Dihok (Rûdaw) – Êvariya îro cenazeyên 47 çekdarên DAIŞê ku di şerê Şingalê de hatine kuştin, gihîştin pizişkiya dadê ya Mûsilê û ew jî zêdebarî termên wan çekdarên DAIŞê ne ku di nav bajarê Şingalê û derdorê de bicih mane.
Berpirsê Liqa 14 a Partiya Demokrata Kurdistanê (PDK) li Mûsilê Ismet Receb di daxuyaniyekê de ji Rûdawê re ragihand: “47 termên çekdarên kuştî yên DAIŞê ku di şerê îro yê ligel hêzên pêşmerge de li Şingalê hatine kuştin, êvariya îro gihîştin pizişkiya dadê ya Mûsilê.”
Herwiha Fermandeyê Eniya Rojhilat û Rojavayê Dîcleyê Zeîm Elî ji Rûdawê re ragihand: “Zêdetirî 100 çekdarên DAIŞê di şerê îro de hatine kuştin ku termên pirraniya wan di qadên şer de bi cih mane.”
Hêzên pêşmerge yên Kurdistanê îro ji serê sibehê ve dest bi operasyona rizgarkirina Şingalê ji dest çekdarên DAIŞê kirin.
Serokê Herêma Kurdistanê Mesûd Barzanî bi xwe serpireştiya operasyonê dike.
Li gor agahiyên ji çavkaniyên leşkerî yên Hêza Pêşmerge ve, %90 ji plana pêşmerge di şerê îro de pêk hatiye û hinek çavkanî didin xuyakirin, ku heya niha %70ê Şingalê hatiye rizgarkirin.
تُتاح هذه الصورة أيضا في: Kurdî