ئێكەتیا ئافرەتێن شنگالێ دێ پرۆژەیان ل كەمپان ئەنجام دەت
تۆرا لالش یا راگەهاندنێ
ئێكەتیا ئافرەتێن شنگالێ ب هەڤكاری دگەل دەزگەهێ خێرخوازیێ بارزانی دێ چەند پرۆژێن هەڤپشك بۆ رزگاربوویان و بیژنا و ئێتیمان،ل كەمپان ئەنجام دەن و بنگەهەكی نەهێلانا نەخوێندەواریێ بۆ ژنان ڤەكریە.
بەرپرسا ئێكەتیا ئافرەتێن شنگالێ(لەمیا عەبدولحەمید) ب وەكالەت بۆ رۆژناما دەنگێ لالش راگەهاند،وەكو ئێكەتیا ئافرەتێن شنگال و ب رێیا سكرتاریەتا خۆ داخواز ژ حكومەتا هەرێما كوردستانێ كریە ب هەموو هێز و شیانێن خۆ پێكۆلێ بكن هەموو گرتیێن دەستێ داعش دا بێنە رزگاركرن و گۆت:((هندەك پرۆژێن هەڤپشك لگەل دەزگەهێ خێرخوازیێ بارزانی دێ ل كەمپان ئەنجام دەین لسەر پێشكێشكرنا هاریكاریان بۆ رزگاربوویان و بیژنا و ئێتیمان،هەروەسا رابووینە ب ڤەكرنا بنگەهەكی بۆ نەهێلانا نەخوێندەواریێ بۆ ژنان ل ژمارەكا كەمپێن ئاوارێن شنگالێ)). ئاماژە ب وێ چەندێ دا هندەك پرۆژە ل كەمپان نهۆ ل وارێ بجهئینانێ دانە و لبەرە چەند پرۆژێن دی ژلایێ دەروونی و دارایی ڤە بۆ رزگاربوویان ڤەكەین.
خویاكر ژی ژمارەكا رزگاربوویان لناڤ ستافێ ئێكەتیا ئافرەتێن شنگالێ دا هەیە و ب هەموو شێوەیان هاریكاریا كچ و ژنان و رزگاربوویان ب تایبەتی دكەین.
تُتاح هذه الصورة أيضا في: کوردی