شێخ شامۆ: ئێزدی دترسن ژ پەرلەمانێ بھێنە بێ بەھركرن بەر ھندێ داخازا كۆتا دكن
باسنيوز:
نوونەرێ كوردێن ئێزدی ل پەرلەمانێ كوردستانێ بۆ( باسنیوز) دیار كر: “ئێزدی رژدن ل سەر وەرگرتنا كورسیكا كۆتا ل پەرلەمانێ كوردستانێ ژبەر كو ئێزدی دترسن ل خۆلا بهێـت یا پەرلەمانێ كوردستانێ دەنگیێن ئێزدیان ل هەرێما كوردستانێ تێرا كورسیكەكێ ل پەرلەمانێ نەكەن و ئێزدی ژ پەرلەمانێ بهێنە بێ بەهركرن ژبەر ڤێ چەندێ ئێزدی رژدن بۆ وەرگرتنا كۆتا ل پەرلەمانێ كوردستانێ”.
شێخ شامۆ، سەرۆكێ دەستەیا بلندا بنگەهێ لالش یێ رەوشەنبیری و كومەلایەتی و نوونەرێ كوردێن ئێزدی ل پەرلەمانێ كوردستانێ بۆ (باسنیوز) دیار كر: “ل پەرلەمانێ كوردستانێ 11 كورسی بۆ كۆتا یێن هاتینە دەست نیشانكرن. ئێزدیان ژی ماف یێ هەی كورسیكا كۆتا ل پەرلەمانێ هەبن. نۆكە پرۆژە یێ گەهشتیە سەرۆكاتیا پەرلەمانێ كوردستانێ، ئەم چاڤەرێنە ل روونشتنەكا پەرلەمانێ دا پرۆژە بهێتە خاندن. هەتا نۆكە ژی زێدەتر ژ( 30) پەرلەمانتاران ئێمزا كۆمكرینە بۆ تەرخانكرنا كورسیكا كۆتا ئێزدیان. هەتا نۆكە هەموو فراكسیۆن ژی بەرهەڤن دەنگێ لسەر پرۆژی كۆتا ئێزدیان بدەن. هێشتا چوو فراكسیۆنێن پەرلەمانێ كوردستانێ دژاتیا پرۆژێ ئێزدیان بۆ دانا كۆتا نەكرینە”.
ئاشكرا كر كو: “ئێزدیان لایێ نەتەویی ڤە چوو گرفت نینن، هەموو ئێزدی شانازی ب كوردبوونا خوە دكەن لێ ئێزدی ئایینەكێ جۆدایە ژ ئاین وپێكهاتێن دی. ئەم ب مافێ خۆ دزانین مە ژی كورسیكا كۆتا هەبیت. هەر خۆلا بهێت یا پەرلەمانێ كوردستانێ نوونەرێن ئێزدیان تێدا هەبن”.
ئەوژی گۆت: “هەر دەمێ شنگال و باشیك وبەحزانێ هاتنە باوەشا هەرێما كوردستانێ ل وێ دەمێ ئەم ب 10 كورسیكێن پەرلەمانێ كوردستانێ رازی نابین، دێ داخازا زێدەتر یا كورسیكا كەن. چونكو نۆكە خەلكێ شنگال وباشیك وبەحزانی و خەتاری و سریجكا و دوغاتا و داكا وبابیری وچەندین دەڤەرێن دی یێن ئێزدیان نەشێن دەنگێ خوە بدەنە نوونەرێن ئێزدیان ل پەرلەمانێ كوردستانێ ژبەر ڤێ چەندێ مەترسی ل سەر ئێزدیان دروست بیت بهێنە بێ بەهركرن ژ پەرلەمانێ كوردستانێ. لەورا نۆكە ب رەنگەكێ بەردەوام ئێزدی داخوازا كۆتا ل پەرلەمانێ كوردستانێ دكەن”.
شاندەكێ جڤاتا روحانیا ئێزدیان ژی ب مەبەستا وەرگرتنا كۆتا ئێزدیان ل پەرلەمانێ كوردستانێ یادداشتەك دانە پەرلەمانێ كوردستانێ.
خدر دیر خانەسۆری راوێژكارێ جڤاتا روحانیا ئێزدیان بۆ (باسنیوز) دیار كر: “ئێزدیان داخازا پێنچ كورسیێن كۆتا ل پەرلەمانێ كوردستانێ دكەن ب ڤێ چەندێ ژی شاندەكێ جڤاتا روحانیا ئێزدیان قەستا سەرۆكاتیا پەرلەمانێ كوردستانێ كرینە ویادداشتەك ژی داینە پەرلەمانێ نۆكە هەموو ئێزدی ڤێ داخازێ دكەن چونكو ئێزدی دترسن ل دەنگدانێ دەنگێن ئێزدیان تێرا وێ یەكی نەكەن ئێزدیان نوونەرەك ل پەرلەمانێ كوردستانێ هەبیت ژبەر كو هەبوونا نوونەرەكێ ئێزدیان ل پەرلەمانێ كوردستانێ گەلەك یا گرنگە دڤێ قوناغا نازك وهەستیاردا چونكو ئێزدی پتر ژ هەموویان دئێش وئازارێن خوە دگەهن”.
شێخ شامۆ ئاماژە دا وێ چەندێ ژی كو نۆكە ئێزدی دخوازن كۆتا ل پەرلەمانێ هەبن ئەڤە ب شیوەیەكێ كاتی یە هەردەمێ شنگال و دەڤەرێن داگیركری یێن ئێزدیان هاتنە سەر هەرێما كوردستانێ ڤە ل وێ دەمێ ئێزدیان كۆتا نەڤیت دێ ب دەنگیێن خوە كورسیا ل پەرلەمانێ وەرگرن”.
نوونەرێن كوردین ئێزدی ل پەرلەمانێ كوردستانێ خۆیا ژی كر: “نۆكە پرۆژە بۆ كۆتا ئێزدیان یێ ل پەرلەمانێ كوردستانێ یە، ئەم هێڤی نە دڤێ خولا پەرلەمانێ دا پرۆژە بهێتە پەسەندكرن وئێزدی ببنە خۆدان كۆتا ل پەرلەمانێ كوردستانێ”.
تُتاح هذه الصورة أيضا في: کوردی