دانووستاندنهكا ڤهكرى ل دۆر(وێنهيێ پێكهاتهيان دڕاگههاندنا كوردى دا،ئێزدى نموونه)هاته ل دارخستن
تۆڕا لالش/دهۆك
ب ههلكهفتا 126ساڵييا ڕۆژا ڕۆژنامهگهريا كوردى و دهركهفتنا ئێكهم ڕۆژناما كوردى،بنگههێ لالش يێ ڕهوشهنبيرى و كۆمهلايهتى ل دهۆكێ دانووستاندنهكا ڤهكرى لژێر ناڤ و نيشانێن(وێنهيێ پێكهاتهيان دڕاگههاندنا كوردى دا،ئێزدى نموونه) بۆ “ڕێبين فهتاح” ڤهكۆلهر و سهرنڤيسهرێ مالپهرێ زێد پرێس ڕێكخست.
دچارچووڤێ پێنج شهما ڕهوشهنبيرى يا هزرى دا،ئيرۆ 25ى نيسانا 2024ێ،ب ئامادهبوونا ڕێزدار”سهعيد جردۆ”سهرۆكێ دهستهيا بلندا بنگههێ لالش و ههژمارهكا كهسايهتى و مامۆستا و ڕهوشهنبيران و ئهندامێن دهستهيێ، دانووستاندنهكا ڤهكرى لژێر ناڤ و نيشانێن(وێنهيێ پێكهاتهيان دڕاگههاندنا كوردى دا،ئێزدى نموونه) هاته ل دارخستن و تێدا “ڕێبين فهتاح” ڤهكۆلهر و سهرنڤيسهرێ مالپهرێ زێد پرێس ڕۆناهى ئێخسته سهر سهرهدهرييا ميديا كوردى ل گهل پێكهاتهيان و ب تايبهت ئێزديان و دياركر پشتى ل ڕۆژا 3/8/2014ێ جينۆسايدا بسهرێ ئێزديان دا هاتى لژێر دهستێ ڕێكخراوا داعش يا تيرۆرستى دهركهفتنا ئێزديان بهرفرههى ل ناڤا ميديا كوردى دا دهركهفت و ڕاگههاندن بوو مينبهرهكێ باش بۆ گههاندنا دۆزا ئێزديان و ڕۆلهكێ بهرچاڤ ههبوو بۆ پشتهڤانى يا نێڤ دهولهتى بۆ كهيسا جينۆسايدێ.
ئاماژه ب وێ چهندێ دا دهزگههـ و كهنالێن ڕاگههاندنێ يێن كوردى ل گۆڕهى سياسهتێن خۆ سهرهدهريێ ل گهل دۆزا ئێزديان دكهن و جاران ڤێ دۆزهيێ بۆ هندهك مهرهمان بكاردئينن،لهوا ئيرۆ يا گرنگه دڤێ قۆناغێ دا ئێزديان كهنالهكێ خۆ يێ تايبهت ههبت و ئێزدياتى و ئێزديناسيێ بۆ جڤاكێ كوردستانى و جيهانى بدهنه ناسين.
لدووڤدا دهرگههێ دانووستاندنێ دناڤبهرا ئامادهبوويان دا هاته ڤهكرن و چهند پرسيار ئاڕاستهى ناڤهاتى هاتن كرن و بهرسڤ ل سهر ههموويان هاته دان.
ژئاليێ خۆ ڤه سهعيد جردۆ،سهرۆكێ بنگههێ لالش باس ل گرنگيا ئهنجامدانا ڤان جۆره بزاڤێن ڕهوشهنبيرى و سوپاسيا ئامادهبوويان كر كو ئهڤ ڕوونشتنه ب بير و بۆچۆنێن خۆ بتر دهولهمهندكرن و دياركر ئهڤ جۆره چالاكى دێ دبهردهوام بن.
تُتاح هذه الصورة أيضا في: کوردی