رۆژنامەیەکا بریتانی: هێرشێن تورکیا 400 گوندێن هەرێمێ چوول کرینە
گاڤ نیوز
رۆژنامەیەکا بریتانی راگەهاند؛ تورکیا ب بەهانەیا هێرشکرنا پەكەکێ ل سنۆرێن هەرێما کوردستانێ ژیانا وەلاتیان ئێخستیە د مەترسیێ دا و ژمارەکا خەلکێ وان گوندان بووینە قوربانی.
ل گۆرەی راپۆرتەکا رۆژنامەیا گاردیان یا بریتانی، پشتی هەلگرتنا ئاگربەستا ئاشتیێ د ناڤبەرا پەكەکێ و تورکیا دا ل سالا 2015، ئەنقەرە ب فرۆکەیان ل سنۆرێن هەرێما کوردستانێ هێرشێن ئێک ل دویڤ ئێک دژی پەکەکێ دەستپێکرینە، لێ د وان هێرشان دا وەلاتیێن سڤیل دبنە قوربانی و وەزارەتا بەرگریێ یا تورکیا د راپۆرتێن خۆ دا ئاماژه ب کوشتنا سڤیلان نادەت.
رۆژنامێ نڤیسیە، شەرێ تورکیا و پەکەکێ ژیانا وەلاتێن سڤیل زەحمەت کریە و تایبەت ئەوێن کو ژیانا وان ل سەر چاندن و خۆدانکرنا ئاژەلی ل دەڤەرێن سنۆری، ژ بەرکو تا نوکە 400 گوندێن سنۆری ژ بەر ترسا هێرشان هاتینە چوولکرن.
گاردیان دیار کر کو نێزیکی 100 کەسێن سڤیل د هێرشێن تورکیا دا ژیانا خۆ ژ دەست دایە و ب دەهان کەسێن دی ژی بریندار بووینە، تنێ د سالا 2019 دا ن ناڤبەرا 27 بۆ 33 کەسێن سڤیل بووینە قوربانیێن هێرشێن ئاسمانی.
رۆژنامەیا بریتانی نڤیسیە ژی کو وەزارەتا بەرگریا تورکیا بانگەشێ بۆ وێ یەکێ د کەت کو د هێرشێن خۆ یێن ئاسمانی دا تنێ پەكەکێ دکەتە ئارمانج، لێ ژمارەکا زێدە یا وەلاتیان دبنە قوربانی و داتایێن وان بەحس ل قوربانیێن سڤیل ناکەن.
تُتاح هذه الصورة أيضا في: کوردی