نێچیرڤان بارزانی ل دۆر ھێرشا پردێ داخوازیەکا بلەز ژ هەڤپەیمانان کر
گاڤ نیوز
سەرۆکێ ھەرێما کوردستانێ داخوازا دروستکرنا ھێزەکا ھەڤپشک بۆ رێگریکرنێ ل بھێزبوونا داعشێ ل سنۆرێن ناڤبەرا پێشمەرگەی و سوپایێ ئیراقێ کر و راگەهاند: داعش مەترسیە بۆ سەر هەمی جیهانێ.
شەڤا بۆری تیرۆرستێن داعشێ ژ سێ ئالیان ھێرشی ھێزێن پێشمەرگەی کر و شەڕەکێ دژوار پەیدا بوو، ھێزێن پێشمەرگەی شەھید و بریندار ژی هەنە.
ئەو هێرش ب ھاون، بیکەیسی و کلاشینکۆفان ھاتیە کرن و ب توندی ژ ئالیێ ھێزێن پێشمەرگەی ڤە بەرسڤا وان ھاتیە دان و ھێرش ھاتیە تێکشکاندن.
ل گۆری وەزارەتا پێشمەرگەی، ھێزێن پێشمەرگەی کەفتینە ئامادەباشیێ و دوپاتکریە، داعشێ ئەو ڤالاھیا ئێمناھیێ کریە ئارمانج یا د ناڤبەرا ھێزێن پێشمەرگەی و سوپاێ ئیراقێ دا دروست بووی.
نێچیرڤان بارزانی، سەرۆکێ ھەرێما کوردستانێ د پەیامەکێ دا راگەھاند: شڤێدی تیرۆرستێن داعشێ ل میحوەرێ رۆژئاڤا کەرکووکێ ل نێزیک گوندێ قایەباشی ل سنۆرێ پردێ ھێرش کریە سەر ھێزێن پێشمەرگەی، ژ ئەنجامێ وێ ھێرشێ سێ پێشمەرگە شەھید بووینە.
دیارکرژی، چەندین جاران حکومەتا ئیراقێ و ھەڤپەیمان ل سەر بھێزبوونا داعشێ و مفا وەرگرتن ژ وێ ڤالاھیا ئێمناھیێ ل سنۆرێ ناوچەیێن کێشە ل سەر ھاتینە ئاگەھدارکرن.
نێچیرڤان بارزانی، د پەیاما خۆ دا داخواز ژ پەڕلەمان، حکومەتا فیدرال و ھەڤپەیمانیا نێڤدەولەتی یا دژی داعشێ کر ب لەز کار بۆ دروستکرنا ھێزەکا ھەڤپشک د ناڤبەرا ھێزێن پێشمەرگەی و سوپایێ ئیراقێ دا ل وان ناوچەیان بکەن، بۆ وێ یەکێ ئەو ناوچە نەبیتە جھێ لڤینێن تیرۆرستان و ژ ئالیێ داعشێ ڤە نەھێتە ب کار ئینان و داعش ب مەترسییەکا مەزن بۆ سەر ھەرێما کوردستانێ، ئیراقێ و ناوچێ و جیھانێ ژی ناڤکر.
گۆتژی: ھەرێما کوردستانێ ئامادەیە بۆ ھەر جۆرە ئامادەباشیەکێ بۆ دروستکرنا ھەڤکاریەکا ب لەز بۆ نەهێلانا وێ مەترسیێ.
تُتاح هذه الصورة أيضا في: کوردی