ئەندامەکێ کۆمیتا ناڤەندییا پارتی: دێ دەنگەکێ زۆر ل شنگالێ ئینین
باسنيوز:
یاریدەدەرێ مەکتەبا رێکخستنا پارتی ل نەینەوا راگەهاند، هەتا نوکە ئاریشە بۆ مە چێنەبوویە و د بانگەشێن مەدا بەردەوامین، بەلێ ژبەر بجهنەئینانا رێککەفتنا شنگالێ، رەنگە نەشێین ل ویرێ وەکە پێتڤی بانگەشێ بکەین.
نازم هەرکی، ئەندامێ کۆمیتا ناڤەندی و یاریدەدەرێ بەرپرسێ مەکتەبا رێکخستنا پارتی ل نەینەوا، بۆ (باسنیوز) راگەهاند: ”بانگەشێن مە ل سنوونێ بەردەوامن بەربژێرێن مە بێ ئاریشە کارێن خۆ دکەن، بەلێ بۆ شنگالێ جارێ نزانم بەربژێرێن مە ل ویرێ دشێن بانگەشێ بکەن، یان ژی نە، ژبەرکۆ هێشتا رێککەفتنا شنگالێ بجهنەئینایە و بارەگایێن مە ل وی سنووری نەهاتنە ڤەکرن.”
وی بەرپرسێ پارتی گوتژی: ”مە 52 بەربژێر ل سنوورێ نەینەوا هەنە، کۆ 22 بەربژێر دکەڤنە سنوورێ قەزا شنگالێ، مە رێکخستن و جەماوەرەکێ زۆر باش ل شنگالێ هەیە، د هەڵبژارتنا 2021 مە هەر چار کورسی بدەستخستن.”
ئەو ژی دیارکر: ”پارێزگەها نەینەوا بۆ ڤێ هەڵبژارتنێ ئێک بازنەیە، ژبەرکۆ بەربژێرێ شنگالێ دشێت ل مەخموور و دەڤەرێن دی ژی دەنگان بینیت، یان بەربژێرێن نەینەوا دشێن ل هەر جهەکێ دی دەنگان بینن، ئەڤە ژی ئاسانکارییەکا باشە بۆ هندێ کۆ دەنگێن وان نەهێنە سووتن.”
تُتاح هذه الصورة أيضا في: کوردی