دەزگەهێ خێرخوازیێ بارزانی پێتڤیێن ئاوارێن چیایێ شنگالێ دابین دكت
تۆرا لالش یا راگەهاندنێ
دەزگەهێ خێرخوازیێ بارزانی ئۆفیسا شنگالێ،كۆمەكا هاریكاریان لسەر ئاوارێن سەرێ چیایێ شنگالێ دا بەلاڤكرن و لسەر دابینكرنا هەموو پێتڤیێن ئاواران بەردەوامە.
بەرپرسێ دەزگەهێ خێرخوازیێ بارزانی ئۆفیسا شنگال(پیردەیان)خویاكر، د گەرا خۆ یا ڤێ جارێ دا دەزگەهی زێدەتر ژ دوو هەزار كارتۆنێن خوارنا هشك و پێتڤیێن ناڤ مالێ لسەر(2750)خێزانێن كوردێن ئێزدی لسەرێ چیایێ شنگالێ و گوندێن دەوروبەر دا بەلاڤكرن، زێدەباری دابینكرنا دوو تانكەرێن گەرۆك یێن ئاڤێ دێ بەردەوام ئاڤێ ل ناڤ وی خەلكی دا گێرن دا ئەو خەلك ژ ئاریشا كێمبوونا ئاڤێ قورتال ببن،ئەم دێ دبەردەوام بین لسەر خزمەتكرنا خەلكێ خۆ ل شنگالێ و دێ هەول دەین ئاریشا كارەبێ ژی چارەسەر بكەین.
(هەیام مەحمود) ئاوارەیەكا شنگالێ یە ل دەڤەرا سەردەشتێ ل چیایێ شنگالێ دیاركر،دەزگەهێ خێرخوازیێ بارزانی بەردەوام هاریكاریا كوردێن ئێزدی دكت و هەموو گاڤا ل ناڤ خەلكێ خۆ دایە، ژبۆ خزمەتكرنا خەلكێ شنگالێ ژبلی دەزگەهی كەسەكی دی خۆ ل شنگالیا ناكەتە خودان و هەیڤانە هاریكاریان لسەر خەلكێ ئاوارە ل چیایی دا بەلاڤ دكن ،داخواز دكەین پتر هاریكاریا ئاواران بێتە كرن ژبەركو پێتڤی ب هەموو پێتڤیێن ژیانێ نە.
رۆژنامەڤان(سەعەد حەمۆ)ل چیایێ شنگالێ ئاكنجی یە دبێژت:رێكخراوێن جڤاكێ سڤیل وەك پێتڤی هاریكاریا خەلكێ شنگالێ ناكن ولدوڤ گۆتنا ئاواران گرتنا رێیا سحێلا ئەگەرەكی سەرەكی یە كو رێكخراوێن خێرخوازی هاریكاریان ناگەهیننە شنگالێ،ژبلی دەزگەهێ خێرخوازیێ بارزانی چ رێكخراو هاریكاریان ناگەهینن،لەوما داخوازێ ژ جیێن پەیوەندیدار دكەین رێیا شنگال ب پارێزگەها دهۆكێ ڤە گرێددەت بێتە ڤەكرن،داكو رێكخراو خۆ بگەهیننە شنگالێ و دەست ب ئاڤەدانیێ و پێشكێشكرنا خزمەتان بكن.
تُتاح هذه الصورة أيضا في: کوردی