە رزگار كرن ژ دەستێ تیرۆرستێن داعشێ،دخوازم حكوومەتا فیدرال و هەرێما كوردستانێ دەستێ خۆ بكەنە ئێك و دراڤی خرڤە بكن و ب ڤێ یەكێ دێ كارن وان گرتیێن ماین قورتال بكن.
میدیاكار(بیرس ئامێدی)دیاركر،پێتڤیە ل سەر حكوومەتێ و هەموو لایەنێن شۆلەژێ ب گەرمی ل ڤی بابەتی بنێرن و هەموو وەلاتێن جیهانێ هایدار بكن،ژبۆ رزگاركرنا وان گرتیێن كوردێن ئێزدی یێن هەتا نۆكە ددەستێ تیرۆرستێن داعشێ دا ماین ،ل ڤێدەرێ دبتە جهێ پرسیاركرنێ ئایا چما هەتا ڤێگا ب چ رێیێن دبلوماسی ئەڤ كچە نەهاتینە ئازادكرن،دژیێ هەموو مللەتێ كوردە و هەموو ئۆل و نەتەوا هەر ژسەردەم وشارستانیەتێن كەڤن ل كوردستانێ پێكڤەژیان و برایەتی هەبوویە و كوردستان لاندكەكە ب دەهان ئۆل و نەتەوە دباوەشا خۆ دا هەلگرتینە،بلا ئەڤە دروشمێ راگەهاندنێ بت ژبۆ ئازادكرنا گرتییان و ل ڤێدەر دێ راگەهاندن رۆلێ ئەكتیڤێ خۆ دیاركت ودێ كارتێكرن و گڤاشتن زێدەتر هەبت،ژبۆ ئازادكرنا وان.
مامۆستایا دەروونی (نازێ رێسان)گۆت:دەمێ كچێن ئێزدی یێن گرتی ژ دەستێ تیرۆرستێن داعشێ دئێنە رزگاركرن ودەمێ نووچەیێ ئازادكرنا وان دتۆرێن جڤاكی دا بەلاڤ دبن،گەلەك كارتێكرن ل وان گرتیێن دی دبت یێن ددەستێ تیرۆرستان دا و ل دەما چارەسەركرنا هندەك رزگاربوویان داخوازكرن ئەڤ چەندە نەمینت،ژبەركو ئەو رێیێن پێ قورتال دبن دئێنە ئاشكەراكرن وكارتێكرن ل سەر گرتیا دبت،دیسان هەرچەند ریكلام بۆ رزگاركرنا ڤان گرتیا بێتە كرن دتۆرێن جڤاكی دا باشترە وتشتێ هەرێ گرنگ ئەوە جڤاكێ مە پتر گرنگیێ ب ڤان گرتی ورزگاربوویان بدەن.
تُتاح هذه الصورة أيضا في: کوردی