دەست ب ئاڤەدان و نووژەنكرنانیشانگەه و مەزارگەهێن ئێزدیان ل شنگال و باشیكێ هاتە كرن
تۆرا لالش یا راگەهاندنێ
ل دەڤەرا میزۆبۆتامیا گەلەك پاشماوێن نیشانگەه و جهێن شینوارێن پیرۆز یێن ئێزدییان هەنە،هندەك ژ وان دئاڤەدانن و هندەكێن دی ژناڤ چووینە و نەماینە یان نیشانەكا كێم ژێ ماینە،پشتی رێكخراوا تیرۆرستیا داعشێ نیشانگەه و مەزارگەهێن ئێزدیان ل شنگال و باشیك و بەحزانێ ژناڤ برین و پشتی ئەو دەڤەر هاتینە كۆنترۆلكرن،جارەكا دی دەست ب ئاڤەدان و نووژەنكرنا وان هاتیە كرن.
نڤیسكار و مامۆستا(سەعەد صباح سەعدۆ)دیاركر،هەر ژ كەڤندا ئێزدیان ل وەلاتێ میزۆبۆتامیا ژیان دەربازكرینە و ل دەڤەرێن جودا جودا،چنكو بەلگێن دیرۆكی هەنە كوخۆجهێن وان دەڤەرا ئێزدی بووینە، لێ هندەك ژ وان شینوارێن پیرۆز ماینە و هندەكێن دی ژی ژناڤ چووینە، ئانكو بەلگەیەكا گرنگ هاتییە ژ دەست دان دەربارەی خۆجهێن رەسەن و دێرینێ دەڤەرێ، هەر ژبەر ڤێ چەندێ ئاڤاكرن و نوژەنكرنا نیشانگەهێن ئێزدیان گرنگیەك زۆر هەیە ژلایێ دیرۆكی و جوگرافی ڤە،بەلگە وێ چەندێ د سەلمینت كو ئەڤ دەڤەرێن ئێزدیانە و دێ ناسناما دەڤەرێ ئێتە پاراستن بۆ پاشەرۆژێ، ژلایێ ئۆلی ڤە دیسان گرنگیەك هەرە مەزن هەیە، چنكو وەكو دزانین ئێزدیان ب رێیا چەندین دیاردا كارینە خۆ ب پارێزن هەتا نۆكە مینا سروشت و جەژن و رێ و رەسم…هتد،هەروەها پەیوەندیەك رۆحی هەیە دناڤبەرا كەسێ ئێزدی و وان دیاردا دا، لەورا ب رێیا ئاڤاكرنا وان نیشانگەهان ئەڤ دیاردە دێ دووبارە رێ و رەسم ئێنە گێران و جەژن و هەلكەفت و تواف ئێنە كرن، پەیرەوێن ئەڤێ ئۆلێ پتر دێ كارن بەردەوامیێ ب هەبوونا خۆ بدەن ناسكرن و خویاكرن بۆ خەلكێ دەڤەرێ و جیهانێ،لێ ئەگەر نەئێنە ئاڤاكرن دێ كاریگەریەكا خراب هەبت ل سەر ئۆلا ئێزدیان ل وان دەڤەرا ژ ئالیێ دیرۆكی و جوگرافی و ئۆلی ڤە.
هەروەسا مامۆستا(رێزان شڤان)گۆت:یا فەرە ئەڤ خال ل بەرچاڤ بێنە وەرگرتن،ئێك پۆلینكرن (تصنیف) كرنا جهێن پیرۆز د ڤەكۆلینەكێ دا بێن كرن، داكو هەر جهەكی ناڤێ پیرۆز ل سەر دانن وەكو ( سلاڤگەه، نیشانگەه، خلوتگەه، قوب، مەزارگەه، زێو…هتد)،دوو دانانا پەرژان (سیاج)، رێك و پێك ل دەوروبەری وان. سێ نوژەنكرنا وان ل گۆرەی فەلسەفا دروست یا ئەزدایەتی (رۆژ پەرستیێ)، نەكو شیخادی بۆ نموونە قوب سەرێ سیمبولا رۆژێ یا رۆژ پەرێسیێ یە نەكو هلێل (هلال) شیخادی، چار گرنگیدان ب سروشت ژبەركو سروشت بوویە ژێدەر باوەرا ئەزدایەتی، وەكی دروستكرنا باخ و باخچە و چاندنا دارا و هەبوونا ئاڤێ.
تُتاح هذه الصورة أيضا في: کوردی