رۆژنامەڤانەکێ تورک نهێنيهكا ب مهترسى يا توركيا ل دژى كوردان ئاشكهرا دكهت
ئهڤرۆ نيوز:
نڤیسەر و رۆژنامەڤانەکێ ناڤدار یێ تورکیا راگەھاند کو ئارمانجا تورکیا ژ ھۆلێ راکرنا ھەموو دەستکەڤتێن کوردایە و دخوازیت ل چ ئەردەکی عەفرینێ کورد نەمینیت و ل رۆژئاڤایێ کوردستانێ ژ عەفرینی ھەتا دێرکێ بدەتە دەستێ کۆمێن جیھادی و پشتی کەمبەرا عەرەبی ڤێ جارە ژی کەمبەرا جیھادیان ل ئاخا کوردان دروست بکەت.
کۆرای دوزگۆرەن نڤیسەر و رۆژنامەڤانێ ناڤدار یێ تورکیا د نڤیسا خوە یا ڤێ حەفتیێ دا ل سەر شەرێ عەفرینێ راوەستیا و راگەھاند کو گەلەک پرسیارێن جددی د مێژکێن مە دا دروست بووینە و بەرسڤا ڤان پرسیاران بۆ پاشەرۆژا تورکیا گەلەکێ گرنگن.
پرسیار ئەڤەنە: ئارمانجا ئۆپەراسیۆنا ل دژی عەفرینێ چیە؟ دێ ئەڤ ئۆپەراسیۆن چەند بەردەوام بیت؟ ئۆپەراسیۆن ل دژی کیە؟ دێ ئەڤ ئۆپەراسیۆن ھەتا کیڤە بچیت؟ روسیا و سووریە ل ھەمبەر چ تشتەکێ رێ بۆ ئۆپەراسیۆنا عەفرینێ خوەش کرینە؟ ئەرێ ھەموو کورد وەک مەترسی دھێنە دیتن؟ پەیوەندیێن ل گەل کۆمێن جیھادی ل سەر چ بنەمایێ نە؟ ئالۆزیا ل ئدلیبێ تورکیا بەر ب کیڤە دبەت؟. پرسیارێن ب ڤی رەنگی گەلەک ھەنە، لێ دڤێت ئەم ل بەرسڤا ڤان پرسیاران بگەرین، یا یەکێ ئەز ئاشکرا بێژم ئۆپەراسیۆنا تورکیا نە ب تنێ ل دژی یەپەگێ یان پەکەکێ یە ئارمانجا ئۆپەراسیۆنێ داگیرکرنا ھەموو دەڤەرێن رۆژئاڤایێ کوردستانێ و ژ ھۆلێ راکرنا ھەموو دەستکەڤتێن کوردایە، ئانکۆ ئۆپەراسیۆن ل دژی ھەموو کوردانە.
کۆرای دوزگۆرەن راگەھاند ژی ھەتا نھا ژ ئەنجاما ھێرشێن تورکیا و چەکدارێن سوپایێ ئازاد ڤە ب دەھان وەلاتیێن سڤیل ھاتینە کوشتن و د ١٢ رۆژێن بۆری دا سەرکەڤتنەکا وەسا گرنگ ژی بدەستڤە نەھاتیە و گەلەک سەرباز و چەکدارێن جیھادی جانێ خوە ژ دەست داینە، دیسان دڤێت باش بھێتە زانین کو گۆمانا وێ یەکێ دھێتە کرن کو ھەکە تورکیا کانتۆنا عەفرینێ بکەتە ژێر کۆنترۆلا خوە دێ دیمۆگرافیا عەفرینێ ب گوھۆریت و د جھێ کوردان دا جیھادیان و مالباتێن وان بجە بکەت، دیسان سەرۆک کۆمار ب خوە دبێژیت ئەو دێ پەنابەرێن سووریێ یێن کو ل تورکیا نھا ئاکنجینە ل عەفرینێ بجە بکەن و عەفرینێ بدەنە خوەدانێن وێ، ئانکۆ دھێتە وێ واتەیێ کو ئەفرین نە یا کوردایە، ل ڤێرێ ئارمانجا ئەردۆگانی ئاشکرا دبیت کو ئەڤ شەر ل دژی ھەموو کوردانە و ژ ترسا دخوازیت ھەموو دەستکەڤتێن کوردان ل ھەر جھەکی ژناڤ ببەت و دەستکاریێن مەزن ل دیمۆکرافیا کوردستانێ بکەت.
ناڤبری دیار ژی دکەت کو مەرەما تورکیا ئانکۆ ئەردۆگانی نە ب تنێ کوردێن سووریێ نە بەلکو کوردێن عیراقێ ژی پارچەکیە ژ پیلانا ئەردۆگانی کو ھەول بدەت ژناڤ ببەت و کوردان ژ وەلاتێ وان دەربێخیت. د ناڤا بەرپرسێن تورکیا دا ھەر بەرپرسەک ئاخڤتنەکێ دکەت و د ھەر ئاخڤتنا بەرپرسەکی دا پشکەک ژ پیلانا کرێت یا دەستھەلاتا تورکیا ئاشکرا دبیت، لێ دیارە تورکیا سۆز دایە جیھادیێن ل گەل خوە و جیھادیێن ئدلیبێ و حەلەبێ کو گرێدانەکێ د ناڤبەرا وان دا دروست بکەت، لێ د پێنگاڤا یەکێ یا تورکیا دا کو دخواست ھژمارەکا زێدە جیھادیان ل گەل نێزیکی سەد تانک و چەکێن گران بگەھینیتە سنورێ ئدلیبێ و حەلەبێ و خوە بگەھینتە ھەوارا ئەحرار شام و وان ب پارێزیت، لێ دەمێ کو ل سەر رێکا ئدلیبێ بوون فرۆکێن روسیا ل ترۆمبیلێن تورکیا دان و سووریێ ژی ب گولە ھاوان و تۆپان تورکیا دا راگرتن، گەلەک رۆژنامەڤان و زانایێن سیاسی وەسا دبینن کو روسیا تورکیا دکێشیتە د ناڤ ئالۆزیێن سووریێ دا و یاریێن مەزن ب پاشەرۆژا تورکیا دکەت و تورکیا ب رحەتی نەشێت خوە ژ ئالۆزیا سووریێ قۆرتال کەت، گەلەک ئالی ژی وەسا دبینن کو شەرێ تورکیا و رژێما سووریێ ژی نێزیک بوویە و روسیا ل گەل سووریێ یە و ئێدی ئەمریکا ژی نە ل گەل تورکیایە.
د داوی دا ئەز ڤێ یەکێ بێژم ئۆپەراسیۆنا ل دژی عەفرینێ دێ زیانەکا مەزن گەھینیتە تورکیا و نە جیھان و نە ژی کورد رێکێ نادەن وەسا ب ئاسانی دەستکەڤتێن کوردان ژ ھۆلێ رابیت و تورکیا ب دەستێ جیھادیان سەرکەڤتنێ تۆمار بکەت، پاشەرۆژ بۆ تورکیا گەلەکێ تاری خوەیا دکەت.
تُتاح هذه الصورة أيضا في: کوردی