پارێزەر(سەعید شنگالی):مافێ شنگالێ یە ببتە پارێزگەهەك سەر ب هەرێما كوردستانێ ڤە
تۆرا لالش یا راگەهاندنێ
پارێزەر(سەعید خودێدا شنگالی) د دیدارەكێ دا بۆ رۆژناما دەنگێ لالش دیاركر،مافێ شنگالێ یە ببتە پارێزگەهەك سەرب هەرێما كوردستانێ ڤە و ژدوو دەستهەلاتیێ قورتالبت،هەروەسا ئەگەرێ نەئاڤەدانكرنا وێ گەلەك ئالیێن سیاسی نە و خەلكێ باوەری نینە بزڤرتە ڤە سەر مال و جیێن خۆ،دووپاتكر كو ئەو لایەنێن ژدەرڤە هاتین و هاریكاری كرین ماف نینە ل شنگالێ بمینن و پێتڤیە چۆل بكن.
دەربارەی فەرمانا رەشا ب سەرێ شنگالێ دا هاتی(سەعید خودێدا شنگالی)گۆت:فەرمانا رەش یا بسەرێ خەلكێ شنگالێ دا هاتی ژبەر دوو ئەگەران بوویە،ئێك ژبەركو ئێكەم جار ئێزدی نەتەوە كوردن و یا دووێ وەك ئۆل ئێزدی بوون،لەورا شنگال دەڤەرەكا كوردیە.
سەبارەت هەبوونا لایەنێن ژ دەرڤە ل شنگالێ پارێزەری ئاشكەراكر،ژلایێ یاسایی ڤە لایەنێن ژدەرڤە هاتین و هاریكاری كرین ماف نینە ل شنگالێ بمینن و پێتڤیە چۆل بكن،چنكو ئەو دەڤەرە زولم لێكریە ژئالیێ تیرۆرستێن داعشڤە،پێتڤیە گرنگی ب كەیسا جینۆسایدا ئێزدیان بێتە دان ژبەركو نۆكە گۆڕێن بكۆم وقوربانیێن فەرمانێ هاتینە پشتگوهاڤێتن.
ل دۆر ئاڤەدانكرن و چارەنڤیسێ شنگالێ ناڤهاتی دیاركر،ئەگەرێ نەئاڤەدانكرنا شنگالێ گەلەك ئالیێن سیاسی نە وهێش داعش ل وان دەڤەرا بداوی نەهاتیە،لەورا خەلكێ ئێزدی باوەری نینە بزڤرنە ڤە و ژیانا خۆ بێخنە دمەترسیێ دا،چارەنڤیسێ شنگالێ دڤێت خەلكێ وێ بریارێ لسەر بدەت،چنكو شنگال یا شنگالیایە.
هەروەسا ل سەر پارێزگەهبوونا شنگالێ و هەلویستێ حكوومەتا عێراقێ(شنگالی) دبێژت:شنگالێ رۆلەكێ مەزن هەیە دكێشا كوردینیێ دا و هەردەم بۆكوردستانێ خۆ كریە قوربانی و دهەلبژارتنێن دەستورێ عێراقێ یێن بۆری دا رۆلەكێ بەرچاڤ هەبوو،لەورا ئەم داخواز دكن ل دەڤەرا شنگالێ ژی ریفراندۆم بێتەكرن،داكو ببتە پارێزگەهەك سەرب هەرێما كوردستانێ ڤە وئەم ژدوو دەستهەلاتیێ قورتالبن ومافێ خۆ بدەست بێخن،دیسان حكوومەتا عێراقێ چ جارا شنگالێ نابینت دەڤەرەكا عێراقی وچ پێنگاڤ نەهاڤێتینە وپەرلەمانێ عێراقێ چ پێزانین لسەر فەرمانێ نینن وبۆ كەیسا جینۆسایدا ئێزدیان چ هەول نەكرینە ژبەركو عێراق نەئەندامە د دادگەها تاوانێن نێڤ دەولەتی دا و گرنگیێ ب فەرمانێ نادەت و یا دئێتە ژبیركرن.
ل دۆر گرتیێن ئێزدی یێن د دەستێ تیرۆرستێن داعشێ دا ماین(سەعید خودێدا شنگالی)راگەهاند،پێتڤیە حكوومەتا عێراقێ پێنگاڤێن زێدەتر پاڤێژت بۆ وان ئێخسیرا،چنكو داعش ئەو برنە وەلاتێن دەوروبەر وكرین و فرۆتن پێ كرن،هەروەسا نڤیسینگەها رزگاركرنا كاروبارێن رەڤاندییان ل پارێزگەها دهۆكێ یا بەردەوامە لسەر رزگاركرنا وان،بەلێ ئەو دەمێ رزگاردبن دەست ب قۆناغەكا نوو یا ژیانێ دكن كو یا پێتڤیە چاڤێ حكوومەتا عێراقێ ل وان بت ژئالیێ مادی ومەعنەوی و ساخلەمی و دەروونی ڤە.
تُتاح هذه الصورة أيضا في: کوردی