قاسم شەشۆ:حكومەتا عێراقێ لێپرسینێ دگەل عەرەبێن ڤەدگەرنە شنگال ناكەت
تۆرا لالش یا راگەهاندنێ
فەرماندێ فەرماندا شنگال یا پێشمەرگێ كوردستانێ ئاشكەراكر كو حكومەتا عێراقێ عەرەبان ڤەدگەرینتە شنگال و ڤەكۆلین و لێپرسینێ دگەل دا ناكەت،دڤیابا بەری ڤەگەریانێ دادگەهەك هاتبا دروستكرن و ڤەكۆلین لگەل وان عەرەبا هاتبا كرن داكو ئەوێن دەست لگەل داعشێ هەی هاتبانە سزادان.
فەرماندێ فەرماندا شنگال یا پێشمەرگێ كوردستانێ(قاسم شەشۆ)بۆ رۆژناما دەنگێ لالش راگەهاند، ڤەگەریانا عەرەبا ل ڤێ قۆناغێ دا ب تایبەت ترسەكا مەزن ل دەڤەرێ پەیدا دكت،چنكو وان عەرەبا ل رۆژا(3/8/2014)ێ هاریكاریا داعشێ كرن ژ هەموو ئالیان ڤە،نهۆ ژی حكومەتا عێراقێ عەرەبان ڤەدگەرینتە شنگال و ڤەكۆلین و لێپرسینێ دگەل دا ناكەت،دڤیابا بەری ڤەگەریانێ دادگەهەك هاتبا دروستكرن و ڤەكۆلین لگەل وان عەرەبا هاتبا كرن داكو ئەوێن دەست لگەل داعشێ هەی هاتبانە سزادان،لێ بەروڤاژی ڤێ یەكێ حكومەتا عێراقێ وان بكۆم ڤەدگەرینتە دەڤەرێ ب تایبەت ل باشورێ چیایێ شنگالێ و گۆت:((هێش چ تشت بۆ شنگال و گرتیێن دەستێ داعشێ و رزگاربوویێن دەستێ داعش ژبال حكومەتا عێراقێ ڤە نەهاتیەكرن،حكومەت جارەكا دی ڤان عەرەبێن كو خەلكێ شنگال كوشتین و گرتین و شنگال وێرانكرین ڤەدگەرینە دەڤەرێ،د دەمەكی دا كو هێش رەوشا ئەمنی یا شنگال ئالۆزە و نەیا جێگیرە)).
قاسم شەشۆ رۆنكر ژی ڤەگەریانا گوندێن(عین غەزال_عین فەتحی_خیلو_معامر_پسكێ شمالی_پسكێ جنوبی_بەشەكی مەزن ژ ناحیا قەیرەوان)دێ بتە سەدەمێ ئالۆزبوونەكا مەزنتر ل دەڤەرێ،چنكو تێ پێشبینی كرن شانەیێن نڤستی یێن داعش ل ناڤ ڤان خێزانێن عەرەبا دا هەبن،هێش سنوورێ دناڤبەرا عێراقێ و سووریا ژی ب باشی نە یێ كۆنترۆلكریە رەنگە هندەك لڤینان بكن ل دەڤەرێ و خودێ نەكەت ئەگەر لڤینەك نە سروشتی ل شنگال چێبت،دیسان ئەو عەرەب دێ هەولا داگیركرنا شنگال دەن،لەوما یا پێتڤیە حكومەت ب ئەركێ خۆ رابت و دادگەهەك بێتە دروستكرن و ئەو عەرەب بێنە دادگەهكرن،ژبەركو هێش (85%) خەلكێ شنگال ئاوارەنە و ڤەنەگەریاینە سەر جیێن خۆ و ئەو عەرەبێن كو شنگال تالانكرین بەری خەلكێ شنگال ڤەدگەرن ئەڤە ژی جینۆسایدەكە بسەر شنگالێ دا.
هەروەسا(دلۆڤان شنگالی)وەك چالاكڤانەك بۆ رۆژناما دەنگێ لالش دبێژت:ڤەگەریانا عەرەبا ترسەكا هەرە مەزنە ژبۆ خەلك شنگال و حكومەتا عێراقێ نە دادپەروەریێ بكاردئینت هەمبەری خەلكێ شنگال،ئەڤ عەرەبێن ڤەگەریاین دێ ئاریشە بتر ل دەڤەرێ پەیدا بن ژبەركو هێش هزرا داعشێ ل نك وان عەرەبا مایە و دڤێت وەسا ب ساناهی عەرەب ڤەنەگەرنە شنگال ،ژبەركو وان عەرەبا مالا شنگال تالانكرن نهۆ ژی ب ساناهی ڤەدگەرن ئەڤ یەك ژی جیێ قەبوولكرنێ نینە ل نك خەلكێ شنگال و دڤێت ب رێیێن یاسایی ڤەگەرن نەك بێ ڤەكۆلین و دادگەهكرن لەوما خەلكێ شنگال بێ ئۆمێد بوویە ژ ڤەگەرا خۆ و دبینن رێزا ل عەرەبا تێتە گرتن ل وان نائێتە گرتن و حكومەتا عێراقێ تشتەكی ژبۆ خەلكێ شنگال ناكەن،دخوازین رێككەفتنەك دناڤبەرا حكومەتا عێراقێ و حكومەتا هەرێما كوردستانێ دا بێتە كرن كو رەوشا شنگال ئاسایی بكن،داكو خەلك ژی هەست ب ڤەگەرێ بكت و ڤەگەرنە سەر جیێ باب و كالێن خۆ ڤە.
تُتاح هذه الصورة أيضا في: کوردی