كێماسیێن قوتابخانێن كەمپا شاریا نەهاتینە چارەسەركرن
تۆرا لالش یا راگەهاندنێ
ل كەمپا شاریا پێنج قوتابخانە بۆ قوتابیێن خووندنا كوردی و ئەرەبی ب شێوێ كەرەفانە هاتینە ڤەكرن،ژۆرێن كەرەفانە چەندین كێماسی لێ پەیدابووینە و هەتا نهۆ نەهاتینە چارەسەركرن.
لدۆر ڤێ چەندێ مامۆستا(حەواس شنگالی) بۆ رۆژناما دەنگێ لالش دیاركر،ئەڤە ماوێ بتر ژ چار سالانە ل كەمپا شاریا دژین و بتنێ پێنج قوتابخانە هەنە بۆ هەردوو دەوامێن خووندنا كوردی و ئەرەبی و ژۆرێن وان ژی گەلەك كێماسی تێدا هەینە،ژئەنجامێ هاتنا بای و بارانێن بهێز جامێن هندەك پەنجەرێن وان هاتینە شكاندن یان دەرگەهـ خرابووینە و كارەب ژێ هاتیە برین،ئەم داخواز دكەین كێشێن قوتابخانان بێنە چارەسەركرن داكو قوتابی ب شێوەیەكی باشتر بكارن دەواما خۆ بكن.
ژ ئالیەكی دی ڤە قوتابی (فارس حەسەن) بۆ رۆژناما دەنگێ لالش دبێژت:پشتی قوتابخانە ب شێوێ كەرەفانە بۆ قوتابیێن كەمپێ هاتینە ڤەكرن پێنگاڤەكا هەری باش بوو،لێ هەر ژ دەمێ هاتینە چێكرن و هەتا نهۆ ئەو كەرەفان نەهاتینە گهۆرین و گەلەك كێماسی ل ژۆرێن قوتابخانان دا هەینە،لەورا داخواز دكەین ئاڤ و كارەب و چەند پێتڤیێن دی بۆ بێنە دابینكرن.
تُتاح هذه الصورة أيضا في: کوردی