ئاوارەیێن شنگال بێ ئۆمێدبووینە ڤەگەرنە دەڤەرێن خۆ
تۆرا لالش:
نێزیكە ئاوارەیێن شنگال 9سالێن ژیانا ئاوارەبوونێ ل ناڤا كەمپان دڕەوشەكا ب زەحمەت و پەریشان دا دەرباز بكەن،هەڤدەم هەبوونا هەڤركیێن سیاسی و تێكچوونا بارودۆخێ ئەمنی و نەبوونا پرۆژەیێن خزمەتگۆزاری ل شنگال،بوویە سەدەم ئاوارە بێ هیڤی و ئۆمێد ببن ڤەگەرنە سەر جی و حالێن خۆ ڤە.
ل دۆر ڕەوشا ئاواران،ئەندازیار(حازم سەیدۆ)ل كەمپا خانكێ ئاكنجی یە دبێژت:ئاوارەبوونا خەلكێ شنگال دناڤ كەمپان دا درێژ بوو ژ ژیانا بن خیڤەتان دا بێزار بووینە، ئاریشە و گازندێن ئاواران ڕۆژ بۆ ڕۆژێ زێدەتر دبن و كەس نائێتە سەر خەتێیە،تەمەنێ هندەك خیڤەتان هەشت سال دەربازكرینە، زێدەباری مەترسیێن باهۆز و بارانێ و سۆتنا خیڤەتان هەتا نۆكە هندەك خیڤەت ژوان نەهاتینە گوهۆڕین،پتریا خیڤەتان دكەڤنن و یێن رزین و دبەرهەڤن بۆ ئاگربەربوون و سۆتنێ ب تایبەت ل وەرزێ هاڤینێ و پێتڤیە بێنە گوهۆڕین،هەروەسا ژیانا ئاواران گەلەك یا سەخت و دژوارە و پێتڤی ب هەر جۆرەكێ هاریكاریێ نە ڕۆژ بۆ ڕۆژێ ژیانا وان ل ناڤا كەمپاندا خراپتر دبت،ژلایەكێ دیڤە هاریكاریێن ڕێكخراوان یێن پێشكێشی خەلكێ كەمپێ كرین وەك بەرێ نەماینە و گەلەك كێمبووینە،داخوازێ ژ هەموو لایان دكەین هاریكاریا ئاواران بكەن و ڕێكخراو گرێبەستێن خۆ نوو بكەن و بكەڤنە د خزمەتا ئاواران دا و كەرتێ ساخلەمی و خووندنێ و پاقژیێ و ئاڤ و كارەبێ و گوهۆڕینا خیڤەتان باش بكەن، دیسان دخوازین خزمەتگۆزاریێن پاقژكرنا ناڤ كەمپان باشتر بێنە دابینكرن و ترومبێلێن ئاگرڤەمراندنێ بێنە دابینكرن و ئاریشێن سۆتنا خیڤەتان ل هەموو كەمپان بێنە چارەسەركرن.
