هژمارەك ژ رەڤاندیێن ئێزدی دناڤ مالێن تیرۆرستێن داعشدا هاتینە ڤەشارتن
باسنيوز:
رێڤەبەرێ نڤیسینگەها رزگاركرنا رەڤاندیێن ئێزدی ل دهۆكێ دیاركركو مە پێزانین هەنە هژمارەك ژ رەڤاندیێن ئێزدی ل عێراقێ دناڤ مالێن تێرۆرستێن داعشێ دا یێن هاتینە ڤەشارتن.
حوسێن قائیدی، رێڤەبەرێ نڤیسینگەها رزگاركرنا رەڤاندیێن ئێزدی ل دهۆكێ بۆ(باسنیوز) دیاركر: “هەتا نها 3 ھزار و 151 رەڤاندیێن ئێزدی رزگارنەبووینە، ژوانا ژی هژمارەك دناڤ ئاخا عێراقێ دانە ل ناڤ مالێن تیرۆرستێن داعش ڤەشارتینە ورێ ناهێتە دان ئەو رەڤاندی بهێنە رزگاركرن. گەلەك جاران مە داخاز ژ حكومەتا عێراقی كریە كاربكەت بۆ رزگاركرنا رەڤاندیان ل عێراقێ لێ هیشتا چوو نەكریە. مە داخاز كریە حكومەتا عێراقی بریارەكێ بدەت وتێدا بێژت هەر كەسەكێ رەڤاندیەكا ئێزدی ناڤ مالا وی دا بیت ودەمەكێ كێمدا رادەستێ هێزیێن ئەمنی و رێڤەبەرێ نڤیسینگەها رزگاركرنا رەڤاندیێن ئێزدی نەكەت وی كەسی سزا بدەن لێ بەغدا ئەڤە ژی نەكریە بۆ ئێزدیان”.
خویا ژی كر: ” هندەك ژ رەڤاندیێن ئێزدی تیرۆرستێن داعش دناڤ ئاخا عێراقێ دا نەهێلاینە بۆ هندەك دەولەتێن دی رەوانەكرینە. مە پێزانیین هەنە هژمارەكا رەڤاندیێن ئێزدی هیشتا دناڤ ئاخا عێراقێ دانە وبەغدا هەڤكارێ ناكەت بۆ رزگاركرنا وان رەڤاندییان.”
تُتاح هذه الصورة أيضا في: کوردی