ئێزدی حكوومەتا عێراقێ ل هەمبەر كارەساتا شنگالێ بەرپرسیار دبینن
تۆرا لالش یا راگەهاندنێ/جیهان عبۆ
ل سەر دەربازبوونا پتر ژ سالەكێ ل سەر كارەساتا شنگالێ،كوردێن ئێزدی دبێژن جیرانێن شنگالێ خیانەت ل وانكریە و ئەو ئێدی باوەرییا خۆ ب وان نائینن ،حكوومەتا عێراقێ ژی بەرپرسیار دبینن ل هەمبەر وێ فەرمانا ب سەرێ ئێزدیان هاتی.
سعود عەزیز،ئاوارەكێ شنگالێیە دبێژت:”پتریا ئەو زارۆكێن ئێزدی یێن رێكخراوا داعش یا تیرۆرستی گرتین درەوشەكە خراب دە دژین،دیسا خەلك و ئاوارێن شنگالێ جۆرەها كارەسات و روودان ب چاڤێ خۆ دیتینە و ب سەرێ وان هاتینە”.
عزەت خدر،ئاوارەیەكێ دی یێ شنگالێ یە دیاركر:”هیڤیا مە ئەوە ئەو كچ و ژنێن ئێزدیان ،یێن هەتا نهۆ ددەستێ تیرۆرستێن داعش دا بێنە رزگاركرن”.
ڤەكۆلەرێ جڤاكی حەیدەر قاسم گۆت:”مێژوویێ كارتێكرنەكا مەزن ل سەر دەڤەرا شنگالێ كریە و ڤێ دەڤەرێ هەردەم قوربانی داینە و قەبارێ وێ نائێتە وەسف كرن،ئەڤ فەرمانە ژ شەرێ دوویێ جیهانی كێمتر نینە،چنكو كارەساتا شنگالێ ئاشكەرە كر كو هەموو سنورێ شنگالێ ب خوونێ سۆربوون ئەڤە ژی ژ ئەگەرێ خیانەتا جیرانێن شنگالێ بوو ، لەورا جارەكا دی گەلێ ئێزدی باوەریا خۆ ب وی خەلكی ناینە یێ كو خینات كر بە و هاریكاریا داعش كر بە و دەست درەڤاندنا كچ و ژنێن ئێزدیان دە هەبە”.
تُتاح هذه الصورة أيضا في: کوردی
