مەرەما داعش نەمانا جڤاكێ ئێزدیان بوو
دلفین خەلەف
ب هەلكەفتا بۆرینا هەفت سالان بسەر كۆمەلكوژیا ئێزدیێن شنگالێ یا ل رێككەفتی(3/8/2014)ێ لسەر دەستێ دوژمنێن مرۆڤایەتیێ چەكدارێن رێكخراوا تیرۆرستیا داعش هاتیە ئەنجامدان و ژ ئەگەرێ وێ چەندێ ب هەزاران زارۆك و ئافرەت و پیروكال بووینە قوربانی،دیسان ب هەزاران كەسێن بێ گونەهـ هاتنە كوشتن و بكۆم هاتینە بن ئاخكرن و باژێرێ شنگالێ ب گشتی هاتە تالان و وێرانكرن و خەلكێ وێ دەربەدەر و ئاوارەبوون و هەتا نهۆ ژی ژیانا خۆ ل ژێر چادران و خیڤەتان دا دەربازدكن.
مەرەما دوژمنێ خوین مژ ژڤێ هێرشا بێ وژدان قركرن و نەمانا جڤاكێ ئێزدیان بوو ل شنگالێ،لەوما ب هزرو بیرێن خۆ یێن گەنی دەست ب هێرشا تیرۆرستی كرن و ب هەزاران كچ و دەیكێن مە یێن ئێزدی گرتن و ئێخسیركرن و هەولێن بێ روومەت كرن و شكاندنا كەسایەتیا وان دان وەكو هەر كەرستەكێ ل بازارێ كرین و فرۆتن ب وان هاتە كرن،كۆمەلكوژیا ئێزدیان یا ل(3/8/2014)ێ ل شنگالێ روودای تاوانەكا مەزن بوو كو تیرۆرستان ل دژی ئێزدیان ئەنجامداین ب هەموو قەبارە و پیڤەران ڤە و ئەڤێ چەندێ ژی هەستێ هەر مرۆڤەكێ خودان وژدان ل سەرانسەری جیهانێ هەژاند و بوویە خالەكا رەش بناڤ چاڤێن دوژمنێن درندە و خودانێن هزر وبیرێن پاشكەفتی و هەر لایەنەكێ بوویە پشتەڤانێ وان و شۆپا وان یا هۆڤانە و خراب،كۆمەلكووژیا ئێزدیێن شنگالێ زیانەكا ئێكجار زۆر گەهاندیە ئافرەتا شنگالی و تووشی ئێش و ئازارێن مەزن كریە ژ هەموو ئالیان ڤە،ژبەركو كرین و فرۆتن پێ هاتەكرن و رەوشەكا سەخت و دژوار كو ئیرۆ دبەتە سەر و ئەڤ چەندە ژی بوویە ئەگەرێ شەپرەزەبوون و زەحمەتیەكا مەزن د ژیانێ رووبرووی ژیانا وان بوو و ب بێ دەنگی دناڤ خەم و كۆڤانان دە دنالن،هیڤیدارین ژ هەموو لایەكێ شۆلەژێ بلەز ئەو دەیك و خووشكێن مە یێن ماینە دناڤ دەستێن تیرۆرستان دە رزگار بكن،ژبەركو خێزان و كەسوكارێن وان چاڤەرێ وێ رۆژێ نە ڤەگەرنە هەمبێزا وان و ژبن دەستیێ قورتال ببن.
هەروەسا هیڤیدارین ئارامی ل شنگالێ پەیدابێ و خەلكێ مە ب سەربلندی ڤەگەرێ سەر جهـ و وارێ خۆ و كۆمەلكوژیا ئێزدیان ب جینوساید بێتە ناسكرن و تیرۆرستێن بێ وژدان بكەڤنە دەست دادگەهێ و بێنە سزادان.
تُتاح هذه الصورة أيضا في: کوردی