ئیدارا نەشەرعی ل شنگال دخوازت شەرعیەتێ وەربگرت
باسنيوز:
سەرۆكێ جڤاتا قەزا شنگال دیار كر گرووپ و لایەنێن سیاسی یێن نەشەرعی ل شنگال شوونا خزمەتكرنێ و ڤەگەریانە ئاواران یێ هەڤركیێ ل سەر وەرگرتنا پۆستێ قایمقامیا قەزا شنگال دكەن.
وەیس نایف، سەرۆكێ جڤاتا قەزا شنگال بۆ (باسنیوز) دیار كر: “ئیدارا نەشەرعی یا نۆكە ل شنگال هاتیە دانان یا كار دكەت كەسەكێ وەكوو وان پۆستێ قایمقامیا شنگال وەربگرت و شەرعیەتێ ژ جڤاتا شنگال وەربگرن. بۆ ڤێ مەرەمێ ژی فشار ل سەر مە هاتە دروستكرن لێ ئەم رازی نابن ب هیچ شیوەیەكێ جڤاتا شنگال شەرعیەتێ بدەتە قایمقامەكێ نە شەرعی چونكو هەكە وان گرۆپ ولایەنێن سیاسی یێن نۆكە ل شنگال بەرژوەندیا خەلكێ شنگال بڤێت دێ بۆ شنگال كاركەن. مخابن ئەو بۆ شنگال كارناكەن بتنێ یێ كارێن خوە و بازرگانیێ ل شنگال ئەنجام دەن”.
خویا ژی كر: “نۆكە دوسیەیا گۆرێن بكۆم وئاڤەدانیا شنگال و ڤەگەریانا ئاواران هەموو یێن هاتینە پشتگوه هاڤێتن ژلایێ گرۆپ ولایەنێن سیاسی یێن نە شەرعی ڤە. ل شنگالێ هەموو ئەو گرۆپ ولایەنێن نە شەرعی یێ كاردكەن كا دێ چەوا پۆستێ قایمقامیا شنگال وەرگرن”.
تُتاح هذه الصورة أيضا في: کوردی