ئاوارێن كەمپا بێرسڤێ پێتڤی هاریكاریانە
تۆرا لالش یا راگەهاندنێ/لەیت حسێن
دگەل هاتنا وەرزێ زڤستانێ،ئاوارێن كەمپا بێرسڤێ 2 ل هڤیێ نە پێتڤیێن زڤستانێ بسەر وان دا بێنە بەلاڤكرن داكو پاراستی بن ژ سەرما و بارانێ،رێڤەبەرێ كەمپێ ژی دبێژت ئاوارە پێتڤی هاریكاریانە و دهەفتیا بێت دا گاز دێ لسەر وان ئێتە بەلاڤكرن و هەر خێزانەك دێ(٢٠٠)لێترا بێ بەرامبەر وەرگرت.
ئاوارەكی كەمپا ناڤبری(رۆكان خدر)دیاركر،سەربارەی مال وێرانی و كوشتن وگرتن و دەردەسەریێ و وان ناكۆكیێن ل ڤێ داویێ ل دەڤەرا شنگال چێبووین و ژیانا ئاوارەبوونێ دخیڤەتان دا،ئەڤە وەرزێ زڤستانێ ژی بسەر مە دا هات دناڤ كەمپان دا،دیسان نهۆ رەوشا كارەبا نشتیمانی هەتا رادەكی نەیا باشە و گەلەك كێم دئێت و خەلكێ كەمپێ ل زڤستانێ دا پتر پێتڤی ب كارەبێ نە ب تایبەت ژی بۆ ئالاڤێن گەرمكرنێ لەوا ژ جیێن شۆلەژێ دخوازین گاز و كارەب بۆ مە بێتە دابینكرن و ب زووترین دەم ژیانا زارۆكان و كەسانێن دانعەمر رزگاربكن ژڤێ سەرمایێ كو گوننەهێ وێ ب كەسی نائێت.
ژبال خۆڤە ئاوارە(وەلید شەمۆ)گۆت:تشتێن هەرە سەرەكی و پتر پێتڤی نهۆ بۆ كەمپێ مەحفورێن ئەردی و دۆشەك و بەتەنی و سۆپە و لایلۆنن ژی،داكو بسەر خیڤەتێن خۆ دا بكن و دابینكرنا گازا سپی ژی بۆ خەلكێ ژبەركو چاڤەرێ زڤستانەكا سارن و هیڤیا مە ئەوە ژی كو جلكێن زڤستانێ بۆ زارۆكان بێنە دابینكرن،ژبەركو هندەك خێزان هەنە هەژارن وان شیان نینە بۆ زارۆكێن خۆ تشتێن زڤستانێ یێن پێتڤی بكرن،دیسان دخوازم ئەو خیڤەتێن كو هێشتا نە هاتینە گهۆرین ئەو ژی بێنە گهۆرین داكو ئەڤ زڤستانە خەلكێ ئاوارە ب تەنا و ئارامی دناڤ خیڤەتێن خۆ دا بژین بێی كو هیچ ترسەك د دلێ وان دا بت،ژبەر هاتنە هەوا وبارانێن بۆش و سەرمایێ.
لدۆر رەوشا كەمپێ رێڤەبەرێ كەمپا بێرسڤێ2(ماهر مشۆ چولی)دیاركر،رەوش ب گشتی هەتا رادەكی یا باشە و بەردەوام خزمەتكاریێن جۆرا وجۆر ژلایێ حكومەتا هەرێما كوردستانێ و رێكخراوێن بیانی و ناڤخۆیی ڤە پێشكێشی ئاوارێن كەمپێ دئێنەكرن و هەیڤانە ژی كارتێن بیست هەزار دیناری و كارتۆنێن ساخلەمی بسەردا دئێنە دابەشكرن،د ئەڤ سالە یا وەرزێ زڤستانێ دا( ١١٠٦)خیڤەت هاتینە گهۆرین و خیڤەتێن نوو پێشڤە هاتنە دان و بەرهەڤی دئێنە كرن بۆ وان خێزانێن هاتینە كەمپێ و خێزانێن ژنوو گرێبەستا هەڤژینیێ گرێدایە كو بۆ وان سۆپە وبەتەنی و دۆشەك بێنە دابینكرن،هەروەسا د هەفتیا بێت دا گاز ژی دێ ئێتە بەلاڤكرن و هەر خێزانەك دێ(٢٠٠)لێترا بێ بەرامبەر وەرگرت، بەلێ سەرەرای ڤان خزمەتكاریان ئاوارە هەر پێتڤی هاریكاریانە و ئەو كچ و ژنێن رزگاربووین ژ دەستێ تیرۆرستێن داعش یێن ل كەمپێ ئاكنجی پێتڤی مووچەكێ هەیڤانەنە،دیسان مخابن ئاریشەكا دی كو بەردەوام بەرەڤ زێدەبوونێ یە رێژا بێكاریێ یە و ئاریشێن یاسایی ژی رۆژ بۆ رۆژێ زێدە دبن و دكەرتێ ساخلەمیێ دا گازندێن دەرمانا ژلایێ خەلكێ هەنە و خەلك داخوازا لایلۆنا دكت بۆ خیڤەتێن خۆ.
تُتاح هذه الصورة أيضا في: کوردی