رزگاربوویەك: داعش زارۆكێن ئێزدی ل سووریا بۆ شەری بكاردئینت
تۆرا لالش یا راگەهاندنێ/رائد غانم
رزگاربوویەكی ئێزدی ژ دەستێ داعش بەریا ماوەیەكی ل وەلاتێ سووریا هاتیە رزگاركرن ئاشكەرا دكت كو ژمارەكا مەزن یا زارۆكێن ئێزدی ل باژێرێ دشیشە یێ سووریا هەنە و ئەو بۆ مەرەمێن جودا جودا دئێنە بكارئینان،پتریا وان نهۆ پشكداریێ ل شەرێ داعشێ دگەل هێزین دی دكن،زێدەباری ئەو گەنجێن ئێزدی یێن گرتی ل وی باژێری مەترسیەكا مەزن لسەر وان هەیە بێنە كوشتن.
(ڤیان سەعید ئسماعیل) رزگاربوویەكی ئێزدی یە بەریا ماوەیەكی ب رێیا نڤیسینگەها رزگاركرنا رەڤاندیێن ئێزدی ل پارێزگەها دهۆكێ ژ دەستێ داعش هاتیە رزگاركرن دیاركر،ل رۆژا(3/8/2014)ێ دگەل ئەندامێن(13) خێزانا خۆ كەفتینە د دەستێ داعشێ و هەتا نهۆ ب تنێ هەفت ژمالباتا مە هاتینە رزگاركرن،ل دەستپێكا كەفتینە د دەستێ داعشێ دا گەلەك زۆری و زۆرداری مە دیت بەلێ پشتی بۆرینا دوو سالان داعش ئەز وهەڤالێن من ئازادكرین ئانكو بۆ ناڤ رێزێن خۆ ڤەگوهاستین و بەرەف گەلەك شەران برین،ب چاڤ من دیت نێزیكی پازدە هەڤالێن من یێن ئێزدی هاتنە كوشتن ژبەركو مێشكێ وان هاتبوو شووشتن و ڤێ چەندێ كاریگەریا خۆ یا تەمام هەبوویە داكو وان پالدەن بۆ خو پەقاندنێ یان ژی هندەك ژ وانا ژ ئەنجامێ بوردۆمانا فرۆكەیێن هەڤپەیمانان هاتنە كوشتن،ئاشكەراكر ژمارەكا مەزن یا زارۆكێن ئێزدیان ل باژێرێ دشیشە یێ سووریا هەنە و ئەو بۆ مەرەمێن جودا جودا دئێنە بكارئینان و پتریا وان نهۆ پشكداریێ ل شەرێ داعشێ دگەل هێزین دی دكن،ئەو گەنجێن ئێزدی یێن گرتی ل وی باژێری هەتا نهۆ ژی دبەنە شەری و مەترسیەكا مەزن لسەر وان هەیە كو بێنە كوشتن و ئەو پێتڤینە ب زوترین دەم بێنە رزگاركرن و ژ دۆزەخا داعش قورتال ببن.
ئاشكەراكر ژی ل شەرەكی ل نێزیك سنوورێ عێراقێ ل وەلاتێ سووریا ب سێ گوللەیان برینداربووم و جیێ وان گوللەیان ل لنگێ وی دا د دیارن و برینەكا دی ل دەستەكی وی هەیە كو ئەو ژی دەمێ من گوه لێدبوو داعش دێ من بەنە شەری دەستێ خۆ برینداركر،داكو نەچمە شەری
زێدەتر گۆت:ژبەر وێ مێشك شووشتنا ل نك وی چێبووی دەروونێ وی تێكچوویە و پێتڤی ب چاڤدێریێ مە هەتا ژ ڤی بارێ دەروونی یێ خراپ چارە ببم،بەلێ نهۆ هەول ژلایێ خووشكێن وی ڤە دئێنە دان كو وی ژی ڤەگوهێزن بۆ وەلاتێ كەنەدا داكو بۆ ئێكەم جار ببینن پشتی چار سالان ژ گرتنا وان د دەستێ داعشێ دا، هەروەسا داخوازێ ژ هەموو جیهانێ دكەم دەیك و باب و برا و خووشكێن وی یێن ل دەستێ داعشێ دا مایین و هەموو گرتیێن ئێزدی رزگاركن،ژبەركو ئەو دبارەكی خراپ دا دژین و ل ژێر زۆری و ستەما هۆڤا دا دژین.
ژلایەكی دی ڤە بەرپرسێ نڤیسینگەها رزگاركرنا رەڤاندیێن ئێزدی ل پارێزگەها دهۆكێ(حسێن قائیدی) گۆت:ل رۆژا(3/8/2014)ێ ژ ئەنجامێ وێ هێرشا هۆڤەنە یا تیرۆرستێن داعشێ بۆ سەر دەڤەرا شنگالێ(6417) كەس ژ كوردێن ئێزدی ل شنگالێ كەفتنە دەستێ داعشێ و پشتی نڤیسینگەها رزگاركرنا رەڤاندیا هاتیە ڤەكرن بەردەوام هەولا رزگاركرنا وان كەسێن گرتی دكت و ژ وان كەسێن گرتی كاریە هەتا نهۆ(3312) كەسا ژ دەستێ تیرۆرستێن داعشێ قورتال بكن،ژ وان ژی(340) زەلام و (1155)ژن و یێن دی ژی زارۆكن هەتا تەمەنێ(17)سالیێ دانە،وەك نڤیسینگەه دێ دبەردەوام بین لسەر كارێ رزگاركرنا كچ و ژن و زارۆك و زەلامێن ئێزدی.
تُتاح هذه الصورة أيضا في: کوردی