دارێن ناڤدار ل چیایێ شنگالێ (دارا حەلێ)
حەیدەر عەرەبۆ یوسڤانی
بێگۆمان چیایێ شنگالێ وارگەهەكا پیرۆز و ناڤدارە ل كوردستانێ ، ب چیایێ بەرخودانێ یێ ناڤكریە ، دناڤ و دەوروبەرێ چیایی گەلەك قوب ،و نیشان،و سلاڤگەهـ ، ئاقد ، جهـ و دارێن پیرۆز و ناڤدار هەینە ، و هەر ئێك ژ وان خودان دیرۆك و چیرۆكەكا دوور و درێژ و بالكێش هەیە.
وەكی مە گۆتی ،گەلەك دارێن ناڤدار و پیرۆز ل چیایێ شنگالێ هەینە وەك دارا زڤنكێ ، داركێت قەوالا ، دارا عەسۆ ، دارا زەرۆ ، دارا خەرقە ، دارا شڤانا ، دارا مەزلێ …هتد،لێ دارا ( حەلێ) یا ب ناڤ و دەنگە ل سەرانسەری دەڤەرا شنگالێ ، ب تایبەت لجەم هۆزا قەیرانیا چنكو ل دەڤەرا وان،دار حەلێ دكەفتە سەرێ چیایێ شنگالێ ل رووبارێ شمالی دەڤەرا گێرا قەیرانیا،دارا حەلێ ئێكە ژ وان دارا یە لناڤ باغ و رەز و بوستانێن هۆزا قەیرانیا و حەلیقیا ل دەڤەرا ناڤبری دا و گەلەك جارا ل سالێن دەربازبووی و هەتا نهۆ بوویە هێلینا ڤەحواندنا گەنج و دانعەمر و پیرەژنا و لبەر سیبەرا (سیها) وێ حەنك ولاقردی و سەرهاتی گۆتینە نەخاسمە ل ڕۆژێن گەرمێن هاڤینێ و ل دانێ نیڤا رۆژێ دا،هەروەسا هەر كەسەكێ سەرەدانا گێرێ بكت دێ چت جەم دارێ و وێنا لجەم گرت بۆ بیرهاتنان.
چما دبێژن دارا حەلێ ، چما بڤی ناڤی هاتیە ناڤكرن ؟ حەلێ ناڤێ پیرەژنەكا دانعەمر بوو ژ خەلكا گێرێ بوو و ڤێ ژنێ بۆ ماوەیەكی درێژ سەخبێری و چاڤدێریا ڤێ دارێ دكر و دەوروبەرێن وێ پاقژ و بژوین دكر، بتریا دەمێ خۆ ژبۆ خلمەتا ڤێ دارێ تەرخان كربوو ،ژبەر ڤێ چەندێ خەلكێ دەڤەرا گێرێ بریار دا ناڤێ وێ دانێن سەر ڤێ دارێ ،هەتا نهۆ دبێژن دارا ( حەلێ) ژبەر وێ پیرەژنا دانعەمر و هەتا نهۆ كور و نەڤیێن وێ پیرەژنێ ل كۆمەلگەها خانەسۆرێ نە ل باكوورێ چیایێ شنگالێ،دارا حەلێ دارا بتمایە و یە مەزنە و بەرچاڤە ل وێ دەڤەرێ و دبێژن تەمەنێ ڤێ دارێ نێزیكی(400) سالانە ، هەتا نهۆ یە كەسكە و گەلەك جاران ل ستران و دووركێن شنگالێ دا ناڤێ ڤێ دارا دئێتَە زمان ،هەروەسا ل قڕكرنا شنگالێ ل(3/8/2014)ێ سیبەرا ڤێ دارێ بوویە جیێ ڤەحواندنا خەلكی و زارۆكێن خۆ لبەر سیها وێ نڤاندنە و لۆراندنە هەتا خودێ كریە فەرەجا خێرێ.
بۆ زانین گێرا قیرانیا دەڤەرەكە ناڤدارە ل چیایێ شنگالێ و دەشتەكە بەرفرەهە و راستە و گەلەك ڕەز و بوستان لێ هەینە و ب هژیرا یە بەرناسە ل سەرانسەری دەڤەرێ و هەتا نهۆ یە ئاڤایە،خەلكێ وێ مژوولی رێنچبەریێ نە بۆ بارێ ژیانێ.
تُتاح هذه الصورة أيضا في: کوردی