وەزیرێ باژێرڤانیێ: دابەشكرنا عەردی ب سەر فەرمانبەران ل بەرژەوەندییا گشتی یا ولاتیانە
باسنيوز:
وەزیرێ باژێرڤانی و گەشتوگوزارێ دەربارێ بلەزکرنا ڕێکارێن دابەشکرنا عەردی دێ دگەل هەمی باژێرڤانیان کۆم بیت و راگەهاند: “پێتڤیە ل سنوورێ باژێرڤانییان عەرد بۆ فەرمانبەران بهێتە دابین کرن و ئەو باژێرڤانیێن كۆ عەرد نینە ل جهەکێ دی دابین بكەن.”
د راگەهاندنەکێدا وەزارەتا باژێرڤانیێ بڵاڤکر، ئەڤرۆ ئێکشەمبی 19/5/2024، ب سەرپەرشتیا ساسان عەونی، وەزیرێ باژێرڤانی و گەشتوگوزارێ و ب بەرهەڤبوونا شیرەتکار و ڕێڤەبەرێن نەخشەدانانا ئاڤەدانی و یاسایێ ل وەزارەتا باژێرڤانی و گەشتوگوزار و رێڤەبەرێن گشتیێن باژێرڤانیان و سەرۆكێن باژێرڤانیێن هەمی پارێزگەهـ و ئیدارێن سەربەخۆیێن هەرێما كوردستانێ كۆمبوونەكا تایبەت ب ڕێكارێن دابەشكرنا عەردی برێڤەچوو.
ئاماژە بۆ وێ ژی كر، د كۆمبوونێدا دیفچوون بۆ كارێن پرۆسا دابەشكرنا عەردی كر، كۆ د چەند ڕۆژێن بهێنڤەدانێدا ژ لایێ وەزارەتا باژێرڤانی و گەشتوگوزارێ داخواز ژ هەمی باژێرڤانییان كربوو دەست ب ڕێكارێن پرۆسێ بكەن و لسەر نەخشەی، عەردێن پێشنیارکری دەستنیشان بكەن دگەل دیاریكرنا ئاریشە و گرفتێن وان.
ئەو ژی ئاشكرا كر، ئەڤرۆ هەمی باژێرڤانیان نەخشێن خۆ ڕادەستێ وەزارەتا باژێرڤانی و گەشتوگوزارێ كرن.
هەروەسا ئەو ئاریشێن د پرۆسا دابەشكرنا عەردیدا دکەڤنە بەرامبەر باژێرڤانییان و بابەتێ دابینكرنا عەردی و كوژاندنا عەردی و بەرفرەهکرنا ماستەرپلانا هندەك ل باژێرڤانییان گوتوبێژکرن.
د راگەهاندنێدا ئەو ژی هاتیە، كۆ ساسان عەونی، وەزیرێ باژێرڤانی و گەشتوگوزارێ د پشکەکا ئاخفتنێن خۆدا، تەکەز لسەر جدیەتا حكوومەتا هەرێما كوردستانێ ل دابەشكرنا عەردی كر و ئاماژە بۆ وێ كر: “پێتڤیە ل سنوورێ باژێرڤانییان عەرد بۆ فەرمانبەران بهێتە دابین کرن و ئەو باژێرڤانیێن كۆ عەرد نینە ل جهەکێ دی دابین بكەن.”
هەروەسا وەزیرێ باژێرڤانیێ تەکەز ژی لسەر دیاریكرنا ستافەكێ تایبەت ل باژێرڤانیان بۆ ڕووپێویكردنا عەردی و پرۆسێ كر و ئاماژە بۆ وێ كر: “دابەشكرنا عەردی د بەرژەوەندییا گشتییا ولاتییانە و پێتڤیە ئەو پرۆسە بلەز و ب ڕێكوپێكی برێڤە بچیت.”
تُتاح هذه الصورة أيضا في: کوردی