كۆتایا ئێزدیا دناڤبەرا پەرلەمانێ كوردستانێ و عێراقێ دا
ئەمین شەمۆ
ئێزدی ژی ئێكن ژ وان كێمەنەتەوەیان دناڤ ئاخا عێراق و كوردستانێ دا دژین،ئەگەر ئەم بەرێ خۆ بدەینە مێژوویا سیاسی یا عێراقێ كو هەر ژ دەما دامەزراندنا دەولەتا عێراقێ ژئالیێ بریتانیا ڤە ل سالا (1921)ێ هەتا نهۆ ژی دێ بینن كو مافێ كێمەنەتەوەیان یێ سیاسی هاتیە خوارن.
لەورا دێ بینن ژی ئێك ژ وان كێمەنەتەوەیان كو مافێ وان یێ سیاسی هاتیە خوارن و داخوازیێن وان هاتینە پشتگۆهاڤێتن، دیسان ل كوردستانێ ژی هەر ژ دەما دامەزراندنا حكومەت و پەرلەمانێ كوردستانێ ل سالا (1992)ێ و هێرڤە ئێزدی هەست ب مەغدوریەكا مەزن دكن كو ژ ئالیێ سیاسی ڤە حكومەت و پەرلەمانێ كوردستانێ ژی لگۆری پێتڤی مافێن سیاسی نەداینە ئێزدیان، وەكو یا دیار و دئێتە گۆتن كو ل(30/9/2018) هەلبژارتنێن پەرلەمانێ كوردستانێ دێ ئێنە كرن كو ئێزدی ژی ئێك ژ وان كێمەنەتەوەیانن كو هەتا نهۆ كورسیكا كۆتایێ ل پەرلەمانی ژێ را نەهاتیە دانان، كو پەرلەمانێ كوردستانێ ژ (111) كورسیكان پێكهاتیە و ل ناڤا وان دا (11) كورسیك ژبۆ كێمەنەتەوەیێن ئایینی و نەتەوەی هاتینە دانان ل هەموو خۆلێن دەربازبووی یێن پەرلەمانی ئێزدیان كورسیكا كۆتایێ نەبوویە ،لەورا پێتڤیە و ئەركە لسەر سەركردایەتیا سیاسی و پارتێن كوردستانێ و كەسایەتیێن سیاسی یێن ئێزدی هەول بدەن ڤێ جارێ كورسیكەكا كۆتایێ ژبۆ ئێزدیان ل سنوورێ پارێزگەها دهۆكێ بدانن وەكو هەموو كێمەنەتەوەیێن دیتر ل كوردستانێ چنكو گرانیا ئاكنجیێن ئێزدی ل دەڤەرێن ڤەقەتیایی یێن هەرێما كوردستانێ یە و دەڤەر و چارەنڤیسێ وان گرێدایی ماددەیا(140)ن ب تایبەتی ل پارێزگەها مووسلێ نكارن پشكداری دەنگدانا پەرلەمانێ كوردستانێ ببن لگۆری یاسایێ.
ئەڤجا ژبۆ پشتی هاڤێتنا ڤێ پێنگاڤێ پێتڤیە لسەر سەركردایەتیا سیاسی و پارت و پەرلەمانتارێن كورد ل بەغدا دگەل كەسایەتیێن سیاسی و پەرلەمانتارێن ئێزدی ژی بزاڤێ بكن ژ نهۆ و پاش كۆتایەك لگۆری هژمارا ئاكنجیێن ئێزدی ل عێراقێ ژبۆ ئێزدیان ل پەرلەمانێ عێراقێ بدەستڤەبێت لگۆری یاسا و مافێ ئێزدیا و هەموو هەول و بزاڤێن خۆ بكەنە ئێك ژبۆ بدەستڤەئینانا ڤێ پێنگاڤێ داكو ئێزدی ژی هەست بكن كو مافێ وان یێ سیاسی ژ نهۆ و پاش نائێتە خوارن وەكو هەموو كێمەنەتەوەیێن دیتر ل عێراقێ و پشكداری كارێ پەرلەمانی و كابینەیا حكومەتێ ببن.
تُتاح هذه الصورة أيضا في: کوردی