بنگەهێ لالش دیرۆكەكا درێژ و خەباتەكا بەردەوام
خالد خدر 
ل دیرۆكا نێزیك ئێزدی ژی مینا هەموو پێكهاتەیێن دی یێن كوردستانێ تووشی ستەم وستەمكاریێ بووینە لسەر دەستێ داگیركەرێن كوردستانێ ، سۆپاس بۆ خودێ ل بەهارا سالا 1991ێ ل دەمێ سەرهلدانا پیرۆزا گەلێن كوردستانێ ل دژی ستەمكاریا رژێما دیكتاتۆریا بەعسا گۆربەگۆر ، ئێزدیان ژی مینا تەڤایا گەلێ كوردستانێ بایێ ئازادیێ هەلكێشا و ب ئارامی و تەناهیا كوردستانێ شاد بوون ، د وی كەش وهەوایێ ئازاد دا بنگەهێ لالش یێ رەوشەنبیری و كۆمەلایەتی ل دهۆكا داسنییا هاتە دامەزراندن ، ب دەستپێشخەری و پیرۆزباهیا سەركردایەتیا كوردستانێ یا گرێدایی كەسایەتییا رێزدار (مەسعوود بارزانی ) سەرۆكێ هەرێما كوردستانێ ، ولسەر دەستێ ژمارەكا بەژارە ژ شاكارێن رەوشەنبیریا ئێزدیاتیێ وكوردینیێ ل هەرێما كوردستانێ.
دامەزراندنا ڤی بنگەهی خەون و ئۆمێدەكا كەڤن ودێرینا ئێزدیان ب گشتی و تەخا رەوشەنبیرا ب تایبەتی ، ئەو بوو ل رۆژا 12/5/1993 ئێكەمین بنگەهێ رەوشەنبیری و جڤاكییێ تایبەت ب ئۆلا ئێزدیان ڤە هاتە دامەزراندن و رۆناهی دیت ، ژدایك بوونا بنگەهێ لالش وەرچەرخانەكا دیرۆكی و گرنگ بوو د ژیانا ئێزدیان دا ، كو بۆ جارا ئێكێ بوو بنگەهەك بۆ ئێزدیان بهێتە ڤەكرن د دیرۆكێ دا ، هەژی یە بێژین كو بنگەهێ لالشی دڤان سالێن بۆری دا خزمەتەكا بەرچاڤ پێشكێشی جڤاكێ ئێزدیان كریە د وارێن رەوشەنبیری وجڤاكی دا، و ئەڤ خالێن ل خوارێ دیار هەژی باس كرنێ نە دەربارەیی خزمەتا بنگەهێ لالش یێ رەوشەنبیری وكۆمەلایەتی ل دهۆكێ : – 1- خرڤەكرنا زۆربەیا زۆرا رەوشەنبیر و ئەكادیمی و خودان باوەرنامێن بلند لبن سێوانا بنگەهێ لالش . 2- دەینانا پرۆگرامێن خواندنا ئێزدیاتیێ بۆ قوتابی و فیرخوازێن ئێزدیان لسەرانسەری دەڤەرێن ئێزدی نیشین . 3- دەرێخستنا گۆڤارەكا وەرزی ل دۆر ئێزدیان وزێدەباری رۆژناما دەنگێ لالش یا هەفتیانە . 4- دامەزراندنا ژمارەكا مەزن یا مامۆستایا لسەر میلاكێ پەروەردێن هەرێما كوردستانێ كو پتریا وان سەرب دەڤەرێن شنگال و شێخان و تلكێفێ ڤە بوون . 5- تەرخانكرنا مووچەكی هەیڤانە بۆ هەمی ئۆلدار و مجێورێن ئێزدیان لسەرانسەری دەڤەرێن ئێزدیان . 6- ڤەگوهاستنا قوتابیێن زانكۆ وپەیمانگەهان یێن ئێزدی ژ زانكۆیا مووسل بۆ زانكۆیێن هەرێمێ كو سالانە بنگەهێ لالش ئەڤ ئەركە ب ستویێ خۆڤە گرتی یە . 7- ل دەمێ ئاوارەبوونا خەلكێ مەیێ ئێزدی یێ شنگالێ و دەڤەرێن دی ل تەباخا سالا2014 بنگەهێ لالش بانگەوازی دا هەمی تایی و نڤیسینگەهێن خۆ لسەرانسەری دەڤەرێن ئێزدیان كو هەمی هێز و كارینێن خۆ بدەنە كاری ژبۆ هاریكارییا ئاوارەیان و هەر لدملدەست هەمی تا و نڤیسینگەهان دگەل ئەندامێن خۆ لیژنێن تایبەت دروست كرن ژبۆ پێشەوازی و هاریكارییا ئاوارەیان . 8- ل دەمێ ئاوارەبوونا خەلكێ مە ب دەستپێشخەریا بنگەهێ لالش ئاوارە هاتنە ڤەحەواندن دناڤ هۆلێن خێروشەرا د اكو ئەڤ هۆلێن هەنێ سەرب بنگەهێ لالش ڤەنە زێدەباری ڤەحەواندنا ژمارەكا خێزانێن ئاوارە دناڤ ئاڤاهییێ بنگەهێ لالش دا ل دهۆكێ . ول دوماهیێ هەژی ئاماژە پێكرنێ یە كو ئەڤ خزمەت خەباتا هاتیە پێشكێش كرن بۆ ئێزدیان هەمی ب پشتەڤانی و هاریكارییا حكەمەتا هەرێما كوردستانێ و كەسایەتییا رێزدار سەرۆكێ حكومەتا هەرێما كوردستانێ كاك (نێچیرڤان بارزانی ).
بنگەهێ لالش دیرۆكەكا درێژ و خەباتەكا بەردەوام هەنە و براستی بنگەهێ لالش هەژی دەست خۆشییێ و رێزگرتنێ یە ژبۆ ڤێ دیرۆكا وی یا پڕ ژ خزمەت و خەباتێ ژپێناڤی جڤاكێ ئێزدی ، بیست وچار سالییا دامەزراندنا بنگەهێ لالش پیرۆزبت .
تُتاح هذه الصورة أيضا في: کوردی