ئێزدی ئێدی نامینن كەمینە بەلكو دێ بنە پێكهاتەكا سەرەكی وخودان سەنگ
خالد خدر
تێتە زانین كو پتریا دەڤەرێن ئێزدی نیشین و دكارین بێژین 90% ژ وان دەڤەرا دكەڤنە دەڤەرێن كوردستانی یێن دەرڤەی ئیدارا هەرێما كوردستانێ یان وەك حكومەتا عێراقێ بناڤ دكت ب دەڤەرێن ناكۆكی لسەر هەین یان ژی دەڤەرێن مادێ 140 ، ئەڤە ژی ژ بێ ئیغبالییا ئێزدیایە كو دەڤەرێن وان لسەر هێلێن سنووری نە دگەل عێراقێ یان ئەرەبستانێ ، ئێزدیان گەلەك ئێش وئازار دیتی نە ب سەدەما ڤێ جوگرافییا وان یان توند وئالۆز و دیسا داروسێیا وان دگەل ئەرەبان ژوان ڕە بوویە مالوێرانی و بەدبەختی،ب درێژاهییا دیرۆكێ ئێزدیان ستەم و ستەمكاری كێشایە ژدەستێ رژێمێن عێراقێ یێن ئێك لپێ ئێك هەر ژ سەردەمێ پاشایەتی هەتاكو گەهشتییە سەردەمێَ نهۆ یێ بناڤێ فرە دیموكراسییێ وفرە ئازادییێ و پەرلەمانییێ ل عێراقێ و ستەما ژ هەمییێ مەزنتر و خرابتر ئێزدی تووش بوویێ ئەو بوو یا ژ دەستێ رێكخراوا تیرۆرستییا داعش ل تەباخا سالا 2017 ێ ، وژبلی ڤێ هەمییێ ئەڤێ جوگرافییا هەنێ و ڤێ هەڤ سنۆرییێ دگەل دژمنا وەكرییە ئێزدی بخۆ ژی تووشی رەنگە دابەشكرنەكێ ببن دناڤ خۆدا ب تایبەتی ل دەڤەرا شنگالێ ، كو بەشەك ژوان نهۆ دگەل هێزێن سەرب پەكەكێ ڤەنە وبخۆ نیمچە دەڤەرەك گرتینە ل خانەسۆرێ وژئالیێ دیڤە هندەك چووینە دگەل حەشدا شەعبی یا شیعە مەزهەب وان ژی دەڤەرەك بخۆ گرتینە ل باشوورێ شنگالێ ،و ژئالییەكی دی ڤە ئێزدیێن دی هەمی دگەل هەرێما كوردستانێ و دام ودەزگایێن فەرمی و رەوا ل كوردستانێ ، و نهۆ ژڤانە لرۆژا 25/9/2017 ڕاپرسی بێتە ئەنجام دان ل سەرانسەری هەرێما كوردستانێ ،وهەروەسا ل وان دەڤەرێن كوردستانی یێن دەرڤەی ئیدارا هەرێمێ ، و بێ گومان هەمی دەڤەرێن ئێزدیان ژی دێ راپرسی لێ ئێتە كرن ،لەوما یە فەرە هەمی ئێزدی دەنگێ خۆ بدەنە سەرخۆبوونا كوردستانێ و ژبەر ڤان سەدەمێن ل خوارێ دیار : –
1-ئێزدی ئێدی نامینن كەمینە بەلكو دێ بنە پێكهاتەكا سەرەكی و خودان سەنگ.
2-ئێزدی دێ گەلەك دەستكەفتیێن سیاسی و دستوری بدەستڤە ئینن مینا پۆستێن سەروەری و كۆتا ل پەرلەمانێ كوردستانێ لپێ رێژا دانشتووا كو رێژا مە بلندبت ل كوردستانێ بەروڤاژی عێراقێ كو ئەم كەمینە بوون.
3-ئێزدی ژ دێ ژ یەكەیێن ئیداری یێن ئەرەبی ڤەبن وەك مووسل و بەعاج و تلەعفەرێ و نە دوورە شنگال ببیتە پارێزگەه یان یەكەیەكا سەربەخۆ ل ناڤ دەولەتا كوردستانێ دا.
4-ئەو ئەرەب یان تلەعفەریێن خەلكێ مە كوشتین و رەڤاندین و دەست دگەل قركرنا ئێزدیێن شنگالێ هەین دێ ب ئێكجاری ژ سنۆرێ مە وكوردستانێ دووركەڤن.
هەروەسا گەلەگ خالێن دی یێن باش و ئەرینی هەنە كو ب قازانجن بۆ مە ئێزدیان دەمێ كوردستانێ سەرخۆبوونا خۆ وەرگرت ژ عێراقێ ، كو مە هیچ خێر وخێراتەك ژ دەولەتا عێراقێ نەدیتیە ل ماوێ ڤان سالێن ژییێ وێ ، بەلكو بەروڤاژی هندێ خالەكا خراب و نەرینی بسەرێ مە ئێزدیان هاتیە ،تەرحیل و تەعریب و تەبعیس و كوشتن و ئاوارەیی دەربەدەری و تیرۆركرن ئەنفال كرن و ل داوییێ فەرمان و قڕكرن و فرۆتنا كەچ و ژنا ل بازارێن نەخاسێ ، لەوما پێتڤی یە لسەر مە بەری هەر كەسەكی دی ئەم دەنگێ خۆ بدەینە سەرخۆبوونا كوردستانێ ل رۆژا 25/9/2017.
تُتاح هذه الصورة أيضا في: کوردی