سەبارەت مانا ئاواران ل ناڤا خیڤەتان دا(سەمیر سەبری) قوتابیێ زانكۆیێ و ئاكنجیێ كەمپا شاریا گۆت:مانە ئاواران ل دەمەكێ وەسا یێ دڕێژ و د ڕەوشاكا سەخت و دژوار یا كەمپان دا بێگۆمان دێ ئاریشێن دەروونی و جڤاكی پەیدا كەت، دیسا ڕەوشا ئاوارێن شنگالێ یا پەریشان و زەحمەتە و ساڵ بۆ سالێ ڕەوشا وان خراپتر لێ دئێتن و ئێش وئازارێن وان زێدە دبن،پشتگوهـ ئێخستنا كەمپان بوویە جیێ دلگرانی و نەخۆشییا ئاواران و بوویە ئەگەرێ كۆچبەریا هەزاران گەنج و خێزانێن خەلكێ مە بۆ دەرڤەی وەلاتی،هەروەسا ڕۆلێ حكومەتا عێراقێ و ڕێكخراوان یێ ب كێماسیە بەرامبەر ئێش و ئازار و نەخۆشیێن ئاواران د سالێن بۆری دا،لەورا داخواز دكەم هاریكاریا ئاواران ژ هەموو لایان ڤە بێتە كرن،دیسان نەبوونا ئیدارەیەكا فەرمی ل شنگالێ و پشتگوهـ ئێخستنا ئاڤاكرنا شنگالێ و دەڤەرێن ئێزدیان ژلایێ حكومەتا عێراقێ ڤە و نەبوونا ئەمن و ئاسایش و ئارامیێ لە دەڤەرێن مە و نەبوونا خزمەتگۆزاریان و زێدەبوونا ڕێژەیا بێكاریێ،ئەڤ چەندە ژی بوویە جیێ دلگرانییا ئاواران، ئەڤ چەندە بوویە ئەگەر ئاوارە بێ هیڤی و بێ ئۆمێد ببن ژ ڤەگەرا سەر جی و وارێن خۆ و ژیانا خۆ ب شێوەیەكی ئاستەنگ و پری ب زەحمەت ل ناڤ كەمپان دا دەرباز بكەن،كو بەرەف پاشەڕۆژەكا وندا و نەدیار ڤە دچن.
دەربارەی ڤەگەریانا ئاواران بۆ سەر جی و وارێن خۆ(زەید بەرەكات) مامۆستایە ل كەمپا چەمشكۆ ئاشكەراكر،سەرەرایی ئازادكرنا دەڤەرا شنگالێ ئەڤە پتر ژ هەشت ساڵایە پتریا خەلكێ مە یێ ئاوارە و هێشتا ژیانا خۆ ب شێوەیەكی پری ئاستەنگ و زەحمەت دناڤ كەمپان دا ل سنوورێ پارێزگەها دهۆكێ دەرباز دكەن و دڕەوشەكا پەریشان دا دژین،زێدەبارەی نۆكە شنگال یا وێرانە و بوویە جیێ هەڤركیێن سیاسی و بارودۆخێ وێ یێ رامیاری و لەشكەری باش نینە و نەبوونا پرۆژەیێن خزمەتگۆزاری دسالێن بۆری دا بوویە ئەگەرێ نەزڤرینا خەلكێ وێ بۆ سەر جـی و وارێن وێ،دخوازین ڕێككەفتنا دناڤبەرا هەولێر و بەغدا یا ل دۆر شنگالێ بێتە جێبەجێكرن داكو جارەكا دی ئاشتی و ئارامی بۆ دەڤەرا شنگال بێتە دابینكرن و دووبارە تووشی كۆمكوژیان نەبن و ئاوارەبوون ب داوی بێت و ئاوارە بزڤرنە دەڤەرێن خۆ،هەروەسا دخوازین وەلاتێن جیهانێ و جڤاكا ناڤدەولەتی كۆمكووژیا ئێزدیان ب جینوساید ناس بكەن،داكو ئاوارە ڤەگەرن و ژیانا خۆ ب ئارامی ب ڕێڤەببەن.
ژ ئەنجامێ هێرشا ڕێكخراوا تیرۆرستی یا داعشێ بۆ سەر دەڤەرا شنگالێ ل(3/8/2014)،كو ب هەزاران خەلكێ وێ دەربەدەر و ئاوارەبوون و ئەڤە ماوێ پتر ژ هەشت ساڵایە پتریا خەلكێ شنگال ئاوارەنە و هێشتا ژیانا خۆ د ڕەوشەكا پەریشان دا دناڤا كەمپان ل سنوورێ پارێزگەها دهۆكێ و ئیدارا سەربەخۆ یا زاخۆ دەرباز دكەن.
تُتاح هذه الصورة أيضا في: کوردی
