گەنجێن ئێزدی و ساخكرنا فلكلۆری
لەیت حسێن
پشتی سالێن هەفتیان وهەتا دەستپێكا سالێن دوو هەزارێ،فلكلۆرێ شنگالێ ب شێوەیەكی هەرە باش دیار بوو چ ژلایێ چێكرنا كەرەستێن هۆنەری ڤە یان ژی ژلایێ گۆتنا سترانێن فلكلۆری ڤە ب رێیا هژمارەكا زۆر ژ سترانبێژێن ئێزدی وەك (قاسمێ مەیرۆ، بابێ عەتۆ، پیر مجۆ، قەپال دومۆ، عیدۆێ كوتی، خدر فەقیر و بروێ شەرقی) وهژمارەكا زۆر یا دی ژ سترانبێژێن فلكلۆری،وگۆتنا خەلكێ ئێزدی ئەوە كو هێشتا دەنگێ وان یێ ساخە و نەمریە و ئەو سترانبێژ ناڤكرینە ب هۆنەرمەندێن نەمر و دبێژن هێژ سەركێشێت دیلانا وە دتەوینا سترانا غەزالێ ومەیرەمێ هیژ دساخن نە دمرینە و ئەڤ چەندە دیارە لنك پتریا وی خەلكی چ ل دیوان وجڤاتێن زەلاما و چ ل چۆل وچیا و ب تایبەتی ژی ل دنك شڤان وبێریڤانان و پتریا وی خەلكێ ل وان جیان دژیت.
ودبێژن هێژ هوون ل دیوانا مە دساخن هێژ ئەو دەم وچاغن هەروەسا سەبارەت پووتە پێكرن ب هۆنەرمەندێن فلكلۆری وەك پەیامەكێ بۆ وان دئیننە سەر زمان كو هوون دارا بێ پەلن گۆهدارێن وە نە دكەرن ژ عەشقا وە دا هێژ دفرن،ژلایەكی دن ڤە وەكو هەستەك ب هەبوونا دەنگێ ڤان هۆنەرمەندان دبێژن هێژ فەقیر خدر ل ملێ دیوانێ سترانا (غەزالێ) دبێژە ،هیژ ل كۆلك وسەر بانا پیر مجۆ وبابێ عەتۆ سترانا (هەڤالا منێ وەلاتێ بابێ تە خانە) لێك ڤەدگێرن، قاسمێ مەیرێ و برۆێ شەرقی سترانا (عەدولێ) دبێژن، دیسان وەكو دیار ولپێش چاڤ كو هژمارەكا دی یا سترانبێژێن ئێزدی نهۆ جیێ وان هۆنەرمەندێن دن یێن بەرێ گرتنە و سترانێن فلكلۆری ژلایێ وان ڤە دئێنە گۆتن و ئەڤە دیاردكت كو فلكلۆرێ شنگالێ نامرت وهەر ساخ دمینت.
ئەڤ هۆنەرمەندێن نهۆ سترانێ دبێژن ونەهێلانە كو دەنگێ سترانبێژێن شنگالێ وندا ببت ب شێوەیەكی بەرچاڤ د دیارن و ل گەلەك گۆڤەند وجڤاتا دا وهەروەسا ل هژمارەكا تەلەڤزیۆنا و رادیۆیێن كوردی سترانێن فلكلۆری یێت شنگالێ دبێژن و ژ وان هۆنەرمەندێن شنگالی یێن كو نهۆ سترانێن فلكلۆری دبێژن (تەحسین خدر فەقیر، عەلی خدر فەقیر، چێلی، خەلۆ شنگالی، جەلۆ و شەمۆ كامۆ) و گەلەك هۆنەرمەندێن دن وئەڤ هۆنەرمەندە ژی دبێژن ژبۆ مانا فلكلۆرێ كوردی ب گشتی و یێ شنگالێ ب تایبەتی هەر دێ ل كارێ گۆتنا سترانێن فلكلۆری بەردەوام بن و هەردەم دەم دێ هەول دەن باشتر وجوانتر وخۆشتر ببت.
تُتاح هذه الصورة أيضا في: کوردی