وەكیلێ میرێ ئێزدیان: ل شنگال گرۆپێن چەكدار خەلكێ بۆ مەرەمێن خۆ بكار دئینن
باسنيوز:
وەكیلێ میرێ ئێزدیان دیار كر گرۆپێن چەكدار خەلكێ مە یێ ئێزدی بۆ مەرەمێن خۆ ل شنگال بكار دئینن. مە نەڤێت جارەكا دی شەر دناڤ شنگالێدا دروست بیت بۆ ڤێ چەندێ ژی پێدڤیە گرۆپێن چەكدار و نەشەرعی پێگیریێ رێكەفتنا دناڤبەرا حكومەتا هەرێما كوردستانێ و عێراقێدا بكەن بۆ ئاساییكرنا رەوشا شنگال و هەر چ زوویە شنگال چۆل بكەن.
جەهوەر عەلی بەگ، وەكیلێ میرێ ئێزدیان بۆ كارۆبارێن پەیوەندییان بۆ (باسنیوز) راگەهاند كو: “ئەو جینوسایدا سالا 2014ێ ب سەرێ خەلكێ شنگال هاتی نەیا كێمە. هێشتا برینێن ئێزدیان ساخ نەبوویە. هندەك گرۆپێن چەكدار ونەشەرعی یێ خۆ دناڤ شنگال دا ئاسایی دكەن هەموو هەولدەن شەری ل شنگال بكەن بۆ ڤێ مەبەستێ ژی گەنجێن ئێزدیان بكاردئینن لەورا ئەم هێڤدارین خەلكێ مە هوشیار بیت ژ پلانێن مەترسیدار یێن خوین رژتنێ دناڤ شنگال دا”.
ئاشكەرا كر: “هەر شەرەكی ل شنگال رووبدەت دێ بیتە ئەگەر جارەكا دی مالوێرانی ب سەرێ خەلكێ مە بهێت لەورا ئەم هێڤدارین گرۆپێن چەكدار ونەشەرعی زوو شنگال چۆل بكەن”.
گۆتژی: “شاندەیێن بلند یێ حكومەتا عێراقێ بۆ دوڤچوونا رەوشا شنگال قەستا ناڤ سەنتەرێ شنگال دكەن لێ ئەم دخوازین پشتەڤانی و هەڤكاریا گرۆپێن چەكدار ل شنگال نەهێتە كرن داكو ئالۆزی ل شنگال ب دووماهی بهێن”.
تُتاح هذه الصورة أيضا في: کوردی