گرۆپێ داسن دووبارە دەست ب كارێن خۆ یێن هۆنەری كر
تۆرا لالش:
گرۆپێ هۆنەری یێ (داسن) ل سالا(2000)ێ لسەر دەستێ دوو هۆنەرمەندێن ئێزدی هاتیە دامەزراندن و پازدە سالان بەردەوامی دایە كارێ خۆ پاشی ژبەر چەند ئەگەران راوەستیایە، ب خۆشبەختانە نهۆ دووبارە دەست ب كارێن خۆ یێن هۆنەری كریە ب شێوازەكێ سەردەمانە ئێتە د خزمەتا هۆنەرێ كوردی دا و ڤێ پێنگاڤێ جەماوەرێ گرۆپی گەلەك دلخۆشكریە.
هۆنەرمەند(ئەدیب گرێپانی) بۆ رۆژناما دەنگێ لالش راگەهاند،گرۆپێ داسن یێ هۆنەری ل سالا(2000)ێ لسەر دەستێ وی و هۆنەرمەند سامی گرێپانی هاتیە دامەزراندن،كو ئاهەنگێن قوتابخانا و سەیرانێن قوتابیان و نەورۆزێ و سەرێ سالا زاینی و بەرنامەیێن هۆنەری یێن راگەهاندنێ دا د گێران و هەر بیرەوەریەكا نەتەوەی پشكداری كریە و د درێژاهیا كارێ خۆدا چەندین كلیپ بەرهەم ئیناینە، ئەڤ گرۆپ پازدە سالان بەردەوام بوویە لێ بارودۆخێن ژیانێ هاتنە گهۆرین كارێ ڤی گرۆپی راوەستیا،ب خۆشبەختانە د نهۆ دا دووبارە ئەڤ گرۆپە دێ ب شێوازەكێ سەردەمانە ئێتە د خزمەتا جەماوەر و هۆنەرێ كوردی دا و ڤێ پێنگاڤێ جەماوەرێ مە گەلەك دلخۆشكریە.
گرێپانی ئاماژە ب وێ چەندێ دا پشتی هاتنا بارودۆخێن نەخۆش یێن دارایی و قەیران لدووڤ قەیرانێ و هاتنا ڤایرۆسێ كوڤید(19) كارێن مە یێن هونەری ب تەمامی راوەستیان،د نهۆ دا مزگینیێ دووبارە ددەینە جەماوەرێ خۆ كلیپ و كارێن هۆنەری د رێزێ دانە بۆ خزمەتا هەموو حەژێكەرێن مە،ئەو ژی مژوولی بەرهەڤكرنا بەرهەمێن نوو یێن هۆنەری نە و دێ د خزمەتا مللەتێ خۆدابین ل داوەت و شەهیان و ئاهەنگێن جڤاكی و نەتەوەی دا.
هەروەسا دیاركر، هەموو جۆرێن سترانان دبێژین ل داوەتان ب تایبەت یێن ئەڤینی و سترانێن فلكلۆرێ چیایێ شنگالێ ژبەركو جەماوەری گەلەك حەز و داخوازی لسەر هەیە، فلكلۆر وەكو دەریایی یە چەند سترانان ژێ بێژین هێشتا ستران دێ مینن، هەر هۆنەرمەندەكێ سترانێن فلكلۆری ل دەستپێكا كارێ خۆ یێ هۆنەری نەبێژت زوو ب سەرناكەڤـت و پێش ناكەڤت،دیسان ستران ل جەم من واتا ژیان و ئەڤینی و ئەشقە.
ل داویێ گۆت:ل دەما داوەتەكێ یان هەر چالاكیەكا هۆنەری هەبت یەك ژ وان بەرهەڤ نەبت، جەماوەری هەست پێدكر كو گرۆپ نەیێ تەمامە هەر وەكو گۆتنەكا كوردی دبێژت(دەستێ بتنێ دەنگ ژێ نائێت)،ژبەركو ئەو تەمامكەرێن هەڤن و ب هۆنەرمەندێن دوو قولی د ناڤدارین و پێكڤە د گرێداینە و جەماوەر بڤێ چەندێ خۆشحالن.
تُتاح هذه الصورة أيضا في: کوردی