WAAR-دهۆك:

سه‌رۆكێ هه‌رێما كوردستانێ راگه‌هاند؛ نابیت هه‌رێما كوردستانێ د ئیراقه‌كا ئێكگرتی دا بمینین و رۆژانه‌ كێشه‌ مه‌زنتر ببن، له‌و ریفراندۆم دێ هێته‌ كرن و ب دانوستاندن دگه‌ل به‌غدا، ئه‌نجامێن وێ دێ هێنه‌ بجهئینان.

مه‌سعوود بارزانی سه‌رۆكێ هه‌رێما كوردستانێ، ئه‌ڤرۆ ل هه‌ولێرێ، دگه‌ل كه‌سایه‌تیێن جڤاكی و ئه‌كادیمی و سه‌رۆك هۆزێن ئه‌ره‌بێن پارێزگه‌ها نه‌ینه‌وا و مه‌خموورێ كۆمبوو و باس ل ریفراندۆما سه‌رخوه‌بوونا كوردستانێ و ئاماده‌كاری و پشكدارییا خه‌لكێ ده‌ڤه‌رێن نوو رزگاركری د ریفراندۆمێ دا كر‌ن و بارزانی دا زانین: هه‌رێمێ یا لسه‌ر ملێن خوه‌ بۆ ئاڤاكرنا ئیراقێ و نڤێسینا دستوورێ وێ كر، لێ ده‌ستهه‌لاتدارێن ئیراقی، نه‌شیان شه‌راكه‌تێ بجهبینن و بڕیارا بڕینا قۆتێ خه‌لكێ كوردستانێ دا.

سه‌رۆك بارزانی دوپاتكر كو فه‌رهه‌نگا گه‌لێ كوردستانێ، فه‌رهه‌نگا پاراستنا كه‌رامه‌تا مرۆڤی یه‌ و ل دژی جوداكارییا دناڤبه‌را پێكهاته‌یێن ئۆلی و نه‌ته‌وه‌یی دانه‌ و داخواز ژ عه‌ره‌بێن وان ده‌ڤه‌ران كر، ب ئازادانه‌ د ریفراندۆمێ دا پشكدارببن و ئێدی ئه‌و چ بریاره‌كێ بده‌ن، ئه‌و بریار دێ هێته‌ بجهئینان.

سه‌رۆكێ هه‌رێمێ خویاژی كر، چاره‌نڤیسێ هه‌موو ئالییان یێ هه‌ڤپشكه‌ و پێدڤییه‌ كاره‌كێ رژد بۆ پاراستنا ئێمناهییا ده‌ڤه‌ری بهێته‌ كرن و رێ ل دووباره‌ سه‌رهلدانا گرۆپێن تیرۆری بگڕن.