سەرۆک نێچیرڤان بارزانى: نابیت ئێزدى ئهردێ خۆ بجهـ بهێلن
گاڤ نیوز
سهرۆكێ ههرێما كوردستانێ راگههاند، دڤێت ههردهم مهزناهیا كارهساتا شنگالێ ل پێش چاڤێن مه بیت و دڤێت بزاڤ بهێنهكرن چ جارێن دى كارهساتێن بڤى رهنگى ب سەرێ ئێزدیان نەهێن.
ئهڤرۆ چارشهمبێ 3/8/2022 سالڤەگەرا كارهساتا شنگالێ ل دهڤهرداریا سێمێلێ هاته ساخكرن، سهرۆكێ ههرێما كوردستانێ، پارێزگارێ دهۆكێ، بابهشیخ و میرێ ئێزدیان و جڤاتا رۆحانى و ژمارهكا ریهـ سپى و ماقوولێن ئێزدیان و دهڤهرێ و ژمارهكا كهسوكارێن قوربانیان ئاماده بوون.
د رێورهسمان دا سهرۆكێ ههرێما كوردستانێ گۆت: پتریا شنگالێ وێران بوویه و ئهوا ل شنگالێ رووداى مهزنترین كارهساتا ڤى سهردهمى بوو، كارهساتا شنگالێ بۆ گوهۆڕینا دینێ وان بوو و كڕین و فرۆشتنا خویشك و دایكێن مه برینهكا ڤهكریه و ب ساناهى ناهێته ژبیركرن، رزگاركرنا رهڤاندیان كارێ مهیه و كێمترین كاره بۆ ئێزدیان بكهین.
ههروهسا سوپاسیا خهلكێ بههدینان كر و راگههاند، ل دهۆكێ مزگهفت بۆ ئاوارهیان هاتنه چۆلكرن و ئهڤه جهێ شانازیێ یه و بۆ رزگاركرن شنگالێ سهرۆك بارزانى بارهگههێ خۆ ل ئهنیا شنگالێ دانا، هیڤی ژى خواست، كارهساتا شنگالێ ب جینۆساید ل گهلهك وهلاتان بهێته ناساندن.
بهحس ل كهڤناریا دینێ ئێزدیان كر و گۆت، ئێزدیاتى دینهكێ كهڤنێ كوردستانێ یه و ئێزدیان بهرى ههمى دینان كلتۆرێ كوردى ل كوردستانێ پاراستیه و كوردستان ناڤهندا ئێزدیاتیێ یه و دوپاتكر، دڤێت ئێزدى ل سهر ئاخا خۆ و ل شنگالێ بمینن و لالشێ بهرنهدهن و دویرى خۆ نهكهن و دویركهفتنا ئێزدیان ژ كوردستانێ ب ترسەکا مهزن ناڤ كر.
سهرۆكێ ههرێما كوردستانێ گۆت: كهس نهشێت ئێزدیان و كوردستانێ ژ ئێك ڤهكهت و باوەریا ئێزدیان ب كوردستانێ یا موکومە و داخواز ژ كۆمهلگهها نێڤدهولهتى كر پشتهڤانیا ئێزدیان بكهت و پهنابهربوونا ئێزدیان ل وهلاتان ب ترسەکا مهزن ل سهر ئێزدیان ناڤكر.
ل دۆر كارهساتێن ب سهرێ ئێزدیان هاتین بارزانى خۆیاكر، رژێما بهرێ ب دههان گوندێن ئێزدیان ههرفاندن و ب دههان كهس ب كۆم گرتن و بێ سهروشوین كرن.
سهرۆكێ ههرێما كوردستانێ ئاماژه دا بهلگه و قانوونێن نێڤدهولهتى ئهوێن ل دژى ئێزدى هاتیه كرن و گۆت: ب بهلگه ئهو كارهسات جینۆسایده و داخواز كر دانپێدان ب وێ جینۆسایدێ بهێتهكرن.
ل دۆر قانوونا پشتهڤانیكرنا رزگاربوویان دازانین، هێشتا قانوونا پشتهڤانیكرنا رزگاربوویێن ئێزدى نههاتیه بجهئینان و هێشتا ئێزدى د ناڤا كاریگهریێن خرابێن جینۆسایدێ دا دژین و پێدڤیه پشتهڤانیا وهلاتان ههبیت و گۆت: ئێزدى قوربانیێن رێكخستنا تیرۆرستى نه و ب چ رهنگان نابیت جیهان ئێزدیان د ڤێ رهوشا خراب دا ژبیر بكهت.
رهوشا خرابا شنگالێ ژى كره ئهگهرێ نه ڤهگهڕیانا ئاواره و پهنابهران و گۆت: هێشتا رهوشا شنگالێ نهئاسایی یه و ب دههان خێزان ڤەنەگەریاینە و رێككهفتنا شنگالێ د ناڤبهرا حكومهتێن ههرێم و بهغدایێ دا نههاتیه بجهئینان و یێن رێگریێ ل ئاسایبوونا رهوشا شنگالێ دكهن نه د خهما شنگالێ دانه و راگەهاند، نابیت خهلكێ شنگالێ ببیته یاریهكا سیاسى و ئهركێ حكومهتا فیدراله رهوشا شنگالێ ئاسایی بكهت و دڤێت هێزێن نهشهرعى بهێنه ههلوهشاندن و هێزهكا شهرعى حوكمى ل شنگالێ بكهت.
ههروهسا ل دۆر پارێزگههبوونا شنگالێ ژى گۆت: دڤێت كار بهێتهكرن شنگال ببیته پارێزگههـ و داخواز ژ رێكخستنێن ناڤخۆ و دهرڤه كر: ئهركێ خۆ بهرانبهر خهلكێ شنگالێ ژبیر نهكهن و ئێزدى پێدڤى ب چاڤدێریهكا گهلهك تایبهتن.
ل دۆر رهوشا سیاسى یا ئیراقێ ژى گۆت: پاراستنا ئیراقێ ئهركهكێ ههڤپشكه و پێدڤیە هێز و ئالیێن ئیراقى ل سهر ئێك مێزێ كۆم ببن و دەربارەی هەرێما کوردستانێ دیار کر: پێكڤه و تهبابوونا ئالیێن ههرێمێ دێ دهستكهفتێن مهزن بۆ ههمى ههرێما كوردستانێ ئینیت.
تُتاح هذه الصورة أيضا في: کوردی