بنگههێ لالش:8ساڵن جهژنێن مه دبن سیبهرا خهمان دانه
ژ ساڵا 2014ـێڤە ئهڤه ههشت جاره جهژنا رۆژیێن ئێزی بسهر مه دهرباز و دووباره دبن، خەم و نەخۆشی و خەمگینی ژبهر ئهنجام و باندۆرێن ئێرشا ڕەش یا هۆڤ و چهتهیێن ترس هەڤالێن مەنە ژبەر ئێرشا تیرۆرستێن داعش بۆ سهر پرانیا دهڤهرێن ئێزدینشین و ب تایبهت ل شنگالا وێرانبووی ،هێشتا ب ههزاران خێزانێن ئێزدی ل ژیانا ئاوارهیێ دا دژین و زێدهباری ب دههان ههزار گهنج و خێزانێن مه رێیا كۆچبهریێ گرته بهر بۆ ڤهدیتنا ژیانهكا پر ئارام بۆ خۆ و زارۆكێن خۆ، ئهڤه ههموو ژبهر لهەڤنەهاتبێن سیاسی یێن ل رۆژههلاتا ناڤین رووددهن و ئهم بووینه شهواتا وان شهر و ههڤركیێن ههرێمی و نێڤدهولهتی.
ئهگهر نه ژبهر ههلویستێ مرۆڤی یێن مهزن كو دبنهرهت دا ئهركهكێ نشتیمانی و نهتهوهی یه ژبال گهل و سهركردایهتیا كوردستانێ دهرههقێ ئێزدییان ل ڤێ نهخۆشیا وان دا، ڕهوشا خهلكێ مه دێ زۆر خراپتر و ب زهحمهتر با، ههروهسا پشتهڤانیا مهعنهوی و میدیایی و ههتا لۆجستی یا نێڤ دهولهتی و جیهانی هاریكار بوو بۆ سفككرنا ئێش و ئازارێن خهلكێ مه،لێ ئهم دخوازن ههلویستێن نێڤدهولهتی بتر بهێزبن ژبۆ دانانا ڕادهكی راسته راست و كارا بۆ ب داوی ئینانا ڤان ئێش و ئازاران كو بوویه مژارهكا بازرگانیا دوور و نێزیك و بوویه فلمهك سینهمایی تهماشهڤان ژی مفایی لێ وهرگرن، دگهل راستیا تهعل ب ههموو ئێش و دهردسهریێن خۆ بههرا خهلكێ مه بوویه چ ئاوارهبوون و چ یێن ڤهگهریاینه سهر دهڤهرێن خۆ ڤه و مهبهست ژێ ب تایبهت خهلكێ شنگالێ یه.
رهوشا نۆكه یا ئێزدیان ل شنگالێ پێتڤی ب وهلاتێن كو ئهكتهرێن سهرهكی یێن مهیدانێ یه،ژبۆ كو ب سهلمینن كو ههڤسۆزیا وان لگهل ئێزدیان نه ههلویستێن پرۆپاكندهیا مرۆڤایهتیێ نه، و ژبۆ ب داوی ئینانا ڤی فلمێ ب ئێش ژبۆ گهلێ مه چارهسهریێن ژیواری(واقیعی) بسهر ئالیێن ناكۆك دا بسهپینن،و رێككهفتنا شنگالێ یا هاتی ئیمزاكرن دناڤبهرا حكومهتا بهغدا و ههولێرێ كو ب دهستپێشخهریا نێڤ دهولهتی ل وی دهمی دا بێته بجهئینان، و كار بێته كرن ژبۆ سهپاندنا سزایان لسهر وان ئالیێن رێگریێ ل بجهئینانا ڤێ رێككهفتنێ دكن كو ئێك ژ گرنگترین رێیێن ڤهگهراندنا ئارامیێ یه بۆ شنگالێ، یان ژی كار بێته كرن بۆ بجهئینانا بهندێن ماددێ 140ژ دهستوورێ عێراقێ ب چاڤدێری و سهرپهرشتیا جیهانی،ئهم دوێ باوهریێ دانه كو بجهئینانا ڤێ ماددێ دێ ههڤكار بت بۆ بلهز ڤهگهریانا ئارامییێ بۆ شنگال و دهڤهرێن دی یێن گرێدایی بڤێ ماددا بجهئینانا وێ هاتی پاشخستن كو ئهڤ یهك نه لگۆرهی داخوازیێن هندهك هێزێن عێراقی و ههرێمی یه.
و ئهم دبینن كو بجهنهئینانا ههر ئێك ژ ڤان ههردوو پرسان وهكو(فرمانهكا بخوینا سار)ل دژی ئێزدیان،و پێداگیری لسهر بهردهوامیا رهوشا وان یا تراژیدی و سڕکرن(سارکرنا) دۆسهیێن ئاڤاكرنا دهڤهرێن وان و ب تایبهت شنگالێ،ژبهركو خویایه كو پرۆژێن توندرهوی ههنه كو نه كێمترن ژ هێرشا داعش بۆ سهر شنگالێ بۆ پهیداكرنا گهۆرینێن دیموگرافی و رهوشهنبیری و ئایینی و مهزههبی ل دهڤهرا شنگالێ یا ستراتیژی.
ئهم هیڤیدارن ل جهژنا بێت یا رۆژیێن ئێزی رهوشا ئێزدیان باشتر ببه و ههر سال بخێر و خۆشی بكن.
دهستهیا بلندا بنگههێ لالش یێ رهوشهنبیری و جڤاكی/دهۆك
16/12/2021
تُتاح هذه الصورة أيضا في: کوردی