ئەگەرێن سەرنەكەفتنا بەربژێرێن شنگالێ بۆ پەرلەمانێ عێراقێ
ناسر شەهوانی
ب راستی ئێزدی چ جارا سەربۆرێ ژكاودانین ژیانێ وەرناگرن ومفایی ژ سەربۆرێن بۆری وەرناگرن ،وهەر جار تووشی هەمان شاشیێ دبن ول هەمان چالان وەردبن و ئەڤە ژی رامانا وێ چەندێ دگەهینت كو ئەڤ مللەتە هەتا نهۆ ئەنانیە وسیستەمێ هۆزایەتی وپاشكەفتنێ كۆنترۆلێ لسەر مە دكت ،و ئەم نكارین نەخشا پاشەرۆژا خۆ بكێشین ژبۆ پاشەرۆژا مللەتێ خۆ ورێككەفتن لسەر هەلبژارتنا وان كەسان یێن دشیانا وان دا هەی مللەتێ ئێزدی برێڤەببەن ژبۆ دەربازبوونێ ژڤێ قۆناغا نازك وهەستیار یا مێژوویی و مەترسیدار وب تایبەتی ئەم هێشتا ژ دەرئەنجامێن كۆمكوژیێ ل(3/8/2014)ێ دەرباز نەبووینە وهێشتا برینێن مە ب تەمامی نەهاتینە دەرمانكرن.
یا ئاشكرایە كو پشكداریا هژماركا زۆرا بەربژێرێن ئێزدی د هەلبژارتنێن پەرلەمانێ عێراقێ دا ل(12/5/2018)ێ رۆلەكی خراب هەبوو لسەر بەلاڤكرنا دەنگێن دەنگدەران و ئەڤێ ژی كارتێكرنەكا خراب لسەر سەرنەكەفتنا بەربژێرەكی شنگالێ یێن ئێزدی بۆ پەرلەمانێ عێراقێ هەبوویە،ئەڤە بوویە ئەگەرێ ژ دەستدانا مافێ مللەتێ ئێزدی ب تایبەتی خەلكێ شنگالێ و گەهاندنا كەسەكی ژ هەژی بۆ پەرلەمانێ عێراقێ،زێدەباری كو بەربژێرێن ئێزدی ب تایبەتی خەلكێ شنگالێ كەسەك بۆ كەسەكی دی تەنازل نەكر و دەرفەت نەدا برایێ خۆ یێ ئێزدی مرۆڤەكی ژ هەژی بگەهتە پەرلەمانی و بەرەڤانیێ ژمافێ مللەتێ خۆ بكت،ژئالیەكی دی ڤە نەبوونا گۆتارەكا ئێكگرتی ژلایێ مللەتێ ئێزدی ڤە بەری دەمێ هەلبژارتنا و هەست نەكرنا بەربژێران ب بەرپرسیاریا مێژوویی یا كو دكەفتە لسەر ملێت وان ڤە ژی بوویە ئەگەرێ ژ دەست دانا مافێ رەوایێ ئَێزدیان نەك بتنێ ل هەلبژارتنان بەلكو ل گەلەك پلە و پۆستێن دی یێن حكومی و كارگێری،و ئەڤە ژی وێ چەندێ بۆ مە دسەلمینت كو هەر بەربژێرەك ل بەرژەوەندیێن خۆ یێن تایبەت دگەرت یان رازیكرنا وی ئالی كریە بەربژێر ژ ئالیێ پارتا وی ڤە بێی هزرا بەرژەوەندیا گشتی یامللەتێ خۆ بكت،ئەڤ ئەگەر هەموو بەس بوون كو دەنگێن مە ژبۆ كەسێن دی یێن نە ئێزدی بچن لسەر كیستێ مللەتێ ئێزدی ب تایبەتی خەلكێ شنگالێ ژبەر زێدەبوونا بەربژێر (كاندیدێن) ئێزدیان.
هەر بۆ زانین پتر ژ نیڤا جڤاكا ئێزدی هەتا نهۆ ل كەمپان دا ل كوردستانێ دژین و ل بارەكی سەخت و دژوار دا ژیانا خوۆ دبۆرینن.
تُتاح هذه الصورة أيضا في: کوردی