گرۆپێن رادیكال نێزیكی 60 كەسێن ئێزدی ل عەفرینێ ئێخسیر كرینە
تۆرا لالش یا راگەهاندنێ
ل باژێرێ عەفرینێ ودەردۆران ل رۆژئاڤایێ كوردستانێ(22)گوندێن ئێزدیا هەنە هەموو دبن دەستێ سوپایێ توركیا و گرۆپێن توندرەوێن رادیكال دان،كو نهۆ كار بۆ ڤەكرنا مزگەفتا ل وان گوندان دكن و نێزیكی(60)كەسان ئێخسیركرینە و هەمبەر ئازادكرنێ داخوازا دراڤی ژ خودانان دكن، هەروەسا(80%)ئێزدیێن عەفرینێ ئاوارەی دەڤەرا شەهبا بووینە دبن كۆنترۆلا كوردان و ئەرەبان و رژێما ئەسەدی دایە.
لدۆر رەوشا ئێزدیێن عەفرینێ،بەرپرسێ رێكخراوا جڤین یا گەشەپێدانا جڤاكی(كاوە عیدۆ)بۆ دەنگێ لالش دیاركر،ژمارا ئێزدیێن عەفرینێ نێزیكی(200)هەزار كەسی یە و گرۆپێن توندرەوێن ئیسلامی ل نێزیكی سالا(2012)ێ ئەو كرنە ئارمانجا خۆ و هەتا(2013)ێ ژی كەفتنە ناڤ دەڤەرێن ئێزدی نشین،هەر ژ دەمێ هێرشا وان گرۆپێن تیرۆرستی بۆ عێراق و سووریا و هەروەسا بۆ دەڤەرێن كوردێن ئێزدی و بوسلمان ل رۆژهەلات و رۆژئاڤا و ل مووسلێ و دەوروبەران،هەلبەت ئارمانجا وان یا سەرەكی ئەو بوو یێن ژ غەیری ئایینێ بوسلمان كرنە ئارمانجا خۆ و هەموو كارێن توند بكارئینان دژی وان وەك تالانكرنا مال و ملكی و برنا كچ و ژنێن وان لپێ هزرا وان یا ئیسلامی یا توندرەو دئێنە هژمارتن ب (غنائم الحرب)،كوردێن ئێزدی ل رۆژئاڤایێ كوردستانێ ژی بوونە ئارمانجا وان یا سەرەكی و لڤێ داویێ مە هەموویان دیت كا چاوان زۆری و زۆرداری و خرابكرن و هلۆشاندنا مەزارگەهێن ئێزدیان ل وێدەرێ و ئەو ئۆپەراسیۆنا سوپایێ توركیا و گرۆپێن توندرەوێن بسەرڤە بۆ دەڤەرا عەفرینێ كو ب زۆری باژێر كۆنترۆلكری ،هەر دیسان ئێزدیێن ل وێدەرێ بوونە ئارمانجا وان كەفتنە ناڤ مالان و پتریا وان دەربەدەربووینە،نهۆ ژی نێزیكی(60)كەسێن ئێزدیێن عەفرینێ ژ رەگەزێ نێر و مێ وەك ئێخسیر د دەستێ وان دان و هەمبەر ئازادكرن و بەردانا وان داخوازا (5هەتا 10)هەزار دۆلاران ژ خەلكێ وان گوندێن ئێزدیان دكن،سەرەرای ڤێ چەندێ حكومەتا توركیا راگەهاند ئەڤە ئەم یێن هاتین وان دەڤەران قورتال كەین ژگرۆپێن توندرەوی و لەشكەری،لەوما هەر دیسان ئێزدی بوونە قوربانی و ئێخسر د دەستێ وان دا.
دەربارەی دەربەدەربوونا ئێزدیێن عەفرینێ(كاوە عیدۆ) ئاشكەراكر،نێزیكی(75)خێزانا ئاوارەی وەلاتێ لوبنانێ بووینە و نهۆ لێ ئاكنجی نە و نێزیكی(110)خێزانێن دی ل توركیانە و نێزیكی(5)خێزانا ل ئوردنن و نێزیكی(4)خێزانا ل هەرێما كوردستانێ نە ولڤێ داویێ ژمارێن وان یێن زێدەبووین،ژبەركو پشتی دەربازبوونا ڤان گرۆپێن تیرۆرستی بناڤێ ئۆپەراسیۆنا چەقێ زەیتوونێ،ئەگەر بەرێ خۆ بدەنە رەوشا ڤان ئاوارە و پەنابەرێن ئێزدی رۆژێن سەخت و دژوار دەرباز دكن ب تایبەت ل لوبنانێ پێتڤی هاریكاریانە ژ دەولەتێ و بەلكو ب چوو رەنگان رێكخراوێن نە حكومی و هەتا دەولەت ژی وەكو لوبنان هاریكاریا وان نائێتە كرن كو ئێك ژ ئازارێن وان یێن هەرە گرنك ئەوە نە هژمارتنا وان ل دۆسەیا (یوئێن سی ئار)یێ نەتەوەیێن ئێكگرتی بۆ كاروبارێن پەنابەران هەتا نهۆ ئەڤ ئێزدیێن ل توركیا و لوبنانێ و ئوردن و كوردستانێ یێن ئاكنجیێن عەفرینێ ناكەڤنە دوی سیستەمێ دووبارە ئاكنجیكرنێ دا كو ببەنە ڤان وەلاتێن ئەورۆپی،داكو ئەڤ زۆرداریا ل وان هاتی كرن جارەكا دی دووبارە نەبتە ڤە.
