بنگەهێ لالش:رەوشا شنگالێ ئالۆزبوویە
تۆرا لالش:
بنگەهێ لالش تایێ شنگالێ ئاشكەركر كو نۆكە رەوشا شنگالێ یا ئارام نینە،ئەو رێككەفتنا دناڤبەرا هەولێر و بەغدا لدۆر ئاسایكرنا رەوشێ هاتیە ئیمزاكرن هێشتا نەهاتیە بجهئینان و ژبەر هندێ ئاوارە ژ كەمپان ڤەناگەرنە سەر دەڤەرێن خۆڤە،نۆكە ژی رەوشا خەلكێ ل شنگال ئالۆز بوویە.
خشو میرزا،بەرپرسێ بنگەهێ لالش تایێ شنگال بۆ رۆژناما دەنگێ لالش دیاركر؛ژ دەستپێكا دامەزراندنا بنگەهێ لالش تایێ شنگال و تا نۆكە ئەو كار وچالاكیێن خۆ ژبۆی خورتكرنا بزاڤا رەوشەنبیری ل شنگالێ بەردەوام دكن،داكو ئاستێ رەوشەنبیری پێشبێخن تایبەت ژی بو گەنجان،بەریا سالا2014 بنگەهێ لالش رۆلەكێ بەرچاڤ ل دەڤەرێ هەبوو بۆ هاریكاریكرنا تەخا گەنج و قوتابی و لاوان،پشتی ئاوارەبوونا خەلكێ شنگال ژبەر هێرشا تیرۆرستێن داعش،وەكو بنگەهێ لالش دناڤ خەلكێ خۆ یێ ئاوارە دا ل سنوورێ پارێزگەها دهۆكێ بەردەوامی دا كارێ خۆ و ژ هەموو ئالیان ڤە هاریكاریا خەلكێ خۆ دناڤ كەمپان دا كر.
دیاركر ژی ژبەر هەبوونا هێزێن نەشەرعی و نەبوونا شەرعیەتێ و خزمەتگۆزاریان رەوشا خەلكێ ل شنگال ئالۆز بوویە و خەلك چاڤەرێ بجهئینانا رێككەفتنا دناڤبەرا هەولێر و بەغدا لدۆر ئاسایكرنا رەوشێ دكن،هەتا نۆكە ئەڤ رێككەفتنە وەكو خۆ مایە لەوا ئاوارە ژی ڤەناگەرنە سەر دەڤەرێن خۆ ڤە.
بەرپرسێ بنگەهێ لالش دوپاتكر،ئەو نۆكە چالاكیان ل شنگال ژی ئەنجام ددەن ب تایبەت ژی دناڤ قوتابیان دا و سالانە هاریكاریا قوتابخانەیێن شنگالێ دكن،داكو پرۆسێسا خووندنێ ب سەركەفتیانە ب رێڤەبچت.
تُتاح هذه الصورة أيضا في: کوردی