سەعید جردۆ: حكومەتا عێراقێ ل ھەمبەر كەیسا جینۆسایدا شنگالێ بێدەنگە
باسنيوز:
چاڤدێرەكی سیاسی ل شنگال چاڤپێكەڤتنەكێدا بۆ (باسنیوز) راگەهاند كو، گرۆپێن نەیاسایی كارتێكرن ل سەر كەیسا شنگال هەیە، هەروەسا ژی حكومەتا عێراقێ رێگریێ ل كەیسا جینوسایدا شنگال دكەت و پێدڤییە حكومەتا داهاتی یا عێراقێ بیتە ئەندام د رێكەفتنا رۆمادا، داكو چوو ئاستەنگ هەمبەر كەیسا شنگال نەمینن.
(باسنیوز) هەبوونا گرۆپێن نەیاسایی ناڤ شنگالدا چ كارتێكرن ل كەیسا جینوسایدا شنگال كریە؟
سەعید جردۆ: بەرژوەندیێن ناڤدەولەتی بووینە رێگر ل ناساندنا تاوانا مەزن یا شنگال و هەبوونا وان گرۆپێن نەیاسایی زۆر كارتێكرن كریە، چونكو دەولەتێن زلهێز ژی نەشێن تێدا كار بكەن، یان نەخوازن ڤێ كەیسێ رێڤەببەن، پێدڤییە دەولەتێن جیهانێ ب چاڤەكێ مرۆڤایەتی تەماشەیی كەیسا جینوسایدا شنگال بكەن، كارەكێ رژد ل سەر كەیسا شنگال هاتبا ئەنجامدان داكو تیرۆرست هاتبا سزادان.
(باسنیوز) حكومەتا هەرێما كوردستانی هەر ژدەستپیكا جینوسایدا شنگال هەتا نۆكە پووتەكێ مەزن كەیسا شنگال دایە بۆچی بەغدا رێگریێ دكەت؟
سەعید جردۆ: حكومەتا هەرێما كوردستانێ كارەكی مەزن ل سەر جینوسایدا شنگال ئەنجامدایە هەموو هەولا دەت داكو كەیسا شنگال ببیتە جینوسایدا و دادگەهەك ژی پێك ئینان ل سەر كەیسا شنگال لێ مخابن حكومەتا عێراقێ بیتە رێگر ل دروستكرنا دادگەها بۆ رێڤەبرنا كەیسا شنگال و سزادانا تیرۆرستێن داعش. ئەم دخوازین حكومەتا داهاتی یا عێراقێ ڤی بابەتی چارەسەر بكەت رێگریێ ل كەیسا شنگال دا نەكەت داكو حكومەتا هەرێما كوردستانێ پێنگاڤێن مەزنتر بۆ كەیسا شنگال بهاڤێت هەروەسا حكومەتا عێراقێ بیتە ئەندام د رێكەفتنا رۆما دا داكو هەموو ئاستەنگ چارەسەربن.
(باسنیوز) ل سەر ئاساییكرنا رەوشا شنگال چ ل سەر حكومەتا عێراقێ پێدڤییە ئەنجام بدەت؟
سەعید جردۆ: پێدڤییە حكومەتا داهاتی یا عێراقێ ل سەر ئاساییكرنا رەوشا شنگال و هەموو دەڤەرێت كوردستانی یێن دەرڤەی ئێدارا هەرێما كوردستانێ كار بكەت و رێكەفتنا ناڤبەرا حكومەتا هەرێما كوردستانێ و عێراقێدا بۆ ئاساییكرنا رەوشا شنگال بكەڤتە وارێ بجهئێنانێدا، هەروەسا ژی مادێ 140 ژی بهێتە بجهئێنان داكو خەلك ژ ژیانا خۆ پشتڕاست بن و چارەنڤیسێ دەڤەرێن كوردستانی ئێكلا بیت و ب فەرمی ڤەگەرنە باوەشا هەرێما كوردستانێ، هەروەسا ژی پێدڤییە حكومەتا داهاتی یا عێراقێ دەست ب قەرەبووكرنا زیانڤێكەڤتێن جینوسایدا شنگال بكەت و ئاوارە بزڤرنە سەر جهێن خۆ و ئێدارا شەرعی ڤەگەرتە شنگال، یاسا سەروەر بیت و دوسیەیا ئەمنی یا شنگال بكەڤتە دەستێ هێزەكا هەڤپشك ژ پێشمەرگەی و لەشكەرێ عێراقێ ورێ نەهێتە دان گرۆپێن چەكدار ناڤ شنگالدا بمینن، داكو پرۆسەیا ئاڤەدانی ل شنگال دەست پێ بكەت.
(باسنیوز) نەزڤرینا ئێدارا شەرعی چ كارتێكرن ل سەر شنگال كریە؟
سەعید جردو: ژبەر نەزڤرینا ئێدارا شەرعی و هەبوونا گرۆپێن نەیاسایی دەولەتێن جیهانی و رێكخراو نەشێن پرۆژەیێن خزمەتگوزاری ل شنگال بجه بینن، چونكو هەكە رەوشا نەیا ئارام بیت رێكخراوێن جیهانی بۆ ئاڤەدانی قەستا شنگال ناكەن، هەر دەمێ ئێدارا شەرعی زڤریە شنگال، دێ دەولەتێن جیهانی و رێكخراو و حكومەتا هەرێما كوردستانێ دێ دەست ب ئاڤەدانیا شنگال كەن.
(باسنیوز) ئەڤە هەشت سالن خەلكێ شنگال هاتییە جینۆسایدكرن، پێنگاڤێن بەغدا بۆ جینۆسایدا هەتا نوكە چ نە؟
سەعید جردۆ: هەموو بەلگەنامەیێن جینوسایدێ هەنە، لێ بەغدا خۆ بێدەنگ دكەت و سستی ل كەیسا شنگالدا كەت. هەتا نوكە عێراق نەبوویە ئەندام رێكەفتنا رۆمادا، داكو كەیسا شنگال بهێتە وەرگرتن و دادگەها نێڤدەولەتی بكارێ خۆ رابیت. پێدڤییە حكومەتا داهاتی یا عێراقی بیتە ئەندام رێكەفتنا رۆمادا، داكو كەیسا جینوسایدا شنگال هەموو كەیسێن تاوانێن دژی مللەتێ كورد بهێنە وەرگرتن ل دادگەها نێڤدەولەتی و تاوانبار بهێنە سزادان.
تُتاح هذه الصورة أيضا في: کوردی