ژبۆ هەڤگرتنا دناڤبەرا ئێزدیا و برایێن ئەرمەن دا
پارێزەر:نێچیرڤان شێخ شامۆ
وەكو دیار كو هۆزا هەوێریا ئێك ژ هۆزێن رەسەن یێن ئێزديانە، و هەتا سالا 1944ێ ل باكورێ كوردستانێ ل دەڤەرا سلۆپیا دئاكنجیبوون، كو ژیانا كۆچەریێ ل دهشت و زۆزانا و خودانكرنا تەرش و تەوالی ڤە دەرباز دكرن مینا هۆزێن دیتر یێن كوردستانێ.
و ب هەلكەفتا بۆرینا ١٠٦ سالان لسەر كۆمكوژیا برایێن ئەرمەن، من وەسان هزر كر كو ئێك ژ راستیێن دیرۆكی یێن كو دوی سەردەمی دا رووداین وەكی میناكەك ل هەڤ هاتن و لێبۆرین و پێكڤەژیانێ ل ناڤبەرا ئەرمەنان و كوردێن ئێزدی دا ل بیربینم و بینمە زمان.
وەكو هاتیە گۆتن و لگۆرەی ئەوا باب و كالێن مە بەحسكری كو ل سالا 1915ێ ل دەما كۆمكوژیا برایێن ئەرمەنا، ل پایزا وێ سالێ هنگێ كەریێن پهزێ هەوێریا (چۆبوونە بهڕوا) ل چیایێ جودی، كو 13كەسێن ئەرمەنی دناڤ كەریێن پەزێ مالباتا مە (خێزانا شێخ گەبۆ) شێخێن هەوێریا دهاتنه پاراستن ل شەڤێ نان و شیر لگەل شڤانان دخوارن و ل رۆژێ ل شكەفتان دا خۆ ڤەدشارتن، وسا مان هەتا ئۆپەراسیۆنێن قركرنێ كێمبووین.
لگۆرەی گۆتنا باب و كالێن مە بهریا كۆمكوژیێ ژی وان ئەرمەنیان بەرێ خۆ ددان زۆزانا و ل هەمان دەڤەرێن كو باب و كالێن مە لێدمان ئهوژی لێ دبوون و كۆنێن وان هەرگاڤ ل بنیا چیایێ جودی بوون، وان ب ئەرمەنی دگۆتنێ (بازامی) ل دۆرا (هەسانا) بجی بوون و جهێ وان یێ رهسهن بوو، ئەڤ ئەرمەنیێ ژ فهرمانێ فلتین دناڤ مەدا مان هەتا ئەم چۆینە باشوورێ كوردستانێ و عێراقێ، و ئەڤە ژی ناڤێن هندەك ژ وان خێزانایه یێن خوهگرتی و پاراستی مایی دناڤ هۆزا ههوێریا دا:
1_غەریبێ كهسپۆ و كورێ وی حسێن
2_غەریبێ پورتۆ
3_رهشۆ كۆرۆ و كورێن وی بۆخۆز و سیسۆ
4_ئیسفێ ڤارتۆ و داودێ ڤارتۆ
ئەڤ هەمی ئهوبوون یێن ژ كۆمكوژیێ قورتالبووین و دناڤ مە دا دژیان، و دگۆتن باش ل بیرا مەیە دەما ئەرمەنیا مینا هەوێریان سوند وباوهریا وان ب (خودانێ شێخ گهبۆ) و (ستوونا شێخ مەند) بوو.
مینا گۆتنێن باپیر و داپیرێن مە، هندەك ژڤان مالباتێن ئەرمەنی ل وی دەمی لگەل هندەك مالباتێن هەوێریا ئێك ئێك مال و حال بوون و لبن ئێك رهشكۆنی دا دژیان، وەكو مالا (هرچۆ) و مالا (غەریبێ كهسپۆ) هەتا سالا 1940ێ مینا برا ژێك جودا بوون، و ئەرمەنی مینا مە كۆچەر و خودانێن تەرش و تەوالی بوون، و كهسانێن پیشهكار بوون دگۆتنێ (كورنج) ئانكو (لڤا بهرخا دژهنین بۆ چێكرنا كولاڤا) چونكه ل وی سهردهمی جیراخ و سهراخێن رونشتن ورازانێ كولاڤ بوون.
ئهڤ چیرۆكا ههنێ یهك بوو ژمیناكێن مرۆڤدۆستی و جوامێریا ئێزدیا ل سهردهمهكی سهختێ لێقهومین و قركرنا ئهرمهنا.
ب ڤێ بیرهاتنا تراجیدی دهرفهت دبینم بانگ ل وان خێزانێن ئهرمهنی یێن ناڤهاتی بكهم ئهوێن كوو هەتا نها چ ژ شونوار و جیوارێ وان یێ نزانن و دوندا، بهیڤی نه رۆژهك بێ ئهڤ پهیوهندیا دیرۆكی ساخ ببه.
تُتاح هذه الصورة أيضا في: کوردی