هەروەسا ناڤهاتی دا زانین،ب مخابنی ڤە ئەو گوند و مەزارگەهێن ئێزدیان هلۆشیاینە و زۆری ب رەنگەكی رێكخستی ل وان تێتە كرن ل دەڤەرێن لێ هەین رۆژ بۆ رۆژێ سەخت و دژوار دبن،دكارین بێژین ئاخا ئێزدیا نهۆ یا وەلێ هاتی رۆژئاڤا نە ئاخا ئێزدیایە بەلكو ئاخا توندرەو و ئەڤێن زۆری و زۆرداریێ ل ئێزدیان دكن،بمخابنی ڤە ل رۆژئاڤا هەتا نهۆ كەسەكی ب رەنگەكی ئاشكەرا نەحكومەتا سووریا و نە پارت و لایەنێن خۆ دانێن ب ئۆپزسیۆن و توركیا چۆیە عەفرین رزگاركریە و یوئێنێ ب هەموو بەشێن خۆ ڤە خۆ ل ئێزدیا نەكرینە خودان،لەوما دڤی چەرخی دا ئایینی كو زۆری و زۆرداری لێ هاتیە كرن ئێزدینە.
هەر لسەر رەوشا ئێزدیێن عەفرینێ،رێڤەبەرێ مالپەرێ ئێزدینا(عەلی عیسۆ)بۆ دەنگێ لالش خویاكر،ل عەفرینێ ودەردۆران(22)گوندێن ئێزدیا هەنە هەموو دبن دەست سوپایێ توركیا و گرۆپێن توندرەوێن رادیكال دان،هەروەسا(80%)ئێزدیان ژ وان گوندان دەركەڤتینە و ل چۆلێ مان ل دەڤەرا شەهبا دبن كۆنترۆلا كوردان و ئەرەبان و رژێما ئەسەدی دایە نەكەفتیە دبن كۆنترۆلا هێزێن رادیكالی دا،ل وێدەر ژی رەوشا وان ئاوارێن ئێزدی زێدە یا ب زەحمەتە و ل جادا مانە و دخیڤەتان دا دژین و چەند خێزان ب هەڤرا دمالەكێ یان دكانەكێ دا دژین و نكارن ڤەگەرن عەفرینێ و بچنە باژێرێ حەلەبێ،هەر دیسان ئەوێن ل عەفرینێ ماین یان ڤەگەریاین رەوشا وان هێشتا زەحمەترە ژبەركو دبن كۆنترۆلا وان هێزان دان زۆرداریەكا ئۆلی ل ئێزدیان دكن و ب جڤاكەكی خودێ نەناس دبینن،گۆتژی(20%)ژ ئێزدیا ڤەگەریاینە گوندەوارێن خۆ ل دەردۆرێن عەفرینێ یان ژی ل گوندێن خۆ ماینە و سوپایێ توركیا و هێزێن رادیكالی دۆرماندۆری باژێری كۆنترۆلكریە و ناهێلن ئێزدی بێنە سەر مالێن خۆ ڤە و ئەرەبێن شامێ نهۆ ل مالێن ئێزدیان ئاكنجی دكن،ژبەر هندێ ئەو ناخوازن كەس ڤەگەرتە گوندێن خۆ و دەرگەهی ب وان ڤەناكن و رژێما ئەسەدی ژی ناهێلت ئێزدی بچنە حەلەبێ.
ژلایەكی دی ڤە لدۆر گرتنا وەلاتیێن ئێزدی ل عەفرینێ(عەلی عیسۆ)ئاشكەراكر،ژمارەكا كەسێن ئێزدی هاتیە گرتن و ئەڤ هێزنە دراڤی ژ خودانێ وان دخوازن لهەمبەر بەردانا وان وهندەك مال دراڤی ددەنێ ودئێنە بەردان،پشتی دئێنە بەردان پشتی دوو رۆژان تورك وان دگرن ڤە.
رێڤەبەرێ مالپەرێ (ئێزدینا) ئەو چەندە ژی راگەهاند،هێزێن رادیكالی ناهێلن ئێزدی ژ گوندێن خۆ دەركەڤن بێ رازەمەندیا وان و ناهێلن كارێ چاندنیێ بكن ،ب شەڤان ژی چەند خێزانێن ئێزدی دئێك مال دا دنڤن داكو بەرەڤانیێ ژخۆ بكن دەمێ هێزێن رادیكالی ب شەڤێ دەست ب تالان و دزینا مالێن ئێزدیان دكن،نهۆ ژی یێ كاردكن مزگەفتا ل گوندێن ئێزدیان ڤەكن.
ل رۆژا(20/2/2018)ێ سوپایێ توركیا و گرۆپێن رادیكالی یێن بناڤ لەشكەرێ ئازاد دەست ب ئەنجام دانا ئۆپەراسیۆنا (چەقێ زەیتوونێ)بۆ سەر باژێرێ عەفرینێ كر بۆ دەرێخستنا هێزێن پەكەكێ،ب سەدەما وێ ئۆپەراسیۆنێ چەند وەلاتیێن ئێزدی هاتنە كوشتن و ب سەدان ژی ئاوارەبوون.
تُتاح هذه الصورة أيضا في: کوردی