ساله‌ك ب سه‌ر كونترۆلكرنا شنگال دا ده‌رباز بوو
ئه‌ڤرۆ نیوز:
ساله‌ك ب سه‌ر كونترۆلكرنا شنگال دا ده‌رباز بوو، به‌لێ ب تنێ 173 خێزان ڤه‌گه‌ریاینه شنگال و 13 گۆند هێشتا نه‌هاتینه كونترۆلكرن، هه‌تا نوكه 616 پێشمه‌رگه ل وی سنوری شه‌هید بووینه و قایمقامێ شنگال ژی ئه‌گه‌رێ ڤه‌نه‌گه‌ریانا خه‌لكی بۆ وێ ده‌ڤه‌رێ ئاشكه‌را دكه‌ت.
مه‌حما خه‌لیل قایمقامێ قه‌زا شنگال راگه‌هاند كو هه‌تا نوكه 13 گۆند نه‌هاتینه كونترۆلكرن و گۆت: “ئه‌م ب هیڤی نه د سالیادا بهێت یا كونترۆلكرنا شنگال دا، ئه‌و ده‌ڤه‌ر ژی بهێنه كونترۆلكرن”.
زێده‌تر گۆت: “هه‌تا نوكه 173 خێزان ڤه‌گه‌راینه ناڤ باژێری، به‌ری داعش هێرشێ بكه‌ته سه‌ر ده‌ڤه‌رێ ژمارا روونشتڤانێن ده‌ڤه‌رێ 8 هزار و 105 خێزان بوون كو دبوونه 51 هزار و 536 كه‌س.
ده‌رباره‌ی ڤه‌نه‌گه‌ریانا خه‌لكێ شنگال بۆ ناڤ شنگال ژی خۆیا كر كو ژبلی هه‌بوونا گه‌له‌ك هێزان ل ناڤ شنگال خزمه‌تگۆزاریێن ده‌سپێكی ژی نینن و داعش ژی جار جاران هێرشێ دكه‌ته سه‌ر شنگال.
شنگال 140 كیلۆمه‌تران یا ژ سه‌نته‌رێ مووسل دووره و هه‌ر ژ ده‌سپێكا هاتنا داعش هه‌تا نوكه 616 پێشمه‌رگه ل وێ ده‌ڤه‌رێ شه‌هید بووینه و 27 گۆڕێن ب كۆم ل وێ ده‌ڤه‌رێ هاتینه دیتن و زێده‌تری چار هزار كوردێن ئێزدی ئاواره بوون و نێزیكی پێنج هزار كچ و ژنان ژی كه‌فتنه ده‌ستێ داعش.
تُتاح هذه الصورة أيضا في: کوردی