گەلكوژیا شەنگالێ د ئەدەبیاتێ دا و كاریگەرییا كێم
سەكارێ ئاوارە
دگەلكوژیا ئێزدیان ل شەنگالێ هەرتشت قەومی و ئێزدی بوونە زەرەرمەندێن یەكەمین ژ گشت ئالیانڤە ، گشت بنەمایێن مڕۆڤاتیێ ل شەنگالێ ژ ناڤچۆن و تەرۆریستێن هۆڤ وەحشیگەرانە تاوانێن جەرگبڕ و نەعەقلانی د دەرهەقا ئێزدیێن بێ گونەهـ ئەنجامدان و سەدان هەزار قوربانی ل پێ خۆ هشتن .
پشتی گەلكوژی و جینۆسایدا ل شەنگالێ قەومی، نڤیسكار، ڕۆماننڤیس و شاعران هەر تەخەكێ ژ ئالیێ خۆڤە بەرهەم لسەر كۆمكوژی و گەلكوژیا ئێزدیان ل شەنگالێ نڤیسین بگرە ژ شعر ، پەخشان ، چیرۆك و ڕۆمان ب تایبەت ب زمانێن كوردی و عەرەبی ، ئەڤ چەندە بوو ئەگەر ئەو گەلكوژی دەنگڤەدەت ل ناڤخۆ و دەرڤە ، لێ نە ب قەبارێ مەزنیا گەلكوژیێ بوون ئەڤەژی جهێ داخێ یە ، فەرە بتر گرنگی ب ڤێ نەهامەتیێ بێتە دان ژ بەر دیرۆكێ دا وەك گەلكوژییێن دی بێ بها و بنەما نەبن.
ئێزدیان د دیرۆكێ دە ژ هەر مللەتەكی بتر زۆڕداری و فەرمان ب سەری هاتنە ب سووچداریا ئۆلی ( ئێزدیاتی) و نەتەوێ (كورد ) ب دیتنا من بەهرا بتر ل بارێ ئۆلێ بوون و نەدهشتن ئێزدی ل ریا خۆ یا ڕاست بمەشن و ب دارێ زۆرێ ڕاستی ئۆل گوهەرین و جینۆسایدێن بەردەوامبوون ، لێ د گشت فەرمانان دە ئێزدیان بەرەڤانی ژ ئۆل و ئاخا خۆ كرینە و داستانێن قارەمانەتیێ د دیرۆكێ دە نڤیسینە ، ژبەر هندێ دڤێت جینۆسایدا ئێزدیێن شەنگالێ ب شێوەكێ ئەكادمی بێتە دكیۆمێنتكرن و بەڵگە بێنە پاراستن ، نڤیسكار ژی دڤێت ب بەرهەمێن خۆ پاراستنێ ل ڤێ ڕوودانا دیرۆكی یا قیزەون بكەت لەو فەرە دەزگەهەك چاپدانا پەرتووكێن ل بارێ گەلكوژیێ دێنە نڤیسین ب كارێ خۆ بزانت چ شعر ، چیرۆك ، ڕۆمان و … هتد بن ، ب دیتنا من تۆڕێن كۆمەلایەتی نەبەسن تنێ ژ بەلاڤكرنێ ڕە ، پەرتووك پێویستن ژ بەڵگەیێن حاشاهەڵنەگر ڕە ، ئەو بەرهەمێن نهۆ ل بەردەست كێمن و ل دووڤ قەبارێ گەلكوژیێ ناگونجن و پێویستە بەردەوام بەرهەم بێنە نڤیسین هەكەر نە ئەڤ جینۆساید دێ ئێتە ژبیركرن.
تُتاح هذه الصورة أيضا في: کوردی