رەوشا ئێزدیان ل ناڤبەرا ئاوارەبوون و كۆچبەریێ دا
ناسر شەهوانی
پشتی فەرمانا رۆژا رەش ل (3/8/2014)ێ یا بسەرێ ئێزدیان ڤە هاتی ژلایێ تیرۆرستێن داعش ڤە ئێزدی كەفتنە درەوشەكا گەلەك خراب وپەریشان دا، ب هەزاران ژ ئێزدیان بوونە قوربانی وكەفتنە بن دەستێ تیرۆرستێن داعش،ژئەگەرێ ڤێ فەرمانێ(360)هەزار ژ خەلكێ شنگالێ ئاوارەی دەڤەرێن هەرێما كوردستانێ بوون و ب هەزاران كۆچبەری وەلاتێن غەریبیێ بوون.
ژمارەكا زۆرا مەزن ژ ڤی خەلكێ ئاوارەیێ شنگالێ نهۆ ل كەمپێن ئاواران دا ل رەوشەكا نەباش دە ژیانا خۆ برێڤە دبەن لبەر سەرما زڤستانێ وگەرما هاڤینێ ومەترسیا ئاگری و كارەبێ وكێمبوونا خزمەتكاریا،هەلبەت مللەتێ ئێزدی پشتی ڤێ فەرمانێ باوەریا وان ب كەسی نەما،نهۆ پشتی بۆرینا نێزیكی چار سالان بسەر ئەڤێ فەرمانێ ڤە مللەتێ ئێزدی چ ل عێراقێ یان دەرڤەی عێراقێ چارەنڤیسێ وان نەی دیارە و چ تشتی ژ پاشەرۆژا خۆ نزانن وئەو ژی ل هیڤیا رۆژەكێ نە بێت داكو بزانن كا وێ بەرێ خۆ دەنە كێدەرێ و دێ ژیانا خۆ یا مای ل كێدەرێ ڤە بۆرینن وپاشەرۆژا وان دێ چاوا بت،هندەك ژوان دخوازن دەڤەرێن وان بێنە پاقژكرن ژ مین وتەقەمەنیان داكو ڤەگەرنە سەر مال وحالێ خۆڤە،هەروەسا هندەكێن دیتر ژوان بێ هیڤیبووینە وترس ل دلێ وان دا مایە و باوەریا وان ب كەسی نائێت.
هەروەسا ئەو خەلكێ لسەر چیایێ شنگالێ دژین بێگومان ئەو ژی دنالین ژ سەرمێ و گەرمێ وترسێ ونەبوونا خزمەتكاریان،هەروەسا چارەنڤیسێ ئێزدیێن دەرڤەی وەلاتی رۆن وئاشكەرا ودیار نینە،هندەك ژ وان ل وەلاتێن بیانی دنالن و دخوازن دەڤەرێن وان بێنە پاقژكرن وڤەگەرنە وەلاتێ خۆ،چنكو ب گۆتنا وان ئەو وەلات نە وەلاتێ وانە وهندەكێن دی ژی ژ وان دخوازن دەرگەه بۆ ئێزدیان بێنە ڤەكرن و وەلاتێن بیانی پێشوازیێ ل ئێزدیان بكن وجیەك بۆ وان بێتە دەست نیشانكرن داكو پاشەرۆژەكا گەش ژیانا خۆ و زارۆكێن خۆ ب رێڤەببەن،چنكو ئەو وەسا هزر دكن كو ئەڤ وەلات نە وەلاتێ وانە و هەردەم تووشی فەرمان وكارەساتا دبەن وهەر وێ بەردەوام بن لسەر وان.
تُتاح هذه الصورة أيضا في: کوردی